മോദിയുമായുള്ള കൂടിക്കാഴ്ച: അനുഭവം വിവരിച്ച് സോണിയാ ഗാന്ധിയുടെ പുസ്തകം
ന്യൂഡൽഹി∙ മുതിർന്ന കോൺഗ്രസ് നേതാവ് സോണിയ ഗാന്ധിയുടെ ‘ബിലോങ്ങിങ്: എ ജേർണി ഓഫ് ലൗ’ എന്ന പുസ്തകം വിപണിയിലെത്തിയതോടെ അതിൽ പ്രധാനമന്ത്രി നരേന്ദ്ര മോദിയെക്കുറിച്ച് പരാമർശിച്ചിരിക്കുന്ന ഭാഗങ്ങൾ വലിയ ശ്രദ്ധനേടുകയാണ്. മോദിയുമായുള്ള തന്റെ ഔദ്യോഗിക ബന്ധത്തെക്കുറിച്ചും വ്യക്തിപരമായ അകലത്തെക്കുറിച്ചും വളരെ വ്യക്തമായി തന്നെ സോണിയ പുസ്തകത്തിൽ വിവരിക്കുന്നുണ്ട്.
‘‘നരേന്ദ്ര ദാമോദർദാസ് മോദി ഇന്ത്യയുടെ പ്രധാനമന്ത്രി പദവിയിൽ പന്ത്രണ്ട് വർഷത്തിലേറെ പിന്നിട്ടിരിക്കുന്നു. ഇപ്പോൾ അദ്ദേഹം മൂന്നാമതും രാജ്യത്തെ നയിക്കുകയാണ്. ഇത്രയും കാലമായിട്ടും അദ്ദേഹവുമായി എനിക്ക് കാര്യമായൊരു വ്യക്തിബന്ധം സ്ഥാപിക്കാൻ സാധിച്ചിട്ടില്ല. പാർലമെന്റ് സമ്മേളനങ്ങൾ അവസാനിക്കുമ്പോൾ സ്പീക്കറുടെ ചേംബറിൽ നടക്കാറുള്ള കൂടിക്കാഴ്ചകളിൽ ഞങ്ങൾ കാണാറുണ്ട്. തിരക്കേറിയതും ചെറിയതുമായ ആ മുറിയിൽ വെച്ച് മുഖാമുഖം വരുമ്പോൾ ഞങ്ങൾ പരസ്പരം ‘നമസ്തേ’ പറഞ്ഞ് അഭിവാദ്യം ചെയ്യാറുണ്ട്. രാഷ്ട്രീയപരമായ ഭിന്നതകൾക്കപ്പുറം നേതാക്കൾ സൗഹൃദം പങ്കിട്ടിരുന്ന പഴയകാലത്തിന് വിപരീതമായി, കണ്ണുകളിലേക്ക് നോക്കാൻ പോലും മടിക്കുന്ന രീതിയാണ് നിലവിൽ കാണുന്നത്. ഇത്തരം ചെറിയ കൂടിക്കാഴ്ചകൾക്കപ്പുറം ഗൗരവമായ ഒരു സംഭാഷണം ഞങ്ങൾ തമ്മിൽ നടന്നിട്ടില്ല. എങ്കിലും, ജന്മദിനങ്ങളിലും പുതുവത്സരങ്ങളിലും ഔദ്യോഗികമായ ആശംസകൾ കൈമാറുന്ന പതിവുണ്ട്. ഒരിക്കൽ ഞാൻ ആശുപത്രിയിൽ നിന്ന് മടങ്ങിയെത്തിയപ്പോൾ അദ്ദേഹം എന്റെ ആരോഗ്യവിവരങ്ങൾ അന്വേഷിച്ചിരുന്നു. അതിന് നന്ദി അറിയിച്ചുകൊണ്ട് ഞാൻ മറുപടി നൽകുകയും ചെയ്തു’’– സോണിയ ഗാന്ധി കുറിക്കുന്നു.
