ഒരു രാത്രിക്ക് ലഭിക്കുക അരലക്ഷം രൂപ! തരംഗമായി ‘പെയ്ഡ് ഹൗസ് സിറ്റർമാർ’; തെളിയിക്കേണ്ടത് ആ ഒരൊറ്റ കാര്യം

ഒരു രാത്രി വെറുതെ കിടന്നുറങ്ങിയാൽ ലഭിക്കുക അരലക്ഷത്തിലധികം രൂപ. അതും വലിയ നഗരങ്ങളിലെ ആഡംബര വീടുകളിൽ! കേൾക്കുമ്പോൾ അതിശയം തോന്നുമെങ്കിലും ഈ ജോലി അത്ര എളുപ്പമല്ല. കാരണം, നിങ്ങൾ ഉറങ്ങേണ്ടത് സാധാരണ വീടുകളിലല്ല, മറിച്ച് ‘പ്രേതബാധ’യുണ്ടെന്ന് അല്ലെങ്കിൽ നിർഭാഗ്യം നിറഞ്ഞതെന്ന് മുദ്രകുത്തപ്പെട്ട, ഇരുണ്ട ചരിത്രമുള്ള വീടുകളിലാണ്. പ്രേതബാധയുണ്ടെന്ന് സംശയിക്കുന്ന വീടുകളിൽ രാത്രി താമസിച്ച് ഭയമില്ലെന്ന് തെളിയിക്കുന്ന ‘പെയ്ഡ് ഹൗസ് സിറ്റർമാർ’ ജപ്പാനിലെ റിയൽ എസ്റ്റേറ്റ് വിപണിയിൽ  ട്രെൻഡായി മാറുകയാണ്.‘ജിക്കോ ബുക്കൻ’ജാപ്പനീസ് ഭാഷയിൽ ‘ജിക്കോ ബുക്കൻ’ എന്നാൽ അപകടങ്ങളോ ദാരുണമായ സംഭവങ്ങളോ നടന്ന വസ്തുവകകൾ എന്നാണ് അർഥം. കൊലപാതകങ്ങൾ, ആത്മഹത്യകൾ, മാരകമായ തീപിടിത്തങ്ങൾ എന്നിവ നടന്ന വീടുകൾ ഇതിൽ ഉൾപ്പെടുന്നു. കൂടാതെ, ജപ്പാനിൽ ഇന്ന് വ്യാപകമായി കണ്ടുവരുന്ന ‘ഏകാന്ത മരണം’ (അതായത് ഒറ്റയ്ക്ക് താമസിക്കുന്ന പ്രായമായ ആളുകൾ ആരുമറിയാതെ മരണപ്പെടുകയും ദിവസങ്ങളോ ആഴ്ചകളോ കഴിഞ്ഞ് മാത്രം കണ്ടെത്തുകയും ചെയ്യുന്ന അവസ്ഥ) നടന്ന വീടുകളും ഇതിൽ ഉൾപ്പെടുന്നു.ജാപ്പനീസ് നിയമപ്രകാരം അത്തരം വീടുകൾ വാടകയ്ക്ക് കൊടുക്കുമ്പോഴോ വിൽക്കുമ്പോഴോ അതിന്റെ കയ്പേറിയ ഭൂതകാലത്തെക്കുറിച്ച് ഭാവിയിൽ വരാൻ പോകുന്ന ഉപഭോക്താക്കളെ അറിയിക്കേണ്ടത് റിയൽ എസ്റ്റേറ്റ് ഏജന്റുമാരുടെ നിർബന്ധിത ബാധ്യതയാണ്. ഈ സുതാര്യത നിയമപരമായി നല്ലതാണെങ്കിലും, പരമ്പരാഗത സാംസ്കാരിക വിശ്വാസങ്ങളും നെഗറ്റീവ് എനർജിയെക്കുറിച്ചുള്ള ഭയവും കാരണം ഇത്തരം വീടുകൾ വാങ്ങാനോ വാടകയ്‌ക്കെടുക്കാനോ ആളുകൾ മടിക്കുന്നു. ഇതേ തുടർന്ന്, വിപണി വിലയേക്കാൾ വളരെ കുറഞ്ഞ നിരക്കിൽ ലഭ്യമായിട്ടും ലക്ഷക്കണക്കിന് വീടുകളാണ് ജപ്പാനിൽ വർഷങ്ങളായി ഒഴിഞ്ഞുകിടക്കുന്നത്. റിയൽ എസ്റ്റേറ്റ് മേഖലയ്ക്ക് ഇത് വരുത്തിവയ്ക്കുന്ന സാമ്പത്തിക നഷ്ടം ചെറുതല്ല.അപൂർവ തൊഴിലവസരംഈ കടുത്ത പ്രതിസന്ധിക്ക് പരിഹാരമായാണ് റിയൽ എസ്റ്റേറ്റ് കമ്പനികൾ ഒരു വിചിത്ര മാർഗം കണ്ടെത്തി. ശക്തമായ മനോധൈര്യമുള്ള ആളുകളെ കണ്ടെത്തി ഈ വീടുകളിൽ ഒരു രാത്രി ഒറ്റയ്ക്ക് താമസിക്കാൻ അവർ അവസരമൊരുക്കുന്നു. ഇതിനായി ഏകദേശം 88,000 യെൻ (ഏകദേശം 52,000 ഇന്ത്യൻ രൂപ) ആണ് പ്രതിഫലമായി വാഗ്ദാനം ചെയ്യുന്നത്. അസാധാരണമായി ഒന്നും സംഭവിച്ചില്ലെന്ന് തെളിയിക്കുന്നതിലൂടെ, ഈ വീടുകൾ പൂർണമായും സുരക്ഷിതമാണെന്ന് വാങ്ങാൻ വരുന്നവർക്ക് ബോധ്യപ്പെടുത്താൻ ഉടമകൾക്ക് സാധിക്കുന്നു.


Cinema ⏭️