HEALTH

ചായ കുടി ഹൃദയാരോഗ്യത്തിന് ഗുണകരമോ; കട്ടൻ ചായയോ ഗ്രീൻ ടീയോ ഏതാണ് കേമൻ?

ഇന്നത്തെ കാലത്ത് ചായ കുടിക്കുന്നത് ഒരു ജീവിതശൈലിയായി മാറിക്കഴിഞ്ഞിരിക്കുകയാണ്. പ്രഭാതത്തിൽ ഉണർന്നാലുടൻ ഒരു കപ്പ് ചായ നിർബന്ധമാണ്. തിരക്കേറിയ ജോലിത്തിരക്കുകൾക്കിടയിൽ അല്പം ആശ്വാസം തേടിയും നാം ചായയെ കൂട്ടുപിടിക്കുന്നു. സുഹൃത്തുക്കൾ കണ്ടുമുട്ടുമ്പോൾ സംസാരിച്ചിരിക്കാൻ ഒരു ചായ കൂടിയേ തീരൂ. വൈകുന്നേരങ്ങളിലെ മടുപ്പ് മാറ്റാനും ചായ തന്നെ ശരണം. ഇപ്പോൾ പുതുതലമുറക്കാർ രാത്രിസമയങ്ങളിലും ചായക്കടകളിൽ തമ്പടിക്കുന്നത് കാണാറുണ്ട്. എന്നാൽ ഇത്രയേറെ പ്രചാരമുണ്ടായിട്ടും, ചായ ആരോഗ്യത്തിന് ദോഷകരമാണോ എന്ന ആശങ്ക പലർക്കുമുണ്ട്. ഈ സാഹചര്യത്തിലാണ് പതിവായി ചായ കുടിക്കുന്നത് ഹൃദയസംബന്ധമായ അസുഖങ്ങളും രക്തക്കുഴലുകളെ ബാധിക്കുന്ന രോഗങ്ങളും വരാനുള്ള സാധ്യത 11 ശതമാനം വരെ കുറച്ചേക്കാമെന്ന പുതിയ പഠനറിപ്പോർട്ട് ശ്രദ്ധേയമാകുന്നത്. ‘ജേണൽ ഓഫ് ഇന്റേണൽ മെഡിസിൻ’ എന്ന പ്രസിദ്ധീകരണത്തിലാണ് ഈ ഗവേഷണഫലങ്ങൾ പുറത്തുവന്നത്. കട്ടൻചായയോ ഗ്രീൻ ടീയോ ഇഷ്ടപ്പെടുന്നവർക്ക് ഈ വിവരം ആശ്വാസകരമാണ്. എങ്കിലും, ചായ കുടിക്കുന്നത് കൊണ്ട് മാത്രം ഹൃദയാഘാതമോ പക്ഷാഘാതമോ പൂർണ്ണമായും തടയാമെന്ന് ഇതിനർത്ഥമില്ല.

ചായയുടെ തരം, അതിലെ വീര്യം, ഉപയോഗിക്കുന്ന ചൂട് എന്നിവ ആരോഗ്യത്തെ എങ്ങനെ സ്വാധീനിക്കുന്നുവെന്ന് ഗവേഷകർ സൂക്ഷ്മമായി പരിശോധിച്ചു. തിളയ്ക്കുന്ന ചൂടിൽ ചായ കുടിക്കുന്നത് ആരോഗ്യത്തിന് അപകടമാണെന്നും ഇവർ മുന്നറിയിപ്പ് നൽകുന്നു.

ചൈനയിലെ 4,85,934 പേരടങ്ങുന്ന മുതിർന്നവരിൽ ഒമ്പത് വർഷത്തോളം നടത്തിയ പഠനത്തിന്റെ അടിസ്ഥാനത്തിലാണ് ഈ കണ്ടെത്തൽ. ഈ കാലയളവിനുള്ളിൽ 14,863 പേർക്ക് ഹൃദ്രോഗം, സെറിബ്രോവാസ്കുലർ രോഗങ്ങൾ, പൾമണറി ഹാർട്ട് ഡിസീസ്, പെരിഫറൽ ആർട്ടറി ഡിസീസ് തുടങ്ങിയ രോഗങ്ങൾ പിടിപെട്ടു. നിത്യവും ചായ കുടിക്കുന്നവരിൽ രക്തക്കുഴൽ രോഗങ്ങൾക്കുള്ള സാധ്യത 11 ശതമാനം കുറവാണെന്നാണ് പ്രധാന കണ്ടെത്തൽ. ഇതിൽത്തന്നെ കട്ടൻചായ കുടിക്കുന്നവരിലാണ് ഈ ഗുണഫലം കൂടുതൽ കണ്ടുവരുന്നത്. മിതമായ വീര്യമുള്ള ചായയാണ് ആരോഗ്യത്തിന് കൂടുതൽ ഉചിതം.

ഹൃദയാരോഗ്യത്തിന് ചായ എങ്ങനെ സഹായിക്കുന്നു?

ചായയിലടങ്ങിയിരിക്കുന്ന ‘പോളിഫിനോളുകൾ’ അഥവാ ഫ്ലേവനോയ്ഡുകൾ പോലുള്ള പ്രകൃതിദത്ത സസ്യസംയുക്തങ്ങളാണ് ഇതിന് സഹായിക്കുന്നത്. ഇവയ്ക്ക് മികച്ച ആന്റിഓക്‌സിഡന്റ്, ആന്റി-ഇൻഫ്ലമേറ്ററി ഗുണങ്ങളുണ്ട്. ആരോഗ്യകരമായ രക്തയോട്ടത്തിന് രക്തക്കുഴലുകളുടെ ഉൾപ്പാളികളുടെ പ്രവർത്തനം വളരെ പ്രധാനമാണ്. ചായയിലെ ഘടകങ്ങൾ ഇതിനെ പിന്തുണയ്ക്കുന്നു. കൂടാതെ, ശരീരത്തിലെ ദീർഘകാല വീക്കം (inflammation) കുറയ്ക്കാനും ഇത് സഹായിക്കുന്നു. മധുരപാനീയങ്ങൾക്ക് പകരം മധുരമില്ലാത്ത ചായ തിരഞ്ഞെടുക്കുന്നത് ശരീരഭാരം നിയന്ത്രിക്കാനും മെറ്റബോളിക് ആരോഗ്യം മെച്ചപ്പെടുത്താനും സഹായിക്കും.

ഗ്രീൻ ടീയാണോ കട്ടൻചായയാണോ കൂടുതൽ നല്ലത്?

പഠനപ്രകാരം കട്ടൻചായയ്ക്കാണ് ഹൃദയസംബന്ധമായ ഗുണങ്ങൾ അല്പം കൂടുതൽ കാണപ്പെട്ടത്. എങ്കിലും, രണ്ടിന്റെയും ഉറവിടം ഒന്നുതന്നെയാണ്. ‘കാമെല്ലിയ സൈനൻസിസ്’ എന്ന ചെടിയുടെ ഇലകൾ സംസ്കരിക്കുന്ന രീതിയിലുള്ള വ്യത്യാസമാണ് കട്ടൻചായയെയും ഗ്രീൻ ടീയയെയും വ്യത്യസ്തമാക്കുന്നത്. ഓക്‌സിഡേഷൻ പ്രക്രിയ വഴി കട്ടൻചായയുടെ രാസഘടന മാറുന്നു. ഗ്രീൻ ടീയിൽ ഈ പ്രക്രിയ പരിമിതമാണ്. അതുകൊണ്ട് തന്നെ, കട്ടൻചായ മാത്രം മതി എന്ന് ഇതിനർത്ഥമില്ല. ഏതാണ് കൂടുതൽ മികച്ചതെന്ന് പറയാൻ കൂടുതൽ പഠനങ്ങൾ ആവശ്യമാണ്.

കൂടുതൽ ചായ കുടിച്ചാൽ കൂടുതൽ സംരക്ഷണം കിട്ടുമോ?

ദിവസവും ആറ് മുതൽ എട്ട് കപ്പ് വരെ ചായ കുടിക്കുന്നവരിലാണ് കുറഞ്ഞ അപകടസാധ്യത കണ്ടെത്തിയത്. എന്നാൽ ഇത് എല്ലാവരും ഇത്രയധികം ചായ കുടിക്കണമെന്ന നിർദ്ദേശമല്ല. ചായയിലെ കഫീൻ ചിലരിൽ ഉറക്കക്കുറവിനും ഹൃദയമിടിപ്പ് കൂടുന്നതിനും കാരണമായേക്കാം. അതിനാൽ അധികം കുടിക്കുന്നത് നല്ലതല്ല. അതുപോലെ, വളരെ ചൂടോടെ ചായ കുടിക്കുന്നത് ഒഴിവാക്കണം. അമിത ചൂടിൽ ചായ കുടിക്കുന്നവർക്ക് രോഗസാധ്യത 16 ശതമാനം കൂടുതലാണെന്നും പഠനങ്ങൾ പറയുന്നു. ആവി പറക്കുന്ന പാനീയങ്ങൾ പതിവായി കുടിക്കുന്നത് അന്നനാളത്തെയും ദോഷകരമായി ബാധിക്കാം.

Life Style ⏭️

Back to top button