മക്കളെ കാണാൻ യുകെയിലെത്തിയ മലയാളി അമ്മയുടെ മരണം: കുടുംബം മാതൃകയാകുന്നു

യുകെയിൽ മക്കളെയും കുടുംബാംഗങ്ങളെയും കാണാനും അവരോടൊപ്പം കുറച്ചു നാൾ ചിലവഴിക്കാനും എത്തിയ ആലപ്പുഴ കുന്നങ്കരി ചിറയിൽ സ്വദേശിനി ആൻസി തോമസ് (64) വിടവാങ്ങിയ വാർത്ത പ്രവാസിലോകത്തെയും നാട്ടിലെ സുഹൃത്തുക്കളെയും അതീവ ദുഃഖത്തിലാഴ്ത്തിയിരിക്കുകയാണ്. നോർത്ത് വെയ്ൽസിലെ ഗ്ലാൻ ക്ലൂയിഡ് ആശുപത്രിയിൽ ചികിത്സയിലായിരുന്ന ആൻസി തോമസ് നവംബർ 17-നാണ് മരണത്തിന് കീഴടങ്ങിയത്.
തന്റെ അപ്രതീക്ഷിത വിയോഗത്തിലും മറ്റുള്ളവർക്ക് പ്രതീക്ഷയുടെ വെളിച്ചം പകരാൻ ആൻസിക്ക് സാധിച്ചു എന്നത് ഈ കുടുംബത്തെ സംബന്ധിച്ചിടത്തോളം വലിയൊരു ആശ്വാസമാണ്. സ്വന്തം അമ്മയുടെ നഷ്ടത്തിൽ വേദനിക്കുമ്പോഴും, അവയവദാനം എന്ന ഉദാത്തമായ തീരുമാനത്തിലൂടെ പലർക്കും പുതുജീവൻ നൽകാൻ കുടുംബാംഗങ്ങൾ കാണിച്ച മനസ്സ് ഏറെ പ്രശംസനീയമാണ്. ആശുപത്രി അധികൃതരുമായി കൂടിയാലോചിച്ച് അവയവദാനത്തിന് കുടുംബം പൂർണ്ണ സമ്മതം അറിയിക്കുകയായിരുന്നു. തുടർന്ന് നവംബർ 17-ന് തന്നെ ഇതിനായുള്ള നടപടിക്രമങ്ങൾ പൂർത്തീകരിച്ചു. ഈ ദാനത്തിലൂടെ നിരവധി ആളുകൾക്കാണ് മരണത്തിന്റെ വക്കിൽ നിന്നും ജീവിതത്തിലേക്ക് മടങ്ങിയെത്താനുള്ള അവസരം ലഭിച്ചിരിക്കുന്നത്.
കഴിഞ്ഞ ഓഗസ്റ്റ് മാസത്തിലാണ് ഭർത്താവ് തോമസ് ജോസഫിനൊപ്പം ആൻസി യുകെയിൽ എത്തിയത്. കുടുംബത്തോടൊപ്പം സന്തോഷകരമായ നാളുകൾ ചെലവഴിക്കാൻ എത്തിയ ആൻസിയുടെ മരണം ഏവരെയും ഞെട്ടിച്ചിരിക്കുകയാണ്.




