യുഎസ് ചാരസംഘടനയെ വെട്ടിലാക്കി പ്രണയക്കെണി: ചൈനീസ് ബന്ധത്തിൽ അന്വേഷണം
വാഷിങ്ടൻ∙ ആഗോള ടെക് മേഖലയെ നടുക്കി ചൈനീസ് ചാരവൃത്തി സംബന്ധിച്ച പുതിയ വെളിപ്പെടുത്തലുകൾ പുറത്തുവരുന്നു. ലോകത്തെ മുൻനിര സാങ്കേതികവിദ്യാ ഭീമനായ എൻവിഡിയയുടെ സിഇഒ ജെൻസൻ ഹുവാങ് (63), ചൈനീസ് ചാരവനിതയെന്ന് കരുതപ്പെടുന്ന ഒരു ബിസിനസ് എക്സിക്യൂട്ടീവുമായി അടുപ്പത്തിലായിരുന്നുവെന്ന വിവരമാണ് അമേരിക്കൻ രഹസ്യാന്വേഷണ ഏജൻസികൾ പുറത്തുവിട്ടിരിക്കുന്നത്.
സിംഗപ്പൂർ കേന്ദ്രീകരിച്ച് പ്രവർത്തിക്കുന്ന മെഗാസ്പീഡ് എന്ന കമ്പനിയിലെ ഉന്നത ഉദ്യോഗസ്ഥയായ ആലീസ് ഹുവാങ്ങാണ് നിരീക്ഷണത്തിലായ വ്യക്തി. ജെൻസൻ ഹുവാങ്ങുമായി ഇവർക്ക് യാതൊരു ബന്ധവുമില്ലെങ്കിലും, ചൈനയുടെ രഹസ്യാന്വേഷണ വിഭാഗമായ സ്റ്റേറ്റ് സെക്യൂരിറ്റി മന്ത്രാലയത്തിന്റെ ഏജന്റായി ഇവർ പ്രവർത്തിക്കുന്നുണ്ടെന്നാണ് അമേരിക്കൻ അധികൃതരുടെ സംശയം. ജെൻസൻ ഹുവാങ്ങുമായി പ്രണയബന്ധം സ്ഥാപിച്ച് എൻവിഡിയയുടെ അതീവ രഹസ്യങ്ങൾ ചോർത്താനും കമ്പനിയുടെ തന്ത്രപരമായ തീരുമാനങ്ങളെ സ്വാധീനിക്കാനും ആലീസ് ശ്രമിച്ചതായാണ് ഇന്റലിജൻസ് റിപ്പോർട്ടുകൾ വ്യക്തമാക്കുന്നത്.
ഈ ഞെട്ടിക്കുന്ന ആരോപണങ്ങളോട് എൻവിഡിയ ഔദ്യോഗികമായി ഇതുവരെ പ്രതികരിച്ചിട്ടില്ല. എന്നിരുന്നാലും, നേരത്തെ ഉയർന്നുവന്ന അഭ്യൂഹങ്ങൾക്ക് മറുപടിയായി ജെൻസൻ ഹുവാങും ആലീസ് ഹുവാങ്ങും തമ്മിലുള്ള കൂടിക്കാഴ്ചകളിൽ അസ്വാഭാവികമായി ഒന്നുമില്ലെന്നായിരുന്നു കമ്പനിയുടെ വാദം. ഒരു ആഗോള ടെക് കമ്പനിയുടെ തലവൻ എന്ന നിലയിൽ ലോകമെമ്പാടുമുള്ള ഉപഭോക്താക്കളെയും അവരുടെ പ്രതിനിധികളെയും കാണേണ്ടത് അനിവാര്യമാണെന്നും, വർഷത്തിൽ ആയിരക്കണക്കിന് ബിസിനസ് എക്സിക്യൂട്ടീവുകളുമായി അദ്ദേഹം ആശയവിനിമയം നടത്താറുണ്ടെന്നും എൻവിഡിയ വക്താവ് മുൻപ് വിശദീകരിച്ചിരുന്നു.
