അമേരിക്കയിൽ വിമാന സർവീസുകൾ സ്തംഭിച്ചു: പതിനായിരത്തോളം വിമാനങ്ങൾ റദ്ദാക്കി, ദുരിതത്തിലായി യാത്രക്കാർ
വാഷിങ്ടൻ∙ അമേരിക്കൻ വ്യോമയാന മേഖലയെയാകെ സ്തംഭിപ്പിച്ചുകൊണ്ട് രാജ്യത്തെ വിമാന സർവീസുകൾ വൻ പ്രതിസന്ധിയിലായി. ഫെഡറൽ ഏവിയേഷൻ അഡ്മിനിസ്ട്രേഷന്റെ നിർണായകമായ ആശയവിനിമയ സംവിധാനത്തിലുണ്ടായ സാങ്കേതിക തകരാറാണ് യുഎസിലെ വിമാനത്താവളങ്ങളുടെ പ്രവർത്തനത്തെ താളംതെറ്റിച്ചത്. ഇതുമൂലം ആയിരക്കണക്കിന് വിമാനങ്ങൾ പലയിടങ്ങളിലായി പറന്നുയരാനാവാതെ കുടുങ്ങിക്കിടക്കുകയാണ്.
അതേസമയം, ഏറ്റവും പുതിയ റിപ്പോർട്ടുകൾ സൂചിപ്പിക്കുന്നത് പ്രകാരം പസഫിക് മേഖലയ്ക്കും രാജ്യത്തിന്റെ പടിഞ്ഞാറൻ തീരങ്ങൾക്കും മുകളിലുള്ള ചില വിമാന സർവീസുകൾ പതുക്കെ സാധാരണ നിലയിലേക്ക് മടങ്ങാൻ തുടങ്ങിയിട്ടുണ്ട്. ഷിക്കാഗോയിലെ ഒ’ഹെയർ, മിഡ്വേ തുടങ്ങിയ പ്രധാന വിമാനത്താവളങ്ങളിലുൾപ്പെടെ സർവീസുകൾ പൂർണമായും നിർത്തിവെക്കേണ്ടി വന്നു. മണിക്കൂറുകളോളം നീണ്ട കാത്തിരിപ്പാണ് ലോകത്തിന്റെ വിവിധ ഭാഗങ്ങളിൽ നിന്നുള്ള ആയിരക്കണക്കിന് യാത്രക്കാർക്ക് അനുഭവിക്കേണ്ടി വന്നത്. ഫ്ലൈറ്റ് ട്രാക്കിങ് സൈറ്റുകളിൽ നിന്നുള്ള കണക്കുകൾ പ്രകാരം പതിനായിരത്തോളം സർവീസുകൾ വൈകുകയും നൂറുകണക്കിന് വിമാനങ്ങൾ റദ്ദാക്കേണ്ടി വരികയും ചെയ്തു.
