സ്മാര്‍ട്ട്‌ഫോണില്ലെങ്കിലും ബാങ്ക് അക്കൗണ്ട് ചോരാം; സിം പിന്‍ ലോക്ക് വഴി സുരക്ഷ ഉറപ്പാക്കാം
സ്മാര്‍ട്ട്‌ഫോണുകളിലെ ഫിംഗര്‍പ്രിന്റും പാസ്വേഡുകളും മാത്രം ഉപയോഗിച്ച് നിങ്ങളുടെ ബാങ്ക് അക്കൗണ്ടുകള്‍ സുരക്ഷിതമാണെന്ന് കരുതരുത്. ഫോണ്‍ മോഷ്ടിക്കുന്നവര്‍ക്ക് അതിലെ ഫിസിക്കല്‍ സിം കാര്‍ഡ് ഊരിയെടുത്ത് മറ്റൊരു സാധാരണ മൊബൈല്‍ ഫോണിലിട്ടാല്‍, നിമിഷങ്ങള്‍ക്കുള്ളില്‍ നിങ്ങളുടെ യുപിഐ (UPI) അക്കൗണ്ടുകള്‍ വരെ കാലിയാക്കാന്‍ സാധിക്കും. ഇത്തരത്തിലുള്ള സൈബര്‍ തട്ടിപ്പുകളെ തടയാന്‍ സ്മാര്‍ട്ട്‌ഫോണില്‍ ‘സിം പിന്‍’ (SIM PIN) ലോക്ക് സംവിധാനം എങ്ങനെ സജ്ജീകരിക്കാം എന്ന് നോക്കാം. നിങ്ങളുടെ കഠിനാധ്വാനത്തിലൂടെ സമ്പാദിച്ച പണം സുരക്ഷിതമായി സൂക്ഷിക്കാന്‍ ഇത് അത്യാവശ്യമാണ്.
ഇന്നത്തെ കാലത്ത് യുപിഐ ഉപയോഗിക്കുന്നവരില്‍ ഭൂരിഭാഗവും ഫോണിന്റെ സ്‌ക്രീന്‍ ലോക്കുകളായ പിന്‍, പാറ്റേൺ, ഫിംഗര്‍പ്രിന്റ് എന്നിവയില്‍ അമിതമായി വിശ്വാസമര്‍പ്പിക്കുന്നവരാണ്. ഫോണ്‍ നഷ്ടപ്പെട്ടാലും ഈ ലോക്കുകള്‍ നിങ്ങളുടെ ചിത്രങ്ങളും സ്വകാര്യ രേഖകളും സംരക്ഷിച്ചേക്കാം; എന്നാല്‍ ബാങ്ക് അക്കൗണ്ടിന്റെ കാര്യത്തില്‍ ഇതൊരു പൂര്‍ണ്ണ സുരക്ഷയല്ല.
ഇവിടെയാണ് ഫിസിക്കല്‍ സിം കാര്‍ഡുകള്‍ വലിയ സുരക്ഷാ ഭീഷണിയാകുന്നത്. ഫോണ്‍ മോഷ്ടിക്കുന്ന ഒരാള്‍ക്ക് ഫോണ്‍ അണ്‍ലോക്ക് ചെയ്യാന്‍ സാധിച്ചില്ലെങ്കിലും, സിം ട്രേ തുറന്ന് ആ സിം കാര്‍ഡ് മറ്റൊരു സാധാരണ ഫോണിലേക്ക് മാറ്റാന്‍ കഴിയും. പുതിയ ഫോണില്‍ സിം ഇട്ടയുടന്‍ നെറ്റ്വര്‍ക്ക് ലഭിക്കുകയും, ബാങ്ക് അക്കൗണ്ടുമായി ബന്ധിപ്പിച്ച ഒടിപികളും ഇന്‍കമിംഗ് കോളുകളും നേരിട്ട് തട്ടിപ്പുകാരിലേക്ക് എത്തുകയും ചെയ്യും.
നിങ്ങളുടെ ഫോണ്‍ നമ്പര്‍ ഉപയോഗിച്ച് സോഷ്യല്‍ മീഡിയ അക്കൗണ്ടുകള്‍, നെറ്റ് ബാങ്കിംഗ്, വിവിധ വാലറ്റുകള്‍ എന്നിവ ലോഗിന്‍ ചെയ്യാനും ഒടിപി വഴി പാസ്വേഡുകള്‍ മാറ്റിയെഴുതാനും തട്ടിപ്പുകാര്‍ക്ക് സാധിക്കും. ഫീച്ചര്‍ ഫോണുകളില്‍ ഇന്റര്‍നെറ്റ് ഇല്ലാതെ തന്നെ ബാങ്കിംഗ് ഇടപാടുകള്‍ നടത്താവുന്ന *99# സംവിധാനവും വലിയൊരു വെല്ലുവിളിയാണ്. സിം കാര്‍ഡ് കൈവശമുള്ള മോഷ്ടാക്കള്‍ക്ക് ഈ സൗകര്യം ദുരുപയോഗം ചെയ്യാം. ഈ സംവിധാനം ഉപയോഗിച്ച് യുപിഐ പിന്‍ മാറ്റാനും സാധിക്കും, ഇതിനുള്ള ഒടിപി സിം നമ്പറിലേക്കാണ് വരുന്നത്. പണം അക്കൗണ്ടില്‍ നിന്ന് പിന്‍വലിക്കപ്പെടുന്ന അലേര്‍ട്ട് മെസേജുകള്‍ മോഷ്ടാവിന്റെ കയ്യിലുള്ള സിമ്മിലേക്ക് പോകുന്നതിനാല്‍, അക്കൗണ്ട് കാലിയാകുന്ന വിവരം ഉടമയ്ക്ക് കൃത്യസമയത്ത് അറിയാനും കഴിയില്ല.
നിങ്ങളുടെ ഫോണ്‍ നമ്പറാണ് ഡിജിറ്റല്‍ ലോകത്തെ താക്കോല്‍. യുപിഐ, ബാങ്ക് അക്കൗണ്ട്, ആധാര്‍, ഇമെയില്‍ എന്നിവയുടെയെല്ലാം സുരക്ഷാ ഘടകം സിമ്മിലേക്ക് വരുന്ന ഒടിപി ആണ്. ഫോണ്‍ സ്‌ക്രീന്‍ ലോക്ക് ചെയ്യുന്നതുപോലെ തന്നെ സിം കാര്‍ഡും ലോക്ക് ചെയ്യേണ്ടതുണ്ട്. ഇതിനായി ഫോണിലെ ‘Security & Privacy’ വിഭാഗത്തിലെ ‘SIM Card Lock’ എന്ന ഓപ്ഷന്‍ ഉപയോഗിക്കുക. ഇതിലൂടെ സിം കാര്‍ഡിന് നാലക്കമുള്ള രഹസ്യ പിന്‍ നല്‍കാം.
സിം ലോക്ക് ഓണ്‍ ചെയ്തു കഴിഞ്ഞാല്‍, പിന്നീട് ആ സിം കാര്‍ഡ് ഊരി മറ്റൊരു ഫോണിലിട്ടാലോ, ഫോണ്‍ സ്വിച്ച് ഓഫ് ചെയ്ത് വീണ്ടും ഓണ്‍ ചെയ്താലോ ഈ പിന്‍ നല്‍കാതെ സിം പ്രവര്‍ത്തിക്കില്ല. ടെലികോം സേവനദാതാക്കള്‍ നല്‍കുന്ന ഡിഫോള്‍ട്ട് പിന്‍ സാധാരണയായി 1234 അല്ലെങ്കില്‍ 0000 ആയിരിക്കും. തുടര്‍ച്ചയായി മൂന്നുതവണ തെറ്റായി പിന്‍ അടിച്ചാല്‍ സിം ബ്ലോക്ക് ആകും. പിന്നീട് കസ്റ്റമര്‍ കെയറുമായി ബന്ധപ്പെട്ട് PUK കോഡ് ഉപയോഗിച്ച് മാത്രമേ ഇത് വീണ്ടും സജീവമാക്കാന്‍ സാധിക്കൂ.
ഇന്നത്തെ കാലത്ത് മിക്ക സ്മാര്‍ട്ട് ഫോണുകളും ഇ-സിം (eSIM) സൗകര്യത്തോടെയാണ് വരുന്നത്. ഇത് ഫിസിക്കല്‍ സിമ്മുമായി ബന്ധപ്പെട്ട ഭീഷണികളെ ഫലപ്രദമായി ഒഴിവാക്കുന്നു. ഇ-സിം ഉപയോഗിക്കുകയാണെങ്കില്‍ ഫോണ്‍ നഷ്ടപ്പെട്ടാലും സിം കാര്‍ഡ് ഊരിയെടുക്കാന്‍ മോഷ്ടാവിന് കഴിയില്ല.
ഫോണ്‍ ലോക്ക് ആയിരിക്കുമ്പോള്‍ നോട്ടിഫിക്കേഷനുകള്‍ നിയന്ത്രിക്കുന്നതും വളരെ പ്രധാനപ്പെട്ട സുരക്ഷാ മുന്‍കരുതലാണ്. ഫോണ്‍ ലോക്ക് ചെയ്താലും ഒടിപികളോ എസ്എംഎസുകളോ സ്‌ക്രീനില്‍ തെളിയാത്ത വിധം ‘Hide sensitive notifications’ എന്ന സെറ്റിങ്‌സ് അടിയന്തരമായി ഓണ്‍ ചെയ്യുക. ഫോണ്‍ നഷ്ടപ്പെട്ടാല്‍ ഉടന്‍ തന്നെ ടെലികോം ഓപ്പറേറ്ററെ (Jio, Airtel, Vi, BSNL) വിളിച്ച് സിം കാര്‍ഡ് ബ്ലോക്ക് ചെയ്യാന്‍ ശ്രദ്ധിക്കണം. പിന്നീട് ഡ്യൂപ്ലിക്കേറ്റ് സിം എടുക്കാവുന്നതാണ്. ഇതിനൊപ്പം ബാങ്ക് കസ്റ്റമര്‍ കെയറുമായി ബന്ധപ്പെട്ട് യുപിഐ സേവനങ്ങളും നെറ്റ് ബാങ്കിംഗും താല്‍ക്കാലികമായി നിര്‍ത്തിവെക്കുക. കൂടാതെ, കേന്ദ്ര സര്‍ക്കാരിന്റെ ‘സഞ്ചാര്‍ സാഥി’ (Sanchar Saathi – CEIR) പോര്‍ട്ടല്‍ വഴി നഷ്ടപ്പെട്ട ഫോണ്‍ പൂര്‍ണ്ണമായും ബ്ലോക്ക് ചെയ്യുകയും വേണം.
