സന്നിധാനത്തേക്ക് 5000 ലീറ്റർ നെയ്യ്: മിൽമയുടെ സഹായം തേടി ദേവസ്വം ബോർഡ്
തിരുവനന്തപുരം: ശബരിമലയിലേക്കാവശ്യമായ നെയ്യ് മില്‍മയില്‍നിന്ന് സംഭരിക്കാന്‍ തിരുവിതാംകൂര്‍ ദേവസ്വം ബോര്‍ഡ് തീരുമാനിച്ചു. ഇതിന്റെ ഭാഗമായി ആദ്യഘട്ടമെന്ന നിലയില്‍ 10,000 ലീറ്റര്‍ നെയ്യാണ് ബോര്‍ഡ് ആവശ്യപ്പെട്ടിരിക്കുന്നത്. മൊത്തവ്യാപാര നിരക്കിലാണ് മില്‍മ നെയ്യ് കൈമാറുന്നതെന്ന് തിരുവനന്തപുരം യൂണിയന്‍ അധികൃതര്‍ വ്യക്തമാക്കി. അത്യാവശ്യ സാഹചര്യം കണക്കിലെടുത്ത്, തിരുവനന്തപുരത്തുനിന്ന് പ്രത്യേക വാഹനത്തില്‍ രണ്ട് മില്‍മ ഉദ്യോഗസ്ഥരുടെ മേല്‍നോട്ടത്തിലാണ് നെയ്യ് പമ്പയിലേക്ക് അയച്ചത്.
ലീറ്ററിന് 660 രൂപ എന്ന നിരക്കിലാണ് നെയ്യ് വിതരണം ചെയ്യുന്നത്. കഴിഞ്ഞ വര്‍ഷം ഇത് 510 രൂപയായിരുന്നു. നെയ്യ് വിതരണത്തിനായി രണ്ടുതവണ ടെന്‍ഡര്‍ ക്ഷണിച്ചെങ്കിലും യോഗ്യരായ വിതരണക്കാരെ കണ്ടെത്താന്‍ കഴിയാത്ത പ്രതിസന്ധി നിലനിന്നിരുന്നു. ഇതേത്തുടര്‍ന്ന് ദേവസ്വം ബോര്‍ഡ് ആസ്ഥാനത്ത് മില്‍മ പ്രതിനിധികളുമായി നടത്തിയ ചര്‍ച്ചകളെത്തുടര്‍ന്നാണ് അടിയന്തരമായി നെയ്യ് എത്തിക്കാന്‍ തീരുമാനിച്ചത്.
ശബരിമല സീസണ്‍ നവംബര്‍ 17-ന് ആരംഭിക്കാനിരിക്കെയാണ്, ആവശ്യമായ 50,000 ലീറ്ററില്‍ നിന്ന് 10,000 ലീറ്റര്‍ അടിയന്തരമായി വാങ്ങിയത്. ബാക്കി വരുന്ന 40,000 ലീറ്ററിനായുള്ള ടെന്‍ഡര്‍ നടപടികള്‍ വരും ദിവസങ്ങളില്‍ തന്നെ ദേവസ്വം ബോര്‍ഡ് പൂര്‍ത്തിയാക്കും. ഈ ടെന്‍ഡറിലും മില്‍മ പങ്കുചേരുമെന്ന് അധികൃതര്‍ അറിയിച്ചു. കഴിഞ്ഞ സീസണില്‍ മില്‍മയില്‍നിന്ന് നെയ്യ് കൊണ്ടുപോയ കരാറുകാരന്‍ വഴിമധ്യേ നെയ്യ് മറിച്ചുവില്‍ക്കുകയും സന്നിധാനത്ത് ഗുണനിലവാരമില്ലാത്ത നെയ്യ് എത്തിക്കുകയും ചെയ്ത സംഭവം വലിയ വിവാദങ്ങള്‍ക്ക് വഴിവെച്ചിരുന്നു. ഇതിന്റെ പശ്ചാത്തലത്തില്‍ ഇത്തവണത്തെ ടെന്‍ഡറില്‍നിന്ന് മില്‍മ വിട്ടുനിന്നിരുന്നെങ്കിലും, വിതരണക്കാരുടെ ദൗര്‍ലഭ്യം കാരണം ദേവസ്വം ബോര്‍ഡിന്റെ പ്രത്യേക അഭ്യര്‍ഥന മാനിച്ചാണ് മില്‍മ വീണ്ടും സഹകരണത്തിനൊരുങ്ങുന്നത്.
