പതിനേഴുകാരിയായ ക്രിക്കറ്റ് താരം മരിച്ചനിലയിൽ: രണ്ടുപേർക്കെതിരെ കുടുംബത്തിന്റെ പരാതി, കേസെടുത്ത് പോലീസ്
ഹൈദരാബാദ്: ബിസിസിഐ അണ്ടർ 15 ടീമിൽ അംഗമായിരുന്ന പതിനേഴുകാരിയായ ക്രിക്കറ്റ് താരം നന്ദിനി റാത്തോഡിനെ വസതിയിൽ മരിച്ച നിലയിൽ കണ്ടെത്തി. തെലങ്കാനയിലെ വികാരാബാദ് മധു കോളനിയിൽ താമസിച്ചിരുന്ന മുത്തശ്ശിയുടെ വീട്ടിലായിരുന്നു താരം കഴിഞ്ഞിരുന്നത്.
വെള്ളിയാഴ്ച രാവിലെ ഒൻപത് മണിയോടെയാണ് സംഭവം പുറത്തറിയുന്നതെന്ന് വികാരാബാദ് സർക്കിൾ ഇൻസ്പെക്ടർ രഘു വ്യക്തമാക്കി. വിവരം ലഭിച്ച ഉടൻ തന്നെ പോലീസ് ഉദ്യോഗസ്ഥർ സ്ഥലത്തെത്തി സ്ഥിതിഗതികൾ വിലയിരുത്തി. പ്രാഥമിക നിഗമനത്തിൽ ഇതൊരു ആത്മഹത്യയാണെന്നാണ് കരുതപ്പെടുന്നത്. കുടുംബത്തിന്റെ പരാതിയുടെ അടിസ്ഥാനത്തിൽ പോലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചു.
സംഭവസ്ഥലത്ത് നിന്ന് ആത്മഹത്യാക്കുറിപ്പുകൾ ഒന്നും തന്നെ ലഭിച്ചിട്ടില്ലെന്ന് പോലീസ് അറിയിച്ചു. അന്വേഷണത്തിന്റെ ഭാഗമായി നന്ദിനിയുടെ മൊബൈൽ ഫോൺ പോലീസ് കസ്റ്റഡിയിലെടുത്തിട്ടുണ്ട്. മരണത്തിലേക്ക് നയിച്ച കാരണങ്ങൾ വ്യക്തമാക്കുന്ന വിവരങ്ങൾക്കായി ഫോണിലെ വിവരങ്ങൾ വിശദമായി പരിശോധിച്ചുവരികയാണെന്ന് ഇൻസ്പെക്ടർ വ്യക്തമാക്കി.
‘‘പെൺകുട്ടിയുടെ ഇൻസ്റ്റാഗ്രാം, ഫെയ്സ്ബുക്ക്, വാട്സാപ്പ് അക്കൗണ്ടുകൾ ഞങ്ങൾ പരിശോധിക്കുന്നുണ്ട്. സമൂഹമാധ്യമങ്ങൾ വഴി ആരെങ്കിലും നന്ദിനിയെ മാനസികമായി പ്രയാസപ്പെടുത്തുകയോ ഭീഷണിപ്പെടുത്തുകയോ ചെയ്തിട്ടുണ്ടോ എന്ന് കണ്ടെത്താനാണ് മുൻഗണന നൽകുന്നത്. പരിശോധനയിൽ ലഭിക്കുന്ന തെളിവുകളുടെ അടിസ്ഥാനത്തിൽ കുറ്റക്കാർക്കെതിരെ ശക്തമായ നിയമനടപടികൾ സ്വീകരിക്കും’’– സിഐ രഘു കൂട്ടിച്ചേർത്തു.
