ടാറ്റാ സൺസ് ചെയർമാൻ എൻ ചന്ദ്രശേഖരനും ജോർജ മെലോനിയും തമ്മിലുള്ള കൂടിക്കാഴ്ച: നിർണ്ണായക ചർച്ചകൾക്ക് തുടക്കം
ടാറ്റ സൺസ് ചെയർമാൻ എൻ. ചന്ദ്രശേഖരൻ ഇറ്റാലിയൻ പ്രധാനമന്ത്രി ജോർജ മെലോനിയുമായി റോമിലെ പലാത്‍സോ കീഗിയിൽ വെച്ച് ഉന്നതതല ചർച്ച നടത്തി. വാണിജ്യ വാഹന നിർമ്മാണ മേഖലയിൽ വലിയ ചലനമുണ്ടാക്കിയ ഇവെകോയുടെ 89.42% ഓഹരികൾ 31,000 കോടി രൂപയ്ക്ക് ടാറ്റ മോട്ടോഴ്സ് ഏറ്റെടുത്തതിന് പിന്നാലെയാണ് ഈ കൂടിക്കാഴ്ച നടന്നതെന്നത് ഏറെ പ്രാധാന്യമർഹിക്കുന്നു.
ഇവെകോ ഗ്രൂപ്പിനെക്കൂടി ഭാഗമാക്കുന്നതോടെ, വാർഷിക വരുമാനത്തിന്റെ അടിസ്ഥാനത്തിൽ ലോകത്തെ നാലാമത്തെ വലിയ വാണിജ്യ വാഹന നിർമ്മാതാക്കളായി ടാറ്റ മോട്ടോഴ്സ് ഉയരും. ഏകദേശം 2.28 ലക്ഷം കോടി രൂപയാകും ഇതോടെ കമ്പനിയുടെ വിറ്റുവരവ്. 2008-ൽ ജാഗ്വർ ലാൻഡ് റോവറിനെ ഏറ്റെടുത്തതിന് ശേഷമുള്ള ടാറ്റാ മോട്ടോഴ്സിന്റെ ഏറ്റവും വലിയ രാജ്യാന്തര നീക്കമാണിത്. നിലവിൽ 16 നിർമ്മാണശാലകളും 22 ഗവേഷണ-വികസന കേന്ദ്രങ്ങളുമുള്ള ഇവെകോ ഗ്രൂപ്പിൽ 33,000-ത്തോളം തൊഴിലാളികളാണുള്ളത്.
ഇന്ത്യയും ഇറ്റലിയും തമ്മിലുള്ള സാമ്പത്തിക-വ്യാവസായിക സഹകരണം ശക്തമാക്കുന്നതിനെക്കുറിച്ച് ഇരുനേതാക്കളും ആശയവിനിമയം നടത്തി. ഇതിന്റെ ഭാഗമായി ടാറ്റാ മോട്ടോഴ്സ് ആസൂത്രണം ചെയ്യുന്ന പുതിയ പദ്ധതികളെക്കുറിച്ച് എൻ. ചന്ദ്രശേഖരൻ പ്രധാനമന്ത്രി മെലോനിയെ ധരിപ്പിച്ചു. വരും അഞ്ച് വർഷത്തിനുള്ളിൽ ഉൽപ്പാദന ശേഷി വർദ്ധിപ്പിക്കാനും വർഷത്തിൽ 6 ലക്ഷം വാഹനങ്ങൾ വിപണിയിലെത്തിക്കാനുമാണ് കമ്പനി ലക്ഷ്യമിടുന്നത്.
ഇവെകോയുടെയും ടാറ്റാ മോട്ടോഴ്സിന്റെയും ലയനം പൂർത്തിയാകുന്നതോടെ ആഗോളതലത്തിൽ 130 രാജ്യങ്ങളിലേക്ക് കമ്പനിയുടെ സേവനം വ്യാപിപ്പിക്കാൻ സാധിക്കും. ഇന്ത്യയ്ക്ക് പുറമേ യൂറോപ്പ്, ഏഷ്യ, ദക്ഷിണ അമേരിക്ക, മിഡിൽ ഈസ്റ്റ്, ആഫ്രിക്ക തുടങ്ങിയ ഭൂഖണ്ഡങ്ങളിലെ വിപണികളിലും ടാറ്റയുടെ ശക്തമായ സാന്നിധ്യം ഇതോടെ ഉറപ്പുവരുത്താനാകും.
