തിരുവനന്തപുരം: തോട്ടിലേക്ക് മറിഞ്ഞ ഓട്ടോയ്ക്കായി നടന്ന തെരച്ചിൽ; വിദ്യാധരന്റെ മൃതദേഹം കണ്ടെത്തി
മഴയത്ത് റോഡും തോടും തിരിച്ചറിയാനായില്ല; തോട്ടിലേക്ക് മറിഞ്ഞ ഓട്ടോറിക്ഷാ ഡ്രൈവറുടെ മൃതദേഹം കണ്ടെത്തി
തിരുവനന്തപുരം: വേറ്റിനാട് വെച്ച് ഓട്ടോറിക്ഷ തോട്ടിലേക്ക് മറിഞ്ഞ് ഒഴുക്കിൽപ്പെട്ട ഡ്രൈവറെ മരിച്ച നിലയിൽ കണ്ടെത്തി. കുറ്റിയാണി സ്വദേശിയായ വിദ്യാധരൻ (67) ആണ് ദാരുണമായി മരണപ്പെട്ടത്. കഴിഞ്ഞ മൂന്ന് ദിവസമായി നടത്തിവന്ന വിപുലമായ തെരച്ചിലിനൊടുവിൽ ഇന്നലെ രാവിലെയോടെയാണ് മൃതദേഹം കണ്ടെത്താനായത്. അപകടം നടന്ന സ്ഥലത്തുനിന്ന് ഏകദേശം 17 കിലോമീറ്റർ ദൂരെയുള്ള ആറ്റിങ്ങൽ മുദാക്കൽ കട്ടിയാട് പാലത്തിന് സമീപത്തെ കൈതക്കാടുകളിൽ നിന്നുമാണ് മൃതദേഹം ലഭിച്ചത്.
ഞായറാഴ്ച വൈകുന്നേരം ആറരയോടെ വേറ്റിനാട് കുറ്റിയാണി പാതയിലായിരുന്നു ഈ ദുരന്തം സംഭവിച്ചത്. വിവാഹ ചടങ്ങിൽ പങ്കെടുത്ത ശേഷം ഭാര്യയോടൊപ്പം ഓട്ടോയിൽ മടങ്ങവെയായിരുന്നു അപകടം. പേമാരിയിൽ റോഡും തോടും വേർതിരിച്ചറിയാൻ കഴിയാത്ത വിധം വെള്ളം കയറിയതാണ് ഓട്ടോറിക്ഷ തോട്ടിലേക്ക് മറിയാൻ കാരണമായത്. മുൻ വെമ്പായം പഞ്ചായത്ത് അംഗമായ ലതാകുമാരിയെ നാട്ടുകാർ ഉടൻ തന്നെ രക്ഷപ്പെടുത്തിയെങ്കിലും, ശക്തമായ അടിയൊഴുക്കിൽപ്പെട്ട് വിദ്യാധരനെ കാണാതാകുകയായിരുന്നു.
തുടർന്ന് ഫയർഫോഴ്സും പോലീസും സ്കൂബാ ടീമും നാട്ടുകാരും ഉൾപ്പെടെയുള്ളവർ സംയുക്തമായി തെരച്ചിൽ നടത്തിയെങ്കിലും ആദ്യ ദിവസങ്ങളിൽ ഫലമുണ്ടായിരുന്നില്ല. തുടർന്ന് കൂടുതൽ സ്കൂബാ ഡൈവർമാരെ ഉൾപ്പെടുത്തി തെരച്ചിൽ ദൗത്യം ശക്തമാക്കുകയായിരുന്നു. ഇൻക്വസ്റ്റ് നടപടികൾ പൂർത്തിയാക്കിയ ശേഷം മൃതദേഹം പോസ്റ്റ്‌മോർട്ടത്തിനായി തിരുവനന്തപുരം മെഡിക്കൽ കോളേജ് ആശുപത്രിയിലേക്ക് മാറ്റി.
