ബംഗാൾ ഉൾക്കടലിൽ ചുഴലിക്കാറ്റ് ഭീഷണി: കേരളത്തിൽ നാല് ദിവസം കനത്ത മഴയ്ക്ക് സാധ്യത
പത്തനംതിട്ട നഗരത്തിൽ നിന്നുള്ള കാഴ്ച (ഫോട്ടോ: വിപിൻ വേദഗിരി)
തിരുവനന്തപുരം: കഠിനമായ ഉഷ്ണത്തിന് വിട നൽകി സംസ്ഥാനത്ത് വീണ്ടും മഴ ശക്തമാകുന്നു. വരും ദിവസങ്ങളിൽ സംസ്ഥാനത്തെ വിവിധയിടങ്ങളിൽ കനത്ത മഴ പെയ്യുമെന്ന മുന്നറിയിപ്പിനെത്തുടർന്ന് നാല് ദിവസത്തേക്ക് വിവിധ ജില്ലകളിൽ യെല്ലോ അലർട്ട് പ്രഖ്യാപിച്ചിരിക്കുകയാണ്. 24 മണിക്കൂറിനുള്ളിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ മഴ ലഭിക്കാവുന്ന സാഹചര്യത്തെയാണ് കാലാവസ്ഥാ കേന്ദ്രം ‘ശക്തമായ മഴ’ എന്ന് വിശേഷിപ്പിക്കുന്നത്.
യെല്ലോ അലർട്ട്
01/11/2026: പത്തനംതിട്ട, കോട്ടയം, ഇടുക്കി
02/11/2026: ഇടുക്കി, പാലക്കാട്, മലപ്പുറം, വയനാട്
03/11/2026: കോഴിക്കോട്, വയനാട്, കണ്ണൂർ
04/11/2026: കണ്ണൂർ, കാസർകോട്
ബംഗാൾ ഉൾക്കടലിൽ പുതിയ ചുഴലിക്കാറ്റ് ഭീഷണി
തെക്കുകിഴക്കൻ ബംഗാൾ ഉൾക്കടൽ, ആൻഡമാൻ കടൽ, ആൻഡമാൻ-നിക്കോബാർ ദ്വീപ്‌സമൂഹം എന്നിവയ്ക്ക് മുകളിലായി നിലനിൽക്കുന്ന തീവ്രതയേറിയ ന്യൂനമർദം കൂടുതൽ കരുത്താർജ്ജിക്കുന്നതായി കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകുന്നു. വരുന്ന ആറ് മണിക്കൂറിനുള്ളിൽ ഇത് കൂടുതൽ തീവ്രമാകുമെന്നും, തൊട്ടടുത്ത 24 മണിക്കൂറിനുള്ളിൽ ചുഴലിക്കാറ്റായി രൂപാന്തരപ്പെടുമെന്നുമാണ് വിലയിരുത്തൽ.
പടിഞ്ഞാറ്, വടക്കുപടിഞ്ഞാറ് ദിശയിൽ സഞ്ചരിക്കുന്ന ഈ പ്രതിഭാസം നവംബർ രണ്ടാം തീയതി വൈകുന്നേരത്തോടെ ആന്ധ്രാതീരത്തോട് ചേർന്ന് മദ്ധ്യപടിഞ്ഞാറൻ ബംഗാൾ ഉൾക്കടലിൽ എത്താൻ സാധ്യതയുണ്ട്. അതിശക്തമായ അർണബ് ചുഴലിക്കാറ്റിന്റെ അവശിഷ്ടങ്ങൾ തെക്കുകിഴക്കൻ ഉത്തർപ്രദേശിന് മുകളിൽ ന്യൂനമർദമായും, തെക്കൻ മഹാരാഷ്ട്ര തീരത്ത് ചക്രവാതചുഴിയായും നിലനിൽക്കുന്നുണ്ട്.
തെക്കൻ കേരളം മുതൽ കർണാടക തീരം വരെയുള്ള തെക്കുകിഴക്കൻ അറബിക്കടലിൽ നിന്ന് തെക്കൻ മഹാരാഷ്ട്ര തീരത്തെ ഉയർന്ന ചക്രവാതചുഴിയിലേക്ക് ഒരു ന്യൂനമർദ്ദ പാത്തിയും രൂപപ്പെട്ടിരിക്കുന്നു. ഇവയുടെയെല്ലാം സ്വാധീനം മൂലം നവംബർ ഒന്ന് മുതൽ നാല് വരെ സംസ്ഥാനത്തെ പലയിടങ്ങളിലും ഇടിമിന്നലോട് കൂടിയ ശക്തമായ മഴയ്ക്കും മണിക്കൂറിൽ 30 മുതൽ 40 കിലോമീറ്റർ വരെ വേഗതയിൽ കാറ്റ് വീശാനും സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു.
RELATED TOPICS: KERALA WEATHER UPDATE, KERALA YELLOW ALERT, KERALA RAIN ALERT NOVEMBER 2026, KERALA MAZHA WARNING, KERALA WEATHER NEWS
