ലിറ്ററിന് വില പകുതിയായേക്കും; ഇന്ത്യയിൽ ഇനി E100 ഇന്ധനം അടിക്കാം, സാധാരണക്കാരന് നേട്ടമാകുന്നതെങ്ങനെ?

ക്രൂഡ് ഓയിൽ ലഭ്യതയിൽ വെല്ലുവിളികൾ നില നിൽക്കുന്ന സാഹചര്യത്തിൽ ബദൽ ഇന്ധനങ്ങളിലേക്ക് ഇന്ത്യയുടെ വിപ്ലവകരമായ ചുവടു വെയ്പ്. 100% എഥനോൾ ഇന്ധനത്തിന് കേന്ദ്ര സർക്കാർ അംഗീകാരം നൽകി. ഫ്ലെക്സ് ഫ്യുവൽ സാങ്കേതിക വിദ്യ ലഭ്യമായിരിക്കുന്ന വാഹനങ്ങളിൽ ഇനി മുതൽ E100 ഇന്ധനം ഉപയോഗിക്കാൻ അനുവാദമുണ്ടെന്ന് കേന്ദ്ര റോഡ്- ഗതാഗത മന്ത്രി നിതിൻ ഗഡ്കരി അറിയിച്ചു. E100 വരുന്നതു കൊണ്ട് സാധാരണക്കാർക്ക് എന്താണ് നേട്ടം എന്നതടക്കമുള്ള കാര്യങ്ങളാണ് ഇവിടെ വിശദമാക്കുന്നത്. കേന്ദ്ര സർക്കാർ പറയുന്നു…E100 രാജ്യത്ത് നടപ്പാക്കുന്നതുമായി ബന്ധപ്പെട്ട ഫയൽ ഒപ്പു വെച്ചതായി കേന്ദ്ര മന്ത്രി അറിയിച്ചു. പെട്രോളിൽ 20% എഥനോൾ ബ്ലെൻഡ് ചെയ്യുക എന്ന ലക്ഷ്യം (E20) ഇന്ത്യ ഇതിനോടകം നേടിക്കഴിഞ്ഞു. ഇത് ക്രൂഡ് ഓയിൽ ഇറക്കുമതിച്ചിലവ് കുറയ്ക്കാൻ സഹായിച്ചതായും, ഇത്തരത്തിൽ ഒരു ലക്ഷം കോടി രൂപയിലധികം ലാഭിക്കാൻ സാധിച്ചതായും കേന്ദ്ര സർക്കാർ പറയുന്നു. അടുത്ത രണ്ട് മാസത്തിനകം നിരവധി കമ്പനികൾ E100 ഉപയോഗിച്ച് പ്രവർത്തിക്കുന്ന വാഹനങ്ങൾ പുറത്തിറക്കുമെന്ന് ഗഡ്കരി പറഞ്ഞു. ഇന്ത്യയിലുടനീളം പ്രത്യേക പെട്രോൾ പമ്പുകളുടെ നിര തന്നെ ആരംഭിച്ചിട്ടുണ്ട്. 2027 വർഷത്തോടെ ഇവ 5000 ആയി വർധിക്കുമെന്നും അദ്ദേഹം അറിയിച്ചു. E20ൽ നിന്ന് E100ലേക്ക്ലളിതമായി പറഞ്ഞാൽ പെട്രോളിൽ 20% എഥനോൾ ബ്ലെൻഡ് ചെയ്യുന്നതാണ് E20 പെട്രോൾ. നിലവിൽ രാജ്യത്തെ പമ്പുകളിൽ E20 ലഭ്യമാക്കിയിരിക്കുന്നു. 100% എഥനോൾ ഇന്ധനമായി ഉപയോഗിക്കുന്നതാണ് E100 ഫ്യുവൽ.സാധാരണക്കാർക്ക് എങ്ങനെ നേട്ടമാകും?വില കുറവായിരിക്കും എന്നതാണ് ഒന്നാമത്തെ നേട്ടം. എഥനോൾ ഇന്ത്യയിൽത്തന്നെ വലിയ തോതിൽ ഉല്പാദിപ്പിക്കുന്നതിനാൽ എഥനോൾ അധിഷ്ഠിത ഇന്ധന വില പെട്രോളിനേക്കാൾ വളരെ കുറവായിരിക്കും. പ്രധാനമായും കരിമ്പ്, ചോളം, കേടു വന്ന ധാന്യങ്ങൾ എന്നിവയിൽ നിന്നാണ് എഥനോൾ ഉല്പാദിപ്പിക്കുന്നത്.അടുത്തിടെ ഇന്ത്യയിൽ അവതരിപ്പിച്ച E85 ഇന്ധനത്തിന് (85% എഥനോൾ ബ്ലെൻഡ് ചെയ്ത പെട്രോൾ) ലിറ്ററിന് 82 രൂപയായിരുന്നു വില. അതായത് സാധാരണ പെട്രോളിനേക്കാൾ ലിറ്ററിന് 20 രൂപയുടെ കുറവ്. എന്നാൽ ഇന്ധനക്ഷമത സാധാരണ പെട്രോളുമായി താരതമ്യപ്പെടുത്തുമ്പോൾ എഥനോൾ അധിഷ്ഠിത ഇന്ധനത്തിൽ കുറവായിരിക്കുമെന്ന് മറുവാദമുണ്ട്. പെട്രോളിനെ അപേക്ഷിച്ച് എഥനോളിന് ഊർജ്ജ സാന്ദ്രത കുറവായതിനാൽ മൈലേജ് 15% മുതൽ 20% വരെ കുറവായിരിക്കാൻ സാധ്യതയുണ്ട്. അതേ സമയം എഥനോൾ ബ്ലെൻഡ് ചെയ്ത ഫ്ലെക്സ് ഫ്യുവലിന്റെ വില പെട്രോളിനേക്കാൾ കുറവായതിനാൽ കിലോമീറ്റർ നിരക്കിൽ സാധാരണക്കാർക്ക് ലാഭം തന്നെയായിരിക്കും ഉണ്ടാവുക. മാത്രമല്ല, നിലവിൽ ഈ വിഷയത്തിൽ ഗവേഷണങ്ങളും, സാങ്കേതിക വിദ്യകളും വികാസം പ്രാപിക്കുകയാണ്. കൂടുതൽ കമ്പനികൾ എഥനോൾ അധിഷ്ഠിത വാഹനങ്ങൾ പുറത്തിറക്കുമ്പോഴേക്കും, വൈകാതെ ഈ പ്രശ്നത്തിന് പരിഹാരമുണ്ടായേക്കുമെന്നാണ് വിലയിരുത്തൽ. അതായത് സാധാരണ പെട്രോളിന്റെ ഇപ്പോഴത്തെ വിലയേക്കാൾ പകുതിയായി വരെ E100 ഇന്ധന വില കുറഞ്ഞേക്കുമെന്ന് കണക്കാക്കപ്പെടുന്നു.അന്താരാഷ്ട്ര വിപണിയിൽ ക്രൂഡ് ഓയിൽ വില ഉയർന്നാൽ അത് E100 ഇന്ധനത്തെ ബാധിക്കാൻ പോകുന്നില്ല എന്നതാണ് ഏറ്റവും വലിയ ആകർഷണം. ഇവിടെ, അടിക്കടിയുണ്ടാകുന്ന പെട്രോൾ വില വർധനയിൽ നിന്ന് സാധാരണക്കാരന് ആശ്വാസം ലഭിക്കും. ഉദാഹരണത്തിന് പശ്ചിമേഷ്യൻ യുദ്ധത്തെ തുടർന്ന് 2026 മെയ് മാസത്തിൽ മാത്രം ഇന്ത്യയിൽ നാല് തവണയാണ് ഇന്ധന വില വർധിച്ചത്ഭൗമ-രാഷ്ട്രീയ സംഘർഷങ്ങളുണ്ടാകുമ്പോൾ ആഗോള ക്രൂഡ് വില കയറുന്നത് പതിവാണ്. ഇവിടെ ഇത്തരം മാക്രോ ഇക്കണോമിക് ഘടകങ്ങൾ സാധാരണക്കാരുടെ പോക്കറ്റിനെ ബാധിക്കുകയില്ല എന്നതാണ് നേട്ടം.സാധാരണ പെട്രോളിനേക്കാൾ ഉയർന്ന ഒക്ടെയ്ൻ റേറ്റിങ് ഉള്ള ഇന്ധനമാണ് എഥനോൾ. ഇത് മികച്ച എൻജിൻ പ്രകടനം കാഴ്ച്ച വെക്കുന്നതിനും, കുറഞ്ഞ വാഹന മെയിന്റനൻസിനും സഹായകമാകുന്നു.ഇന്ത്യയുടെ നേട്ടങ്ങൾ വലിയ തോതിൽ ഇന്ധനം ഉപയോഗിക്കുന്ന ഒരു രാജ്യമാണ് ഇന്ത്യ. പുതിയ കണക്കുകൾ പ്രകാരം, ആഭ്യന്തര ആവശ്യത്തിനുള്ള ഇന്ധനത്തിന്റെ 88 ശതമാനത്തിലധികം ഇന്ത്യ ഇറക്കുമതി നടത്തുകയാണ്. ഇതര രാജ്യങ്ങളെ അമിതമായി ആശ്രയിക്കുന്നതിന് ഇത് കാരണമാകുന്നു. പൂർണമായും എഥനോളിലേക്ക് മാറുന്ന സാഹചര്യത്തിൽ ഈ ആശ്രിതത്ത്വം കുറയും. സർക്കാരിന് വലിയ തോതിൽ ഇറക്കുമതി ബിൽ ലാഭിക്കാൻ സാധിക്കും. വ്യാപാരക്കമ്മി കുറഞ്ഞു നിൽക്കും. പരിസ്ഥിതി മലിനീകരണം കുറയ്ക്കാമെന്നതും, കർഷകർക്ക് നേട്ടമുണ്ടാക്കാമെന്നതും, ഗ്രാമീണ മേഖലകളിൽ ലക്ഷക്കണക്കിന് തൊഴിലവസരങ്ങൾ സൃഷ്ടിക്കപ്പെടുമെന്നതും നേട്ടങ്ങളാണ്.ക്രൂഡ് വില വർധിക്കുന്നത് ഇന്ത്യയിൽ വിലക്കയറ്റത്തിനും ഇടയാക്കിയിരുന്നു. ഗതാഗതച്ചിലവ് ഉയരുന്നതാണ് ഇതിന് പിന്നിലെ പ്രധാന കാരണം. എന്നാൽ എഥനോൾ ‘രാജാവാകുന്നതോടെ’ ഈ പ്രശ്നത്തിനും പരിഹാരമാവുകയാണ്. മാത്രമല്ല രാജ്യത്തെ പണപ്പെരുപ്പ നിരക്കുകൾ കുറയ്ക്കാനും സാധിക്കും. വിപണിയിൽ കൂടുതൽ പണമെത്തുന്നത് തൊഴിൽ സൃഷ്ടിക്കും, ജീവിത നിലവാരം ഉയരുന്നതിനും കാരണമാകും. ചുരുക്കിപ്പറഞ്ഞാൽ, ഇന്ത്യൻ സമ്പദ് വ്യവസ്ഥയിൽ വിപ്ലവം സൃഷ്ടിക്കുന്ന ഒന്നാണ് എഥനോൾ എന്ന ഇന്ധനം.


Source link