കാർട്ടൂൺസ് സംരംഭത്തിന് തുടക്കം;   രാജ്യത്തെ ആദ്യ ഡിജിറ്റൽ ട്വിൻ സാങ്കേതികവിദ്യ  പരിചയപ്പെടുത്തി സെമിനാർ

തിരുവനന്തപുരം: കേരള കാർട്ടൂൺ അക്കാദമി യും ടൂൺസ് മീഡിയ ഗ്രൂപ്പും സംയുക്തമായി ആരംഭിച്ച കാർട്ടൂൺസ് (Kartoonz) സംരംഭം ഉന്നത വിദ്യാഭ്യാസ വകുപ്പ് പ്രിൻസിപ്പൽ സെക്രട്ടറി ബി. അശോക് ഉദ്ഘാടനം ചെയ്തു. കേരള കാർട്ടൂൺ അക്കാഡമി ചെയർമാൻ സുധീർ നാഥ്, സെക്രട്ടറി കെ. സതീഷ്, ടൂൺസ് അനിമേഷനിൽ നിന്ന് പി.കെ. വിജയകുമാർ, കാർത്തിക്ക് , വിനോദ് എന്നിവർ സംസാരിച്ചു.

പരിപാടിയുടെ ഭാഗമായി രാജ്യത്തിന്റെ വിവിധ ഭാഗങ്ങളിൽ നിന്നുള്ള പ്രമുഖ വിദഗ്ധരെ പങ്കെടുപ്പിച്ച് AVGC-XR (Animation, Visual Effects, Gaming, Comics & Extended Reality) മേഖലയെക്കുറിച്ചുള്ള വിപുലമായ സെമിനാർ സംഘടിപ്പിച്ചു. ടെക്നോപാർക്കിലെ ഫ്രണ്ട്സ് ഓഫ് ഫിഗ്മയുടെ ലീഡറും പ്രമുഖ UX അനലിസ്റ്റുമായ അരുൺ ശശി, വെബ്, മൊബൈൽ ആപ്ലിക്കേഷനുകളിലെ കമ്മ്യൂണിക്കേഷൻ ഡിസൈനെക്കുറിച്ചും, കേന്ദ്രസർക്കാർ സംരംഭമായ IICT മുംബൈയിലെ അജയ് ശ്രീനിവാസൻ ഗെയിം ഡിസൈൻ, AR/VR സാങ്കേതികവിദ്യകളെക്കുറിച്ചും, ഹൈദരാബാദിലെ വിമൻ ഇൻ ആനിമേഷനുമായി ബന്ധപ്പെട്ട പ്രമുഖ നേതാവായ മേഘന തിരുമൽസെട്ടി ആനിമേഷനിലെ VFX സാധ്യതകളെക്കുറിച്ചും ക്ലാസുകൾ നയിച്ചു.

സൃഷ്ടിപരമായ വ്യവസായങ്ങൾ ഇന്ന് സ്ഥിരതയുള്ളതും വാഗ്ദാനപൂർണ്ണവുമായ തൊഴിൽമേഖലയായി മാറിക്കൊണ്ടിരിക്കുകയാണെന്ന് ഡോ. അശോക് പറഞ്ഞു. കൃത്രിമ ബുദ്ധി സൃഷ്ടിപരതയെ സഹായിക്കാമെങ്കിലും മനുഷ്യന്റെ ഭാവനയെയും കലാപരമായ ചിന്തയെയും പകരംവയ്ക്കാൻ കഴിയില്ലെന്നും, ഈ മേഖലയിലെ വൻ സാധ്യതകളെ സർക്കാർ പിന്തുണയ്ക്കുന്നുണ്ടെന്നും അദ്ദേഹം വ്യക്തമാക്കി.

സെമിനാറിലെ പ്രധാന ആകർഷണമായി, അമേരിക്കൻ സ്ഥാപനമായ പ്രാക്സിസ് (Praxis), ബെംഗളൂരുവിലെ *റിസായ അക്കാദമിയുമായി (Risaya Academy) സഹകരിച്ച് വികസിപ്പിച്ച മനുഷ്യകേന്ദ്രിത ഡിജിറ്റൽ ട്വിൻ (Human-First Digital Twin) സാങ്കേതികവിദ്യ ഇന്ത്യയിൽ ആദ്യമായി തിരുവനന്തപുരത്ത് അവതരിപ്പിച്ചു. സൃഷ്ടിപരമായ വിദ്യാഭ്യാസ മേഖലക്കായി രൂപകൽപ്പന ചെയ്ത ഈ ഡിജിറ്റൽ ട്വിൻ സാങ്കേതികവിദ്യ, അധ്യാപകരെ പിന്തുണയ്ക്കുന്നതിനും “AI for Good” എന്ന ആശയം പ്രോത്സാഹിപ്പിക്കുന്നതിനുമായി രൂപപ്പെടുത്തിയതാണ്. ആഗോള നിലവാര മാനദണ്ഡങ്ങളുമായി താരതമ്യം ചെയ്ത് മനുഷ്യർ സൃഷ്ടിക്കുന്ന പ്രവർത്തനങ്ങളെ വിലയിരുത്താനും, സൃഷ്ടിപരമായ പ്രവർത്തനങ്ങൾക്ക് സഹായകമാകാനും ഈ സാങ്കേതികവിദ്യയ്ക്ക് കഴിയും.

അനിമേഷൻ, ഗെയിം ഡെവലപ്‌മെന്റ്, AR/VR തുടങ്ങിയ മേഖലകളിലെ പ്രൊഫഷണലുകൾക്കായി പുതിയ മാനദണ്ഡങ്ങൾ സൃഷ്ടിക്കാൻ ഈ നവീന ആശയത്തിന് സാധിക്കുമെന്നാണ് പ്രതീക്ഷ. കൂടാതെ, വിദ്യാർത്ഥികൾക്ക് 24 മണിക്കൂറും ഡിജിറ്റൽ രൂപത്തിലുള്ള അധ്യാപക സഹായം ലഭ്യമാക്കുന്നതിലൂടെ പഠനാനുഭവം കൂടുതൽ സൗകര്യപ്രദവും ഫലപ്രദവുമാക്കാനും ഇത് സഹായിക്കും.

സംസ്ഥാനത്തെ വിവിധ സ്കൂളുകളിലും കോളേജുകളിലുമുള്ള 144 ഡെലിഗേറ്റുകൾ സെമിനാറിൽ പങ്കെടുത്തു. ഓറഞ്ച് ഇക്കോണമിയിലുള്ള ദേശീയ-അന്തർദേശീയ അവസരങ്ങളെക്കുറിച്ച് അവർക്ക് വിശദമായ അവബോധം നൽകുകയും ചെയ്തു. തുടർന്ന് നടന്ന കരിയർ ഗൈഡൻസ് സെഷനിൽ, ടൂൺസ് മീഡിയ ഗ്രൂപ്പും റിസായ അക്കാദമിയും ചേർന്ന് ദയാനന്ദ സാഗർ സർവകലാശാല (ബെംഗളൂരു), സന്ദീപ് സർവകലാശാല (നാസിക്), നോർത്തേൺ അരിസോണ സർവകലാശാല (അമേരിക്ക), സ്റ്റുഡിയോ സ്ട്രീറ്റ് (ബെംഗളൂരു) എന്നിവ ഉൾപ്പെടെയുള്ള പ്രമുഖ വിദ്യാഭ്യാസ സ്ഥാപനങ്ങളുമായി തന്ത്രപ്രധാന പങ്കാളിത്തങ്ങൾ പ്രഖ്യാപിച്ചു.