കാന്‍വയില്‍ പിരിച്ചുവിടല്‍: 22 ശതമാനം ജീവനക്കാര്‍ക്ക് ആനുകൂല്യങ്ങളോടെ പടിയിറക്കം
പ്രമുഖ ഡിസൈൻ പ്ലാറ്റ്‌ഫോമായ കാൻവ തങ്ങളുടെ പ്രവർത്തനരീതിയിൽ വലിയ മാറ്റങ്ങൾ വരുത്താൻ ഒരുങ്ങുന്നു. ആഗോളതലത്തിലുള്ള മൊത്തം ജീവനക്കാരുടെ 22 ശതമാനത്തോളം വരുന്ന ഏകദേശം 1,271 പേരെ ഈ പുനഃസംഘടന നേരിട്ട് ബാധിക്കും. പതിമൂന്ന് വർഷത്തെ പ്രവർത്തന ചരിത്രത്തിൽ കമ്പനി എടുക്കുന്ന ഏറ്റവും വിഷമകരമായ തീരുമാനമാണിതെന്ന് സിഇഒ മെലാനി പെർകിൻസ് വ്യക്തമാക്കുന്നു. അതേസമയം, പിരിച്ചുവിടപ്പെടുന്നവർക്ക് ആശ്വാസമേകുന്ന വളരെ ഉദാരമായ സാമ്പത്തിക പാക്കേജും സഹായങ്ങളും കമ്പനി പ്രഖ്യാപിച്ചിട്ടുണ്ട്. ആറു മാസത്തെ ശമ്പളം, ഉപയോഗിച്ചിരുന്ന ആപ്പിൾ മാക്ബുക്ക് ലാപ്ടോപ്പുകൾ സ്വന്തമാക്കാനുള്ള അവസരം, ഒരു വർഷത്തെ ആരോഗ്യ ഇൻഷുറൻസ് പരിരക്ഷ എന്നിവ ഇതിൽ ഉൾപ്പെടുന്നു. കൂടാതെ, പുതിയ സംരംഭങ്ങൾ ആരംഭിക്കാൻ ആഗ്രഹിക്കുന്നവർക്ക് കാൻവ കളക്ടീവ് ഫണ്ടിൽ നിന്നും 10,000 ഡോളർ വീതം നൽകാനും കമ്പനി തീരുമാനിച്ചിട്ടുണ്ട്.
ഈ പുനഃസംഘടനയുടെ ഭാഗമായി പ്രൊഡക്റ്റ്, ഗ്രോത്ത്, പ്ലാറ്റ്‌ഫോം എന്നീ വിഭാഗങ്ങളെ ഏകീകരിച്ച് ഒറ്റ ടീമിന് കീഴിൽ കൊണ്ടുവരാനാണ് നീക്കം. മാനേജ്‌മെന്റ് തലത്തിലുള്ള എണ്ണം കുറയ്ക്കാനും ഒരേ സ്വഭാവമുള്ള ജോലികൾ സംയോജിപ്പിക്കാനും കമ്പനി തീരുമാനിച്ചിട്ടുണ്ട്. സിഡ്നിയെ കമ്പനിയുടെ പ്രധാന ഉൽപ്പാദന കേന്ദ്രമാക്കി മാറ്റാനും പദ്ധതിയുണ്ട്. 1,271 പേരെ പുനഃസംഘടന ബാധിക്കുമെങ്കിലും, ഇതിൽ കൃത്യമായി എത്രപേർക്കാണ് തൊഴിൽ നഷ്ടപ്പെടുക എന്ന കാര്യത്തിൽ വ്യക്തത വന്നിട്ടില്ല.
പിരിഞ്ഞുപോകുന്ന ജീവനക്കാരുടെ ഭാവി സുരക്ഷിതമാക്കാൻ കാൻവ മികച്ച മുൻകരുതലുകളാണ് എടുത്തിരിക്കുന്നത്. ഒരു വർഷത്തെ ലിങ്ക്ഡ്ഇൻ പ്രീമിയം സൗജന്യമായി ലഭിക്കുന്നതിന് പുറമെ, ഇന്റർവ്യൂ പരിശീലനം, റെസ്യൂമെ നിർമ്മാണം എന്നിവയ്ക്കും കമ്പനിയുടെ റിക്രൂട്ട്‌മെന്റ് ടീം പിന്തുണ നൽകും. കമ്പനിയിൽ ഒരു വർഷത്തിനുള്ളിൽ ജോയിൻ ചെയ്തവർക്ക് ഓഹരി ലഭിക്കാനുള്ള നിബന്ധനകളിൽ ഇളവ് നൽകാനും തീരുമാനമായി. മുൻ ജീവനക്കാരുടെ വിവരങ്ങൾ ഉൾപ്പെടുത്തി ഒരു ഓൺലൈൻ ഡയറക്ടറി തയ്യാറാക്കി നിക്ഷേപകർക്കും മറ്റ് സ്ഥാപനങ്ങൾക്കും നൽകുന്നതിലൂടെ അവർക്ക് പുതിയ ജോലി ലഭിക്കാൻ വഴിയൊരുക്കും.
കഴിഞ്ഞ പത്ത് വർഷത്തിനിടയിൽ ആദ്യമായി കമ്പനിയുടെ വളർച്ചാ നിരക്കിലുണ്ടായ കുറവാണ് ഈ കടുത്ത തീരുമാനത്തിലേക്ക് നയിച്ചത്. ആർട്ടിഫിഷ്യൽ ഇന്റലിജൻസ് (AI) ഉൾപ്പെടെയുള്ള നൂതന സാങ്കേതികവിദ്യകളിൽ കൂടുതൽ നിക്ഷേപം നടത്താനും പ്രവർത്തനങ്ങൾ കാര്യക്ഷമമാക്കാനുമാണ് കമ്പനിയുടെ തീരുമാനം. ഡിജിറ്റൽ രംഗത്തെ മാറ്റങ്ങൾക്കനുസരിച്ച് തങ്ങളുടെ ബിസിനസ് മോഡലിൽ മാറ്റം വരുത്തേണ്ടത് അനിവാര്യമാണെന്ന് സിഇഒ ചൂണ്ടിക്കാട്ടി. ജനുവരി മുതൽ ഹൈബ്രിഡ് രീതിയിലുള്ള ജോലി ക്രമീകരണങ്ങളിൽ മാറ്റം വരുത്താനും, ആഴ്ചയിൽ രണ്ടോ മൂന്നോ ദിവസങ്ങളിൽ ജീവനക്കാർ ഓഫീസിൽ നേരിട്ടെത്തി ജോലി ചെയ്യണമെന്നും കമ്പനി നിർദ്ദേശിച്ചിട്ടുണ്ട്. പ്രതിസന്ധിയിലായ ജീവനക്കാരോട് മെലാനി പെർകിൻസ് നേരിട്ട് ക്ഷമാപണം നടത്തുകയും ചെയ്തിട്ടുണ്ട്.
