സ്കൂൾ കുട്ടികളുമായി പോകുന്നതിനിടെ ഡ്രൈവർ ഹൃദയാഘാതം വന്ന് മരിച്ചു, പിന്നാലെ അപകടം, നാല് കുട്ടികൾക്ക് പരിക്ക്
അപകടത്തിൽപെട്ട ബസ്, മുരളീധരൻ നായർ
ആറ്റിങ്ങൽ: സ്കൂൾ ബസ് ഓടിക്കുന്നതിനിടെ ഡ്രൈവർ കുഴഞ്ഞ് വീണ് മരിച്ചു. നിയന്ത്രണം വിട്ട ബസ്സ് കടയിലേയ്ക്ക് ഇടിച്ചു കയറി നാല് കുട്ടികൾക്ക് പരിക്കേറ്റു. ചിറയിൻകീഴ് മുട്ടപ്പലം മാർക്കറ്റ് ജംഗ്ഷനിൽ വൈകിട്ട് 4.15 നായിരുന്നു സംഭവം. ആറ്റിങ്ങലിലെ മദർ ഇന്ത്യ ഇന്റർനാഷ്ണൽ പബ്ലിക് സ്കൂളിലെ ബസ് ഡ്രൈവർ ആറ്റിങ്ങൽ കൊടുമൺ വിജയാഭവനിൽ മുരളീധരൻ നായർ (60) ആണ് ഹൃദയാഘാതം സംഭവിച്ച് കുഴഞ്ഞുവീണത്. മുരളീധരനെ സമീപത്തെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
മുടപുരം ഭാഗത്ത് നിന്ന് മുട്ടപ്പലം വഴി അഴൂരിലേക്ക് കുട്ടികളുമായി വരികയായിരുന്നു സ്കൂൾബസ്. മുട്ടപ്പലം ജംഗ്ഷനിൽ എത്തിയതും ഡ്രൈവർ, സീറ്റിൽ നിന്ന് സൈഡിലേയ്ക്ക് കുഴഞ്ഞ് വീഴുകയായിരുന്നു. ബസിൽ ഉണ്ടായിരുന്ന സ്കൂൾ ജീവനക്കാരി നിലവിളിച്ച് ഡ്രൈവറുടെ അടുത്ത് എത്തിയെങ്കിലും ബസ്സ് ജംഗ്ഷനു നേരെയുളള അടഞ്ഞ കടയിലേയ്ക്ക് ഇടിച്ചു നിന്നു. ഇടിയുടെ ആഘാതത്തിലാണ് ബസ്സിൽ ഉണ്ടായിരുന്ന കുട്ടികൾക്ക് പരിക്കേറ്റത്.
വിദ്യാർത്ഥികളായ അൽഫൈസ്(12), അബൈദാസ് (13), ആദിഷ്(10) എന്നിവർക്കാണ് നിസാര പരിക്കേറ്റത്. അദീഷ് (12) എന്ന കുട്ടിക്ക് പല്ലിന് പരിക്കേറ്റു. ഇവരെ സമീപത്തെ സ്വകാര്യ ആശുപത്രിയിൽ പ്രവേശിപ്പിച്ച് പ്രാഥമിക ചികിൽസ നൽകി വിട്ടു. ഓടിക്കൂടിയ നാട്ടുകാരാണ് ഡ്രൈവറെയും കുട്ടികളെയും ആശുപത്രിയിൽ എത്തിച്ചത്. മൃതദേഹം ചിറയിൻകീഴ് താലൂക്ക് ആശുപത്രി മോർച്ചറിയിലേക്ക് മാറ്റി. മുരളിധരൻ നായറുടെ ഭാര്യ: പരേതയായ വിജയമ്മ. മക്കൾ : അജേഷ്, അജിത്ത്.
English Summary
A 60-year-old school bus driver died after suffering a heart attack while driving, causing the bus to lose control and crash into a shop. Four children sustained minor injuries in the accident, which occurred around 4:15 p.m. at Muttappalam Market Junction in Chirayinkeezhu. The deceased was Muraleedharan Nair, the driver of a school bus belonging to Mother India International Public School in Attingal.
