ഓണം വാരാഘോഷം, ടൂറിസം സാധ്യതകള് പരമാവധി പ്രയോജനപ്പെടുത്തും: മന്ത്രി പി സി വിഷ്ണുനാഥ്
ഓണം വാരാഘോഷവുമായി ബന്ധപ്പെട്ട് മുഖ്യമന്ത്രിയുടെ നേതൃത്വത്തില് വിളിച്ചു ചേര്ത്ത യോഗത്തില് നിന്ന് | ഫോട്ടോ: facebook.com/pcvishnunadh.in
തിരുവനന്തപുരം: ഓണത്തിന്റെ തനത് പാരമ്പര്യവും സംസ്കാരവും വിദേശ, ആഭ്യന്തര വിനോദസഞ്ചാരികള്ക്ക് മുന്നില് പൂര്ണ്ണമായി എത്തിക്കുന്ന രീതിയിലുള്ള അനുഭവമാക്കി ഇത്തവണത്തെ ഓണം വാരാഘോഷത്തെ മാറ്റുമെന്ന് ടൂറിസം സാംസ്കാരിക വകുപ്പ് മന്ത്രി പി.സി. വിഷ്ണുനാഥ്. വിനോദസഞ്ചാരികള്ക്ക് പൂക്കളമിടാനും ഓണക്കളികളില് പങ്കാളികളാകാനും സദ്യ ആസ്വദിക്കാനും അനുഷ്ഠാന കലാരൂപങ്ങള് കാണാനുമുള്ള അവസരം ഇതിലൂടെ ഉറപ്പാക്കുമെന്നും മന്ത്രി വ്യക്തമാക്കി.
ഇതിന്റെ ഭാഗമായി നിശാഗന്ധിയില് ഒരു മണിക്കൂര് സമയം പടയണി, തെയ്യം, തോല്പ്പാവക്കൂത്ത് തുടങ്ങിയ അനുഷ്ഠാനകലകള്ക്ക് വേണ്ടി മാത്രമായി മാറ്റിവയ്ക്കാനും മന്ത്രിയുടെ അധ്യക്ഷതയില് ചേര്ന്ന യോഗത്തില് തീരുമാനമായിട്ടുണ്ട്. കഴിഞ്ഞ വര്ഷങ്ങളില് പരിപാടികള് നടത്തിയ വേദികള് നിലനിര്ത്തിക്കൊണ്ടും പുതിയവ കൂട്ടിച്ചേര്ത്തും വിപുലമായി ആഘോഷങ്ങള് സംഘടിപ്പിക്കുന്ന കാര്യം സര്ക്കാരിന്റെ ആലോചനയിലുണ്ടെന്നും മന്ത്രി പറഞ്ഞു.
ഓണാഘോഷങ്ങള്ക്ക് ദേശീയതലത്തില് കൂടുതല് പ്രചാരണം നല്കുന്നതിന്റെ ഭാഗമായി തമിഴ്നാട്, കര്ണാടക, ആന്ധ്രപ്രദേശ് എന്നീ അയല്സംസ്ഥാനങ്ങളിലെ ടൂറിസം മന്ത്രിമാരെ കൊണ്ടുവരുന്ന കാര്യവും സര്ക്കാരിന്റെ പരിഗണനയിലുണ്ട്.
ഗസ്റ്റ് ഹൗസില് നടന്ന യോഗത്തില് എംഎല്എമാരായ എം വിന്സെന്റ്, ജി ആര് അനില്, വി ജോയി, മേയര് വി വി രാജേഷ്, ഡെപ്യൂട്ടി മേയര് ആശാനാഥ്, ജില്ലാ കളക്ടര് അനു കുമാരി, കമ്മീഷണര് അരുള് ആര് ബി കൃഷ്ണ, ടൂറിസം വകുപ്പ് ഡയറക്ടര് അഞ്ജന എം തുടങ്ങിയവര് പങ്കെടുത്തു.
Source link
NEWS
