BUSINESS
5000 രൂപ വരെ പോക്കറ്റിലിരിക്കും; പെട്രോള് അടിച്ചാല് പണം ഇങ്ങോട്ട്, അറിയാതെ പോകരുത് ഈ വഴികള്
Petrol Pump Tips: കുതിച്ചുയരുന്ന ഇന്ധനവിലയില് സാധാരണക്കാരന്റെ പോക്കറ്റ് ചോരുകയാണ്. ഇന്ധനവില വര്ധന പണപ്പെരുപ്പമായി പരോക്ഷമായും സാധാരണക്കാരെ വീഴ്ത്തുന്നു. ഇവിടെയാണ് സേവിംഗിന്റെ മഹത്വം. പെട്രോളും, ഡീസലും അടിക്കുമ്പോള് പണം തിരികെ നേടാന് ചില സ്മാര്ട്ട് വഴികളുണ്ട്. ചെറുതാണെങ്കിലും ഈ നേട്ടങ്ങള് ദീര്ഘകാലത്ത് സാധാരണക്കാര്ക്ക് വലിയ നേട്ടമാകും. ക്രെഡിറ്റ് കാര്ഡുകളും, മൊബൈല് ആപ്പുകളും കൃത്യമായി ഉപയോഗിക്കുകയാണ് നിങ്ങള് ചെയ്യേണ്ടത്. ഓരോ തവണ പെട്രോള് അടിക്കുമ്പോഴും, പണം തിരികെ അല്ലെങ്കില് ലാഭം നേടാന് സാധിക്കും. ബാങ്കുകളും, പെട്രോളിയം കമ്പനികളും നല്കുന്ന ചില ഓഫറുകള് നോക്കാം. കോ-ബ്രാന്ഡഡ് ഫ്യുവല് ക്രെഡിറ്റ് കാര്ഡുകള് (Co-branded Fuel Credit Cards)ബാങ്കുകളും, പെട്രോള് കമ്പനികളും (BPCL, HPCL, Indian Oil) ചേര്ന്ന് പുറത്തിറക്കുന്ന ക്രെഡിറ്റ് കാര്ഡുകളാണ് ഫ്യുവല് കാര്ഡുകള്. ഇന്ധനത്തില് ഏറ്റവും കൂടുതല് നേട്ടം നല്കുന്ന ഓപ്ഷനും ഇതുതന്നെ. ഇത്തരം കാര്ഡുകള് ഉപയോഗിക്കുമ്പോള് റിവാര്ഡ് പോയിന്റുകളായോ, ക്യാഷ്ബാക്ക് ആയോ പണം തിരികെ ലഭിക്കും. കൂടാതെ 1% ഫ്യുവല് സര്ചാര്ജ് ഇളവും ലഭിക്കും.ബിപിസിഎല് എസ്ബിഐ കാര്ഡ് ഒരു മികച്ച ഓപ്ഷന് ആണ്. ഈ കാര്ഡ് വഴി ഭാരത് പെട്രോളിയം പമ്പുകളില് നിന്ന് ഇന്ധനം അടിക്കുമ്പോള് 4.25% വരെ മൂല്യമുള്ള റിവാര്ഡ് പോയിന്റുകള് ലഭിക്കും. ഐസിഐസിഐ എച്ച്പിസിഎല് സൂപ്പര് സേവര് കാര്ഡ്, ഇന്ത്യന് ഓയില് എച്ച്ഡിഎഫ്സി കാര്ഡ് പോലുള്ള കാര്ഡുകളും 4% മുതല് 5% വരെ ലാഭം നല്കും. നിങ്ങള് മാസം 5,000 രൂപയ്ക്ക് പെട്രോള് അടിക്കുകയാണെങ്കില് ഏകദേശം 200- 250 രൂപ വരെ മൂല്യമുള്ള പോയിന്റുകള് നേടാന് സാധിക്കും. ഫ്യുവല് കമ്പനികളുടെ ലോയല്റ്റി ആപ്പുകള് (Loyalty Apps)പെട്രോള് പമ്പുകള് ഇന്ന് അവരുടെ ഔദ്യോഗിക ആപ്പുകള് വഴി വലിയ ഇളവുകള് നല്കുന്നുണ്ട്. സ്വന്തം മൊബൈല് ആപ്പുകള് വഴി പണമടയ്ക്കുകയോ, ക്യുആര് കോഡ് സ്കാന് ചെയ്യുകയോ ചെയ്താല് ഓരോ ലിറ്ററിനും പോയിന്റുകള് ലഭിക്കും. ഈ പോയിന്റുകള് പണത്തിന് തുല്യമാണ്. ഇവ വഴി പിന്നീട് ഇന്ധനം അടിക്കാം. ഇന്ത്യന് ഓയില് വണ് (IndianOil ONE) ആപ്പ് വഴി പെട്രോള് അടിക്കുമ്പോള് ലഭിക്കുന്ന ‘XTRAREWARDS’ പോയിന്റുകള് അടുത്ത തവണ പെട്രോള് അടിക്കാന് പണത്തിന് പകരം ഉപയോഗിക്കാം. എച്ച്പി പേ (HP Pay) അല്ലെങ്കില് ബിപിസിഎല് SmartDrive ആപ്പുകള് വഴിയും സമാന നേട്ടം ആസ്വദിക്കാം. മാസം 5,000 രൂപയ്ക്ക് പെട്രോള് അടിച്ചാല് ഏകദേശം 50 – 70 രൂപ വരെ ഇതിലൂടെ ലഭിക്കും. വാലറ്റുകളും യുപിഐ ഓഫറുകളും (Digital Wallets & UPI)Paytm, PhonePe, Amazon Pay, Google Pay തുടങ്ങിയ ആപ്പുകള് വഴിയും നിങ്ങള്ക്ക് ഇന്ധനം അടിക്കുമ്പോള് നേട്ടത്തിന് അവസരമുണ്ട്. പെട്രോള് പമ്പുകളില് നേരിട്ട് യുപിഐ വഴിയോ, വാലറ്റ് വഴിയോ പണമടയ്ക്കുമ്പോള് സ്ക്രാച്ച് കാര്ഡുകളും ക്യാഷ്ബാക്കുകളും ലഭിക്കുന്നതിനെ പറ്റിയാണ് പറഞ്ഞുവരുന്നത്. Amazon Pay പോലുള്ള ആപ്പുകള് ചില ദിവസങ്ങളില് പെട്രോള് പമ്പ് ഉപയോഗങ്ങള്ക്ക് 10 രൂപ മുതല് 50 രൂപ വരെ ഫ്ലാറ്റ് ക്യാഷ്ബാക്കുകള് നല്കാറുണ്ട്. ഓഫറുകള് മാറിക്കൊണ്ടിരിക്കുമെങ്കിലും, മാസത്തില് ശരാശരി 30- 50 രൂപ വരെ ഈ മാര്ഗത്തിലൂടെ നേടാം. ക്യാഷ്ബാക്ക് ഡെബിറ്റ് കാര്ഡുകള് (Cashback Debit Cards)ക്രെഡിറ്റ് കാര്ഡുകള് ഇല്ലാത്തവര് വിഷമിക്കേണ്ടതില്ല. ഡെബിറ്റ് കാര്ഡുകള് വഴിയും നേട്ടമുണ്ട്. സര്ക്കാരിന്റെ ഡിജിറ്റല് തന്ത്രത്തിന് നന്ദി പറയാം. പല ബാങ്കുകളുടെയും പ്രീമിയം അല്ലെങ്കില് ക്യാഷ്ബാക്ക് ഡെബിറ്റ് കാര്ഡുകള് ഇന്ധനം അടിക്കുന്നതിന് പോയിന്റുകള് നല്കുന്നുണ്ട്.HDFC Millennia Debit Card അല്ലെങ്കില് Axis Bank ഡെബിറ്റ് കാര്ഡുകള് ഉപയോഗിച്ച് പെട്രോള് അടിക്കുമ്പോള് നിശ്ചിത ശതമാനം ക്യാഷ്ബാക്ക് പോയിന്റുകള് നല്കിവരുന്നു. മാസം ഏകദേശം 40 – 65 രൂപ വരെ ഇങ്ങനെ ലാഭിക്കാന് സാധിക്കും. മാസം എത്ര രൂപ വരെ ലാഭിക്കാം?നിങ്ങള് മാസം 5,000 രൂപ ഇന്ധനത്തിനായി മാറ്റിവയ്ക്കുന്ന വ്യക്തിയാണോ? 5,000 എന്നു കേട്ട് ഞെട്ടേണ്ട. ഇന്നു വീടുകളില് ബൈക്കുകള്, സ്കൂട്ടറുകള്, കാറുകള് അങ്ങനെ ഒന്നിലധികം വാഹനങ്ങള് പതിവാണ്. അത്തരം ഒരു വ്യക്തിക്ക് ഈ മാര്ഗങ്ങള് മികച്ച രീതിയില് ഉപയോഗിച്ചാല് മാസം 500 രൂപ വരെ നേട്ടം നേടാന് സാധിക്കും. ഏറ്റവും കുറഞ്ഞ പക്ഷം 320- 350 രൂപ ലാഭിക്കാന് കഴിയും. എങ്ങനെയെന്ന് നോക്കാം; ഫ്യുവല് ക്രെഡിറ്റ് കാര്ഡ് (4.25% ലാഭം)- 210 രൂപ ലോയല്റ്റി ആപ്പുകള്- 60 രൂപ സര്ചാര്ജ് ഇളവ് (1% Surcharge Waiver)- 50 രൂപ ആകെ കോമ്പോ ലാഭം (മാസത്തില്)- 320- 350 രൂപമികച്ച നേട്ടത്തിനുള്ള തന്ത്രങ്ങള് ഏറ്റവും കൂടുതല് ലാഭം കിട്ടാന് ഫ്യുവല് ക്രെഡിറ്റ് കാര്ഡും, ലോയല്റ്റി ആപ്പും ഒന്നിച്ച് ഉപയോഗിക്കുന്നതാണ് നല്ലത്. ഉദാഹരണത്തിന് ഇന്ത്യന് ഓയില് പമ്പില് ചെന്ന് IndianOil ONE ആപ്പ് സ്കാന് ചെയ്ത ശേഷം, തുക കോ-ബ്രാന്ഡഡ് ക്രെഡിറ്റ് കാര്ഡ് വഴി നല്കിയാല് രണ്ട് വഴികളിലൂടെയും ഒരേസമയം ലാഭം കിട്ടും. അങ്ങനെ വര്ഷത്തില് 4,000- 5,000 രൂപയോളം സാധാരണക്കാരന് ലാഭിക്കാന് കഴിയുമെന്ന് വിദഗ്ധര് പറയുന്നു. (മുകളില് പറഞ്ഞ കാര്യങ്ങള് നിലവില് ലഭ്യമായ റിപ്പോര്ട്ടുകള് പ്രകാരമാണ്. നിങ്ങളുടെ യുക്തിക്ക് അനുസരിച്ച് സ്വീകരിക്കുക.)
Read News
