‘കളി മാറും’; ഇന്ത്യയ്ക്ക് ഹൈ വോൾട്ടേജ് ഫണ്ട് നൽകാൻ ജപ്പാൻ; പവർ സെക്ടറിന് 496 ദശലക്ഷം ഡോളറിന്റെ കരുത്ത്

ഇന്ത്യയുടെ ഊർജ്ജ സ്വപ്നങ്ങൾക്ക് കരുത്ത് പകർന്ന് ജാപ്പനീസ് ബാങ്കുകൾ. ഏകദേശം 496 ദശലക്ഷം ഡോളറിന് തുല്യമായ തുക ഫിനാൻസിങ്ങായി നൽകാൻ ജപ്പാനിലെ ഭീമൻ ബാങ്കുകൾ ഒരുങ്ങുകയാണ്. ഇന്ത്യയുടെ വർധിച്ചു വരുന്ന ഊർജ്ജാവശ്യങ്ങൾക്ക് ഇത് ഗുണകരമായി മാറുമെന്ന് വിലയിരുത്തപ്പെടുന്നു. ജപ്പാനിലെ ഭീമൻ ബാങ്കുകളായ Sumitomo Mitsui Banking Corporation (SMBC), Kansai Mirai Bank, പൊതുമേഖലാ ബാങ്കായ Japan Bank of International Cooperation (JBIC) എന്നിവ ഏകദേശം 80 ബില്യൺ ജാപ്പനീസ് യെൻ നൽകാൻ തയ്യാറായിരിക്കുന്നതായി നിക്കെയ് ഏഷ്യ റിപ്പോർട്ട് ചെയ്യുന്നു. നിലവിലെ വിനിമയ നിരക്കുകൾ പ്രകാരം ഇത് 496 ദശലക്ഷം ഡോളറുകൾക്ക് തുല്യമാണ്. ഇന്ത്യയിലെ പൊതുമേഖലാ കമ്പനിയായ പവർ ഗ്രിഡ് കോർപ്പറേഷൻ ഓഫ് ഇന്ത്യയ്ക്കാണ് ഇത്രയും ഭീമമായ തുക ‘സിൻഡിക്കേറ്റഡ് ഫിനാൻസിങ് ‘എന്ന നിലയിൽ ലഭിക്കുന്നത്. ഹൈ-വോൾട്ടേജ് ഡയറക്ട് കറന്റ്(HDVC) ട്രാൻസ്മിഷൻ പ്രൊജക്ടുമായി ബന്ധപ്പെട്ടാണിത്. ഈ പ്രൊജക്ട് 2029 വർഷത്തോടെ പ്രവർത്തനസജ്ജമാകുമെന്ന് ഇന്ത്യ കണക്കു കൂട്ടുന്നു. ഇതോടെ രാജ്യത്തെ പവർ ട്രാൻസ്മിഷൻ & ഡിസ്ട്രിബ്യൂഷൻ ശൃംഘലയുടെ ശേഷി പല മടങ്ങ് വർധിക്കും. രാജ്യത്ത് സ്ഥിരതയോടെ ഉയർന്നു വരുന്ന ഇലക്ട്രിസിറ്റി ഡിമാൻഡിന് ഒരു പരിധി വരെ ആശ്വാസം പകരാൻ ഈ പ്രൊജക്ടിന് സാധിക്കും. ഇന്ത്യയിലെ റിന്യൂവബിൾ എനർജി മേഖലയും വളർച്ചയുടെ പാതയിലാണ്. ഇത്തരത്തിൽ പരമ്പരാഗത-പാരമ്പര്യേതര ഊർജ്ജ മേഖലകൾ ശക്തിപ്പെടുന്നതോടെ ഇന്ത്യ എന്ന മഹാരാജ്യത്തിന്റെ ഊർജ്ജ മേഖല കരുത്തുറ്റതായി മാറും. പുതിയ ‘പവർ ഏഷ്യ’ (‘POWERR Asia’ -Partnership on Wide Energy and Resources Resilience Asia) പങ്കാളിത്തവുമായി ബന്ധപ്പെട്ട പ്രൊജക്ടാണിത്. ജാപ്പനീസ് പ്രധാനമന്ത്രി സനയ് തകയ്ച്ചി ഏപ്രിൽ മാസത്തിലാണ് ഈ പദ്ധതി പ്രഖ്യാപിക്കുന്നത്. മിഡിൽ ഈസ്റ്റ് യുദ്ധം അതിന്റെ ഉച്ചസ്ഥായിയിൽ നിൽക്കുന്ന, ഏഷ്യൻ രാജ്യങ്ങൾ ഇന്ധനത്തിനായി നെട്ടോട്ടമോടുന്ന സമയത്തായിരുന്നു ഇത്. ഇന്ത്യയിൽ, റിന്യൂവബിൾ എനർജി മേഖലയിൽ ബൂം ഉണ്ടായെങ്കിലും ഇലക്ട്രിസിറ്റി ഗ്രിഡ് വികസനം മന്ദഗതിയിലാണ് നടക്കുന്നതെന്ന് ക്ലീൻ എനർജി റിസർച്ച് സ്ഥാപനമായ തിങ്ക് ടാങ്കിന്റെ മെയ് റിപ്പോർട്ടിൽ പരാമർശമുണ്ടായിരുന്നു. അതേ സമയം പുതിയ പ്രൊജക്ട് നടപ്പാകുന്നതോടെ ഗ്രിഡ് അധിഷ്ഠിത പവർ ട്രാൻസ്മിഷനും കരുത്താർജ്ജിക്കുമെന്നാണ് വിദഗ്ധർ വിലയിരുത്തുന്നത്.


Source link