ഡോക്ടറെ ഭീഷണിപ്പെടുത്തി പണം തട്ടാൻ ശ്രമം: ഡിസിസി അംഗവും എകെജി സെന്റർ ആക്രമണക്കേസ് പ്രതിയും പിടിയിൽ

തിരുവനന്തപുരം∙ സ്വകാര്യ ആശുപത്രി ഉടമയായ ഡോക്ടറെ ഭീഷണിപ്പെടുത്തി പത്ത് ലക്ഷം രൂപ കൈക്കലാക്കാൻ ശ്രമിച്ച സംഭവത്തിൽ തിരുവനന്തപുരം ഡിസിസി അംഗം സുഹൈൽ ഷാജഹാൻ അറസ്റ്റിലായി. പേട്ട പൊലീസാണ് ഇയാളെ കസ്റ്റഡിയിലെടുത്തത്.
തന്റെ പരിധിയിലുള്ള സ്വകാര്യ ആശുപത്രിയുടെ പ്രവർത്തനം മോശമാണെന്ന് ആരോപിച്ച് സുഹൈൽ ഇതിന്റെ ദൃശ്യങ്ങൾ പകർത്തി സമൂഹമാധ്യമങ്ങളിൽ പ്രചരിപ്പിച്ചിരുന്നു. ഈ വിഡിയോ പിൻവലിക്കണമെങ്കിൽ പണം നൽകണമെന്ന് ആവശ്യപ്പെട്ടായിരുന്നു ഭീഷണി. എന്നാൽ, ആവശ്യപ്പെട്ട തുക നൽകാൻ കഴിയില്ലെന്ന് ഡോക്ടർ വ്യക്തമാക്കിയതോടെ ഭീഷണി കൂടുതൽ ശക്തമാക്കുകയായിരുന്നു. തുടർന്ന് പണം കൈമാറാൻ സാവകാശം തേടിയ ഡോക്ടർ ഈ വിവരം ഉടൻ തന്നെ പൊലീസിനെ അറിയിച്ചു.
പൊലീസിന്റെ കൃത്യമായ നിർദേശപ്രകാരം പണം വാങ്ങാനായി ആശുപത്രിയിലെത്തിയ സുഹൈലിനെ ഉദ്യോഗസ്ഥർ പിടികൂടുകയായിരുന്നു. മുൻപ് എകെജി സെന്ററിന് നേരെ നടന്ന ബോംബേറ് കേസിലും സുഹൈൽ ഷാജഹാൻ പ്രതിചേർക്കപ്പെട്ട് അറസ്റ്റിലായിരുന്നു.




