NEWS

വിഴിഞ്ഞം രാജ്യാന്തര തുറമുഖത്തിന്റെ ഉപഗ്രഹമായി കൊല്ലം തുറമുഖം; പുതിയ വികസന പാതയിൽ കൊല്ലം

കൊല്ലം ∙ വിഴിഞ്ഞം രാജ്യാന്തര തുറമുഖത്തിന്റെ അനുബന്ധ കേന്ദ്രമായി (സാറ്റലൈറ്റ് പോർട്ട്) കൊല്ലം തുറമുഖം മാറുന്നതോടെ വാണിജ്യ രംഗത്തും ചരക്ക് നീക്കത്തിലും വൻ കുതിച്ചുചാട്ടമുണ്ടാകുമെന്ന പ്രതീക്ഷയിലാണ് അധികൃതർ. ഇമിഗ്രേഷൻ സൗകര്യങ്ങൾ ഉണ്ടായിരുന്നിട്ടും കഴിഞ്ഞ ഒരു പതിറ്റാണ്ടായി കാര്യമായ വളർച്ചയില്ലാതെ കിടന്ന കൊല്ലം തുറമുഖം ഇനി കൂടുതൽ സജീവമാകുമെന്നാണു വിലയിരുത്തൽ. ഇത് പ്രാദേശിക സമ്പദ്‌വ്യവസ്ഥയ്ക്ക് വലിയൊരു ഉണർവേകും.

ചരക്കുകൾ വിഴിഞ്ഞത്തേക്ക് കൊണ്ടുപോകുന്നതിന് പകരം, ഇനി മുതൽ കൊല്ലം തുറമുഖത്ത് വെച്ചു തന്നെ കസ്റ്റംസ് പരിശോധന പൂർത്തിയാക്കി കണ്ടെയ്നറുകളിൽ നിറയ്ക്കാൻ സാധിക്കും. ഇറക്കുമതി ചെയ്യുന്ന കണ്ടെയ്നറുകൾ നേരിട്ട് കൊല്ലത്ത് ഇറക്കാനും സൗകര്യമുണ്ടാകും. ഇതിനാവശ്യമായ കസ്റ്റംസ് കസ്റ്റോഡിയൻഷിപ് ലൈസൻസ് പുതുക്കി ലഭിക്കുന്നതിനായുള്ള പ്രവർത്തനങ്ങൾ ഊർജിതമായി നടക്കുകയാണ്. നേരത്തെ ഉണ്ടായിരുന്ന ലൈസൻസിന്റെ കാലാവധി അവസാനിച്ച സാഹചര്യത്തിലാണിത്. കസ്റ്റംസ് ഓഫിസ് തുറമുഖത്തേക്ക് മാറ്റുന്നതിനുള്ള നടപടികളും സമാന്തരമായി നടക്കുന്നുണ്ട്. ലൈസൻസ് പുതുക്കുന്നതടക്കമുള്ള ജോലികൾ ഒരു മാസത്തിനുള്ളിൽ പൂർത്തിയാകുമെന്ന് പോർട്ട് ഓഫിസറുടെ ചുമതല വഹിക്കുന്ന ക്യാപ്റ്റൻ അശ്വനി പ്രതാപ് വ്യക്തമാക്കി. കണ്ടെയ്നറുകൾ സൂക്ഷിച്ചു വെക്കുന്നതിനായി ആവശ്യമായ ഗോഡൗൺ സൗകര്യങ്ങളും തുറമുഖത്ത് സജ്ജമാണ്.

കൊച്ചിയിലും തിരുവനന്തപുരത്തും ചേംബർ ഓഫ് കൊമേഴ്സ് ആൻഡ് ഇൻഡസ്ട്രിയുടെ നേതൃത്വത്തിൽ തുറമുഖം വഴിയുള്ള ചരക്കുനീക്കത്തിന് കാര്യക്ഷമമായ ഇടപെടലുകൾ നടക്കാറുണ്ട്. എന്നാൽ, കൊല്ലത്ത് അത്തരമൊരു സംവിധാനം നിലവിൽ പ്രവർത്തനക്ഷമമല്ല. വർഷങ്ങളായി കയറ്റുമതി-ഇറക്കുമതി വ്യാപാരികളെ ഉൾപ്പെടുത്തിയുള്ള യോഗങ്ങൾ പോലും ഇവിടെ ചേരാറില്ല എന്നത് വലിയൊരു പോരായ്മയായി തുടരുകയാണ്.

Fashion ⏭️

Back to top button