ഷുക്കൂർ വധക്കേസ്: ഗണേശൻ, ജയരാജൻ, രാജേഷ് എന്നിവരെ ഒഴിവാക്കിയതിലെ കോടതി നിരീക്ഷണങ്ങൾ

കൊച്ചി ∙ അരിയിൽ ഷുക്കൂർ വധക്കേസിൽ രണ്ടാം പ്രതി ഗണേശനെ കുറ്റവിമുക്തനാക്കിയ നടപടിയിൽ പ്രോസിക്യൂഷൻ കടുത്ത അതൃപ്തിയാണ് രേഖപ്പെടുത്തിയത്. ഒന്നാം പ്രതി കെ.വി. സുമേഷിനൊപ്പം ഗണേശനും കൊലപാതകത്തിൽ നേരിട്ട് പങ്കാളികളാണെന്ന് പ്രോസിക്യൂഷൻ ശക്തമായി വാദിച്ചെങ്കിലും, ആരോപണം തെളിയിക്കുന്നതിൽ അന്വേഷണ സംഘത്തിന് വീഴ്ച സംഭവിച്ചതായി കോടതി വിലയിരുത്തി.
കേസിലെ 32, 33 പ്രതികളായ പി. ജയരാജൻ, ടി.വി. രാജേഷ് എന്നിവർക്കെതിരെയുള്ള പ്രധാന ആരോപണം തളിപ്പറമ്പ് സഹകരണ ആശുപത്രിയിലെ 315-ാം നമ്പർ മുറിയിൽ വെച്ച് ഗൂഢാലോചനയിൽ പങ്കാളികളായി എന്നതാണ്. ഈ ഗൂഢാലോചനക്കുറ്റം തെളിയിക്കാൻ സിബിഐയ്ക്ക് സാധിച്ചില്ലെന്ന് സിബിഐ പ്രത്യേക കോടതി ജഡ്ജി പി. ശബരീനാഥൻ വ്യക്തമാക്കി. 360 പേജുള്ള വിധിന്യായത്തിൽ അന്വേഷണ ഏജൻസിയുടെ പോരായ്മകൾ കോടതി കൃത്യമായി എടുത്തുപറയുന്നുണ്ട്.
ഒന്നാം സാക്ഷിയായ സക്കറിയയെ കത്തികൊണ്ട് ആക്രമിച്ചതിനൊപ്പം അബ്ദുൾ ഷുക്കൂറിനെ വയറ്റിൽ കുത്തിപ്പരിക്കേൽപ്പിച്ചു എന്നതായിരുന്നു ഗണേശനെതിരായ മുഖ്യ കുറ്റം. എന്നാൽ, 2012 മെയ് 26-ന് അറസ്റ്റിലായ ഇയാളെ ജൂൺ രണ്ടിന് നടത്തിയ തിരിച്ചറിയൽ പരേഡിൽ സാക്ഷികൾക്ക് തിരിച്ചറിയാൻ സാധിച്ചിരുന്നില്ല. സംഭവം നടന്ന് നാല് മാസത്തിനുള്ളിൽ നടന്ന പരേഡിൽ സക്കറിയയും രണ്ടാം സാക്ഷിയായ അയൂബും പ്രതിയെ തിരിച്ചറിയുന്നതിൽ പരാജയപ്പെട്ടു. ഒരു അവസരം മാത്രം വിനിയോഗിച്ച സക്കറിയ, കൂടുതൽ റൗണ്ടുകൾ ആവശ്യമില്ലെന്ന് അന്ന് വ്യക്തമാക്കിയിരുന്നു. വിചാരണ വേളയിൽ ഭയം മൂലമാണ് തിരിച്ചറിയാൻ കഴിയാതിരുന്നതെന്ന് സക്കറിയ വാദിച്ചെങ്കിലും, ഇക്കാര്യം അന്വേഷണ ഉദ്യോഗസ്ഥർക്ക് മുമ്പിൽ ഒരിടത്തും പറഞ്ഞിട്ടില്ലെന്ന് കോടതി നിരീക്ഷിച്ചു.
കൂടാതെ, പി. ജയരാജനെയും ടി.വി. രാജേഷിനെയും വിട്ടയച്ചതിനുള്ള കാരണങ്ങളും വിധിയിൽ വ്യക്തമാണ്. ആശുപത്രിയിൽ വെച്ച് നടന്നുവെന്ന് പറയുന്ന ഗൂഢാലോചന തെളിയിക്കാൻ ഒരു മാധ്യമപ്രവർത്തകനെ മാത്രമാണ് 16-ാം സാക്ഷിയായി പ്രോസിക്യൂഷൻ ഹാജരാക്കിയത്. എന്നാൽ, പ്രതികൾ ആശുപത്രിയിൽ ഉണ്ടായിരുന്നതിനെക്കുറിച്ചോ അവിടെ ഗൂഢാലോചന നടന്നതിനെക്കുറിച്ചോ വ്യക്തമായ തെളിവുകൾ നൽകാൻ അദ്ദേഹത്തിന് സാധിച്ചില്ലെന്ന് കോടതി ചൂണ്ടിക്കാട്ടുന്നു.




