BUSINESS

ആസ്റ്റർ ഗ്രൂപ്പിന്റെ 4000 കോടി രൂപയുടെ നിക്ഷേപം: 500 കോടി ചെലവിൽ പുതിയ ആശുപത്രി ഉടൻ വരുന്നു

ഹൈദരാബാദിലെ കൊണ്ടാപ്പൂരിൽ 500 കോടി രൂപയുടെ മുതൽമുടക്കിൽ ആസ്റ്റർ ഡിഎം ക്വാളിറ്റി കെയർ ലിമിറ്റഡ് നിർമിക്കുന്ന അത്യാധുനിക മൾട്ടി സ്പെഷ്യൽറ്റി ആശുപത്രി 2027 മാർച്ചിൽ സേവനം ആരംഭിക്കും. 3 ലക്ഷം ചതുരശ്രയടി വിസ്താരത്തിൽ ഒരുങ്ങുന്ന ഈ ആശുപത്രിയിൽ 300 കിടക്കകളാണ് സജ്ജീകരിക്കുന്നത്. രാജ്യത്തുടനീളം 4000 കോടി രൂപയുടെ വികസന നിക്ഷേപങ്ങളാണ് ആസ്റ്റർ ലക്ഷ്യമിടുന്നത്.

അടുത്ത രണ്ട് വർഷത്തിനുള്ളിൽ 4000 മുതൽ 4400 വരെ കിടക്കകൾ പുതുതായി ഉൾപ്പെടുത്താൻ കമ്പനി പദ്ധതിയിടുന്നു. ഇതോടെ, ആസ്റ്റർ ഡിഎം ക്വാളിറ്റി കെയർ ഗ്രൂപ്പിന് കീഴിലുള്ള ആകെ കിടക്കകളുടെ എണ്ണം 15,000 പിന്നിടും. കൊണ്ടാപ്പൂരിലെ പുതിയ കേന്ദ്രം പ്രവർത്തനക്ഷമമാകുന്നതോടെ ഹൈദരാബാദിലെ ആസ്റ്ററിന്റെ ആശുപത്രി ശൃംഖല എട്ടെണ്ണമായി ഉയരും.

രാജ്യത്തെ ആരോഗ്യരംഗത്ത് ഉയർന്നുവരുന്ന ആവശ്യകതകൾ നിറവേറ്റുന്നതിനായി ആധുനിക ചികിത്സാ സൗകര്യങ്ങളിൽ തുടർച്ചയായ നിക്ഷേപം അനിവാര്യമാണെന്ന് ആസ്റ്റർ ഡിഎം ക്വാളിറ്റി കെയർ സ്ഥാപകനും എക്സിക്യൂട്ടീവ് ചെയർമാനുമായ ഡോ. ആസാദ് മൂപ്പൻ അഭിപ്രായപ്പെട്ടു. ആസ്റ്റർ ഡിഎം ഹെൽത്ത് കെയറും ക്വാളിറ്റി കെയർ ഇന്ത്യയും ലയിച്ച ശേഷം, വിവിധ ബ്രാൻഡുകളിലായി രാജ്യത്തെ 27 നഗരങ്ങളിൽ 38 ആശുപത്രികളാണ് നിലവിൽ ഈ ഗ്രൂപ്പിന്റെ കീഴിലുള്ളത്.

Travel ⏭️

Back to top button