75-ാം പിറന്നാളിൽ 75 പേർക്ക് വീട് സമ്മാനിച്ച് ടി.എസ്.പട്ടാഭിരാമൻ: സിൽക് മാൻ ഓഫ് ഇന്ത്യയുടെ ജീവകാരുണ്യ മാതൃകയിൽ തൃശൂർ
തൃശൂർ: കുടുംബബന്ധങ്ങളുടെ ഊഷ്മളതയും കഠിനാധ്വാനത്തിന്റെ കരുത്തും ഒത്തിണങ്ങിയ ജീവിതശൈലിയാണ് കല്യാൺ സിൽക്സ് ചെയർമാൻ ടി.എസ്. പട്ടാഭിരാമന്റേതെന്ന് മുഖ്യമന്ത്രി പിണറായി വിജയൻ അഭിപ്രായപ്പെട്ടു. തൃശൂർ ചേംബർ ഓഫ് കൊമേഴ്സും നഗരത്തിലെ പൗരാവലിയും ചേർന്ന് സംഘടിപ്പിച്ച പട്ടാഭിരാമന്റെ എഴുപത്തിയഞ്ചാം പിറന്നാൾ ആഘോഷം ഉദ്ഘാടനം ചെയ്യുകയായിരുന്നു അദ്ദേഹം.
ചെറിയൊരു തുടക്കത്തിൽ നിന്ന് വലിയൊരു വ്യവസായ സാമ്രാജ്യം കെട്ടിപ്പടുത്ത അദ്ദേഹത്തിന്റെ ജീവിതയാത്ര പുതുതലമുറയിലെ സംരംഭകർക്ക് വലിയൊരു പാഠപുസ്തകമാണ്. വെല്ലുവിളികളെ ധൈര്യപൂർവ്വം നേരിടാനും ആത്മവിശ്വാസത്തോടെ മുന്നേറാനും അദ്ദേഹത്തിന്റെ അനുഭവക്കുറിപ്പുകൾ വായനക്കാർക്ക് പ്രചോദനമേകുന്നു. ബിസിനസ് രംഗത്ത് കൈവരിച്ച തിളക്കമാർന്ന നേട്ടങ്ങളാണ് അദ്ദേഹത്തെ ‘സിൽക്ക് മാൻ ഓഫ് ഇന്ത്യ’ എന്ന വിശേഷണത്തിലേക്ക് എത്തിച്ചത്. മനോരമ ബുക്സ് പുറത്തിറക്കിയ അദ്ദേഹത്തിന്റെ ആത്മകഥയായ ‘പട്ടാഭിരാമം’ മുഖ്യമന്ത്രി ചടങ്ങിൽ പ്രകാശനം ചെയ്തു.
കല്യാൺ സിൽക്സ് ഗ്രൂപ്പിന്റെ നേതൃത്വത്തിൽ എഴുപത്തിയഞ്ച് കുടുംബങ്ങൾക്കായി നിർമ്മിച്ചു നൽകുന്ന വീടുകളുടെ പ്രഖ്യാപനം പ്രതിപക്ഷ നേതാവ് വി.ഡി. സതീശൻ നിർവഹിച്ചു. വിശാലമായ മനസ്സും നന്മ നിറഞ്ഞ വ്യക്തിത്വവുമാണ് പട്ടാഭിരാമന്റേതെന്ന് പ്രതിപക്ഷ നേതാവ് അനുസ്മരിച്ചു.
ചടങ്ങിൽ മന്ത്രി കെ. രാജൻ, എം.എൽ.എമാരായ പി. ബാലചന്ദ്രൻ, എ.സി. മൊയ്തീൻ, കെ.വി. അബ്ദുൾ ഖാദർ, സനീഷ് കുമാർ ജോസഫ്, മുരളി പെരുനെല്ലി, മേയർ എം.കെ. വർഗീസ്, കല്യാൺ ജ്വല്ലേഴ്‌സ് ചെയർമാൻ ടി.എസ്. കല്യാണരാമൻ, ആർച്ച് ബിഷപ് മാർ ആൻഡ്രൂസ് താഴത്ത്, ശ്രീരാമകൃഷ്ണ മഠം അധ്യക്ഷൻ സ്വാമി സദ്ഭാവനന്ദ, മുഹമ്മദ് ഫൈസി ഓണമ്പിള്ളി, ചേംബർ ഓഫ് കൊമേഴ്സ് സെക്രട്ടറി സോളി തോമസ്, കല്യാൺ സിൽക്സ് എം.ഡി. പ്രകാശ് പട്ടാഭിരാമൻ, വർധിനി പ്രകാശ്, മഹേഷ് പട്ടാഭിരാമൻ, മധുമതി മഹേഷ് എന്നിവർ പങ്കെടുത്തു.
