വിദേശ ജോലി വാഗ്ദാനം ചെയ്ത് ലക്ഷങ്ങൾ തട്ടി; വീസ തട്ടിപ്പിനിരയായ മലയാളി യുവാവ് ജീവനൊടുക്കി
കൊല്ലം ∙ അഞ്ചാലുംമൂട്ടിൽ പ്രവർത്തിക്കുന്ന എസ്ര ഗ്ലോബൽ ട്രാവൽസ് എന്ന ഏജൻസി മുഖേന വീസ തട്ടിപ്പിനിരയായ യുവാവ് ആത്മഹത്യ ചെയ്തു. ശക്തികുളങ്ങര തട്ടാന്തര ചെപ്പേവടക്കത്തിൽ ഗുരുദേവ നഗർ 47–എ സൈജു നിവാസിൽ താമസിക്കുന്ന സൈജു ഹെൻട്രി പീറ്റർ (39) ആണ് മരണപ്പെട്ടത്. വിഷം കഴിച്ച് അതീവ ഗുരുതരാവസ്ഥയിൽ ചികിത്സയിലായിരുന്ന ഇദ്ദേഹം ഇന്നലെ രാവിലെയോടെ മരണത്തിന് കീഴടങ്ങുകയായിരുന്നു.
തനിക്ക് വിദേശത്ത് ജോലി ലഭ്യമാക്കുന്നതിനായി അഞ്ചു ലക്ഷം രൂപയാണ് സൈജു എസ്ര ഗ്ലോബൽ ട്രാവൽസിന് കൈമാറിയിരുന്നത്. ഇതിനു പുറമെ വൻ സാമ്പത്തിക ബാധ്യതകളും അദ്ദേഹത്തിന് ഉണ്ടായിരുന്നതായി ശക്തികുളങ്ങര പൊലീസ് വ്യക്തമാക്കി. ഈ സംഭവത്തിൽ അസ്വാഭാവിക മരണത്തിന് കേസെടുത്തിട്ടുണ്ടെന്നും വിശദമായ അന്വേഷണം നടന്നുവരികയാണെന്നും പൊലീസ് അറിയിച്ചു. സംസ്കാര ചടങ്ങുകൾ നാളെ രാവിലെ 9.30-ന് ശക്തികുളങ്ങര സെന്റ് ജോൺ ഡി ബ്രിട്ടോ പള്ളിയിൽ വെച്ച് നടക്കും. ആൻസിയാണ് ഭാര്യ. ജെസിയ മേരി, ഈവ് മരിയ, യൊവാന മരിയ, അമീറ മറിയം എന്നിവർ മക്കളാണ്.
