ഗർഭസ്ഥശിശുവിന് അപൂർവ ശസ്ത്രക്രിയ: ഇന്ത്യയിൽ ആദ്യമായി ഗർഭപാത്രം തുറന്നുള്ള ചികിത്സ
ന്യൂഡൽഹി: ഗർഭപാത്രം തുറന്നുള്ള അപൂർവ ശസ്ത്രക്രിയയിലൂടെ, ഇരുപത്തിയഞ്ച് ആഴ്ച മാത്രം പ്രായമുള്ള ഗർഭസ്ഥശിശുവിന്റെ നട്ടെല്ലിലുണ്ടായിരുന്ന ഗുരുതര തകരാർ ഡൽഹി എയിംസിലെ വിദഗ്ധരായ ഡോക്ടർമാർ വിജയകരമായി പരിഹരിച്ചു. ഇന്ത്യയിൽ ആദ്യമായാണ് ഇത്തരമൊരു ‘ഓപ്പൺ ഫീറ്റൽ സർജറി’ (Open Fetal Surgery) നടക്കുന്നത് എന്നത് ഈ നേട്ടത്തിന്റെ തിളക്കം വർധിപ്പിക്കുന്നു. കേന്ദ്ര സർക്കാരിന്റെ ‘ജനനി ശിശു സുരക്ഷാ കാര്യക്രം’ വഴി തികച്ചും സൗജന്യമായാണ് ഈ സങ്കീർണ്ണമായ ശസ്ത്രക്രിയ പൂർത്തിയാക്കിയത്.
നട്ടെല്ലും സുഷുമ്ന നാഡിയും പൂർണ്ണമായി വികാസം പ്രാപിക്കാത്തതിനാൽ നട്ടെല്ലിന്റെ കീഴ്ഭാഗത്ത് ദ്രാവകം നിറഞ്ഞ സഞ്ചി പോലെ തള്ളിനിൽക്കുന്ന ‘ലംബോസാക്രൽ മയലോമെനിഞ്ചോസീൽ’ (Lumbosacral Myelomeningocele) എന്ന അവസ്ഥയാണ് കുഞ്ഞിൽ കണ്ടെത്തിയത്. ഈ തകരാറുമായി കുഞ്ഞ് ജനിക്കുകയാണെങ്കിൽ ആയുഷ്കാലം മുഴുവൻ നീണ്ടുനിൽക്കുന്ന വൈകല്യങ്ങൾക്ക് അത് കാരണമായേനെ. ഗർഭധാരണത്തിന് മുൻപും ഗർഭാവസ്ഥയുടെ ആദ്യ മാസങ്ങളിലും അമ്മയുടെ ശരീരത്തിൽ ഫോളിക് ആസിഡിന്റെ അളവ് ഗണ്യമായി കുറയുന്നതാണ് ഇത്തരം ജന്മവൈകല്യങ്ങൾക്ക് പ്രധാന കാരണമായി ആരോഗ്യവിദഗ്ധർ ചൂണ്ടിക്കാട്ടുന്നത്.
