ലോറൻസ് ബിഷ്ണോയി സംഘം: നാട്ടിൽ മാന്യനായി അഭിനയിച്ച ഗുരുമൂർത്തിയെ എൻഐഎയ്ക്ക് കൈമാറുന്നു
ഒറ്റപ്പാലം / തൃശൂർ ∙ കുപ്രസിദ്ധ ഗുണ്ടാത്തലവൻ ലോറൻസ് ബിഷ്ണോയിയുടെ സംഘവുമായി ഓൺലൈൻ വഴി ബന്ധം പുലർത്തിവന്നെന്നാരോപിച്ച് തൃശൂർ പോലീസ് കസ്റ്റഡിയിലെടുത്ത ഗുരുമൂർത്തിയെക്കുറിച്ച് നാട്ടുകാർക്ക് പറയാനുള്ളത് തികച്ചും വ്യത്യസ്തമായ കാര്യങ്ങളാണ്. വളരെ മാന്യമായി മാത്രം സംസാരിക്കുന്ന, സാമ്പത്തിക ഇടപാടുകളിൽ കൃത്യത പുലർത്തുന്ന വ്യക്തിയായാണ് ഇദ്ദേഹത്തെ എല്ലാവരും കണ്ടിരുന്നത്. യു.എ.പി.എ ചുമത്തി അറസ്റ്റ് ചെയ്യപ്പെട്ട ഗുരുമൂർത്തിയെ പരിചയമുള്ളവർക്കിടയിൽ നല്ല അഭിപ്രായമാണ് നിലനിൽക്കുന്നത്.
കഴിഞ്ഞ ഏഴു മാസമായി തൃക്കങ്ങോട്ടെ സ്ഥാപനത്തിൽ ജോലി ചെയ്ത് വരികയായിരുന്നു ഇദ്ദേഹം. ഇംഗ്ലീഷ് അടക്കമുള്ള ഭാഷകൾ കൈകാര്യം ചെയ്യാനുള്ള ഇയാളുടെ കഴിവ് നാട്ടുകാരിൽ അത്ഭുതമുണ്ടാക്കിയിരുന്നു. ജോലി ചെയ്തിരുന്ന കെട്ടിടത്തിന്റെ മുകൾനിലയിലായിരുന്നു ഇയാളും തമിഴ്നാട് സ്വദേശിയായ ഭാര്യയും താമസിച്ചിരുന്നത്. ഇവിടെനിന്നാണ് പോലീസ് ഇയാളെ പിടികൂടിയത്. ദീപാവലി ആഘോഷത്തിന് തൊട്ടുമുമ്പായി ഭാര്യ സ്വന്തം നാട്ടിലേക്ക് മടങ്ങിയിരുന്നു.
നവി മുംബൈയിൽ നിന്നും തമിഴ്നാട്ടിലെത്തിയ ശേഷമാണ് ഇദ്ദേഹം കേരളത്തിലേക്ക് കുടിയേറിയതെന്നാണ് പുറത്തുവരുന്ന വിവരം. ഇദ്ദേഹത്തിന്റെ തിരിച്ചറിയൽ രേഖകളിൽ കാണിച്ചിരിക്കുന്ന വിലാസം ഒരു അനാഥാലയം നടത്തുന്ന സൊസൈറ്റിയുടേതാണെന്ന് പോലീസ് സംശയിക്കുന്നു. തൃക്കങ്ങോട്ടെ സ്ഥാപനത്തിൽ എത്തുന്നതിന് മുമ്പായി വാണിയംകുളം, ഒറ്റപ്പാലം എന്നിവിടങ്ങളിലെ വിവിധ ഇടങ്ങളിൽ ഇദ്ദേഹം ജോലി ചെയ്തിരുന്നു. ഈ വർഷം മേയ് മാസത്തിലാണ് ഇദ്ദേഹം തൃക്കങ്ങോട്ടെ സ്ഥാപനത്തിൽ ജോലിക്കായി ചേർന്നത്.
