മെസി വിവാദം: മുൻമന്ത്രിയുടെ നടപടി ചട്ടലംഘനമെന്ന് റിപ്പോർട്ട്
തിരുവനന്തപുരം ∙ മാനദണ്ഡങ്ങൾ എല്ലാം കാറ്റിൽ പറത്തിക്കൊണ്ട് നടത്തിയ സ്പോൺസർ തിരഞ്ഞെടുപ്പും, സർക്കാർ സംവിധാനങ്ങളെ നോക്കുകുത്തികളാക്കി നടത്തിയ ഫയൽ നീക്കങ്ങളും ഒടുവിൽ വൻ വിവാദത്തിലേക്ക്. മുൻ കായികമന്ത്രി വി. അബ്ദുറഹിമാന്റെ നേതൃത്വത്തിൽ നടന്ന ചട്ടവിരുദ്ധമായ ഇടപെടലുകളും അഴിമതി നിറഞ്ഞ കരാറുകളും അക്കമിട്ടു നിരത്തുന്ന അന്വേഷണ റിപ്പോർട്ട് എഡിജിപി പി. വിജയന്റെ നേതൃത്വത്തിലുള്ള പ്രത്യേക സംഘം കഴിഞ്ഞ മാസം തുടക്കത്തിൽ ആഭ്യന്തര വകുപ്പിന് കൈമാറി.
അർജന്റീന ഫുട്ബോൾ ടീമിനെ കേരളത്തിൽ എത്തിക്കുമെന്ന വ്യാജേന 2024 ഡിസംബർ മുതൽ അന്നത്തെ കായിക വകുപ്പ് മന്ത്രിയും അദ്ദേഹത്തിന്റെ പേഴ്സണൽ സ്റ്റാഫും ഉന്നത ഉദ്യോഗസ്ഥരും സ്പോൺസറും ചേർന്ന് ആസൂത്രിതമായ ക്രിമിനൽ ഗൂഢാലോചന നടത്തിയെന്ന് എസ്ഐടി റിപ്പോർട്ടിൽ വെളിപ്പെടുത്തുന്നു. സെപ്റ്റംബർ മാസത്തിൽ മലപ്പുറത്ത് വെച്ച് അബ്ദുറഹിമാനെ മൂന്ന് മണിക്കൂറോളം നീണ്ട ചോദ്യം ചെയ്യലിന് വിധേയനാക്കിയിരുന്നു. ആ ഘട്ടത്തിൽ ലഭിച്ച നിർണായക വിവരങ്ങൾ കൂടി ക്രോഡീകരിച്ചാണ് പ്രാഥമിക റിപ്പോർട്ട് തയ്യാറാക്കിയിരിക്കുന്നത്.
മുൻ മന്ത്രിക്കെതിരെ എസ്ഐടി റിപ്പോർട്ടിൽ ഉയർത്തുന്ന പ്രധാന ആരോപണങ്ങൾ ഇവയാണ്:
അർജന്റീന ടീം കേരള സന്ദർശനത്തിന് താൽപ്പര്യം പ്രകടിപ്പിച്ചുവെന്ന് തെറ്റിദ്ധരിപ്പിച്ച് വ്യാജരേഖകൾ ചമച്ച് സർക്കാരിനെ വഞ്ചിച്ചു. സർക്കാർ തലത്തിൽ കൃത്യമായ കരാർ ഒപ്പിടുന്നതിന് മുൻപ് തന്നെ, പദ്ധതിയുടെ മറവിൽ വിദേശത്തേക്ക് പണം കൈമാറാൻ സ്പോൺസർക്ക് കേന്ദ്ര സർക്കാരിന്റെ അനുമതി നേടിക്കൊടുക്കുന്നതിൽ മന്ത്രി ഇടപെട്ടു. അർജന്റീന ഫുട്ബോൾ അസോസിയേഷനിൽ നിന്ന് ഔദ്യോഗിക സ്ഥിരീകരണം ലഭിക്കുന്നതിന് മുൻപേ തന്നെ ടീം വരുമെന്ന് പ്രഖ്യാപിച്ച് സർക്കാരിനെയും പൊതുജനങ്ങളെയും ഒരുപോലെ കബളിപ്പിക്കുകയായിരുന്നു.
