ഇഡ്ഡലി-ദോശ മടുത്തോ? മാവ് കുഴയ്ക്കേണ്ട, പത്ത് മിനിറ്റിൽ തയ്യാറാക്കാം ആരോഗ്യകരമായ പ്രഭാതഭക്ഷണം
പ്രതീകാത്മക ചിത്രം
ഓടിനടക്കുന്ന ജീവിതശൈലിക്കിടയിലും ആരോഗ്യപ്രദവും സ്വാദിഷ്ടവുമായ പ്രഭാതഭക്ഷണം ശീലമാക്കാൻ ആഗ്രഹിക്കുന്നവരാണ് നമ്മളിൽ പലരും. എന്നും കഴിക്കുന്ന ഇഡ്ഡലിയും ദോശയും വിരസത നൽകുന്നുണ്ടെങ്കിൽ, തീർച്ചയായും പരീക്ഷിച്ചുനോക്കാവുന്ന ഒന്നാണ് മുത്താറി അഥവാ റാഗി ഉപയോഗിച്ചുള്ള വിഭവങ്ങൾ. ഗുണമേന്മയുള്ള റാഗി വെർമിസിലി കൊണ്ട് തയ്യാറാക്കുന്ന ഉപ്പുമാവ് ആരോഗ്യകരമായൊരു പ്രഭാതഭക്ഷണത്തിന് മികച്ചൊരു തിരഞ്ഞെടുപ്പാണ്. ഒപ്പം പച്ചക്കറികൾ കൂടി ഉൾപ്പെടുത്തുന്നത് ഭക്ഷണത്തിന്റെ രുചിയും പോഷകമൂല്യവും ഒരുപോലെ ഉയർത്താൻ സഹായിക്കുന്നു.
ശരീരത്തിന് ആവശ്യമായ കാൽസ്യവും നാരുകളും ധാരാളമായി അടങ്ങിയ ഒന്നാണ് റാഗി. സാധാരണ വെർമിസിലിക്ക് പകരമായി റാഗി വെർമിസിലി തിരഞ്ഞെടുക്കുന്നത് ഭക്ഷണക്രമത്തിൽ പുതിയൊരു മാറ്റം കൊണ്ടുവരാനും പോഷകങ്ങൾ കൃത്യമായി ലഭിക്കാനും വഴിയൊരുക്കുന്നു.
ആവശ്യമായ ചേരുവകൾ
റാഗി വെർമിസിലി – ഒരു കപ്പ്
സവാള – ഒരെണ്ണം (പൊടിയായി അരിഞ്ഞത്)
കാരറ്റ് – ഒന്ന്
ബീൻസ് – അഞ്ചെണ്ണം
പച്ചമുളക് – രണ്ട്
ഇഞ്ചി – ചെറിയൊരു കഷണം
കടുക് – അര ടീസ്പൂൺ
ഉഴുന്നുപരിപ്പ് – ഒരു ടീസ്പൂൺ
കറിവേപ്പില – പാകത്തിന്
നിലക്കടല – രണ്ട് ടേബിൾസ്പൂൺ
എണ്ണ – ഒരു ടേബിൾസ്പൂൺ
ഉപ്പ് – ആവശ്യത്തിന്
വെള്ളം – പാകത്തിന്
തയ്യാറാക്കുന്ന വിധം
ആദ്യമായി റാഗി വെർമിസിലി വേവിച്ചെടുക്കണം. ഉപയോഗിക്കുന്ന പാക്കറ്റിലെ നിർദ്ദേശങ്ങൾക്കനുസരിച്ച് ആവിയിലോ തിളച്ച വെള്ളത്തിലോ വേവിക്കാവുന്നതാണ്. എന്നാൽ വെർമിസിലി കുഴഞ്ഞുപോകാതെ പാകത്തിന് വേകാൻ പ്രത്യേകം ശ്രദ്ധിക്കണം. വെന്തുകഴിഞ്ഞാൽ വെള്ളം വാർത്തു കളഞ്ഞ് മാറ്റിവെക്കുക.
അടുപ്പത്ത് പാനുവെച്ച് എണ്ണ ചൂടാകുമ്പോൾ കടുകും ഉഴുന്നുപരിപ്പും ചേർത്ത് പൊട്ടിക്കുക. ഇതിലേക്ക് നിലക്കടലയും കറിവേപ്പിലയും ചേർത്ത് മൂപ്പിക്കുക. തുടർന്ന് അരിഞ്ഞുവെച്ച സവാള, പച്ചമുളക്, ഇഞ്ചി എന്നിവ ചേർത്ത് നന്നായി വഴറ്റണം. ഇതിലേക്ക് കാരറ്റും ബീൻസും ചേർത്ത് ഇളക്കുക. പച്ചക്കറികൾ വേകാൻ ആവശ്യമായ ഉപ്പും അല്പം വെള്ളവും ചേർത്ത് അടച്ചുവെച്ച് വേവിക്കുക. പച്ചക്കറികൾ അധികം വെന്തുടഞ്ഞു പോകാതിരിക്കാൻ ശ്രദ്ധിക്കണം.
പച്ചക്കറികൾ പാകത്തിന് വെന്തുവരുമ്പോൾ, നേരത്തെ വേവിച്ചുവെച്ച റാഗി വെർമിസിലി ഇതിലേക്ക് ചേർത്ത് നന്നായി ഇളക്കി യോജിപ്പിക്കുക. വെർമിസിലി പൊടിയാത്ത രീതിയിൽ സാവധാനം വേണം ഇളക്കാൻ. ഏകദേശം രണ്ടു മുതൽ മൂന്നു മിനിറ്റ് വരെ ചെറിയ തീയിൽ അടച്ചുവെച്ച് വെന്തശേഷം തീ ഓഫ് ചെയ്യാം. അവസാനമായി അല്പം മല്ലിയില വിതറി അലങ്കരിച്ച് വിളമ്പാം.
