മാരത്തണിനിടെ കുഴഞ്ഞുവീണ വിദ്യാർഥിനി റേച്ചലിന്റെ മരണം റാബ്ഡോമയോളിസിസ് മൂലമെന്ന് സ്ഥിരീകരണം
ന്യൂയോർക്ക് സിറ്റി മാരത്തണിന്റെ ഫിനിഷിങ് ലൈനിന് തൊട്ടുമുമ്പ് കുഴഞ്ഞുവീണ ഇരുപത്തിനാലുകാരിയായ യുവതി മരണത്തിന് കീഴടങ്ങി. കോളജ് തലത്തിൽ ഹോക്കി താരമായിരുന്ന റേച്ചൽ ആപയാണ് ദാരുണമായി മരണപ്പെട്ടത്. അടിയന്തരമായി ആശുപത്രിയിൽ എത്തിച്ച് വിദഗ്ധ ചികിത്സ നൽകിയെങ്കിലും ജീവൻ രക്ഷിക്കാൻ സാധിച്ചില്ല.
ഞായറാഴ്ച ഉച്ചയ്ക്ക് ഒന്നരയോടെ മാൻഹട്ടനിലെ സെൻട്രൽ പാർക്കിൽ വെച്ചാണ് റേച്ചൽ തളർന്നുവീണത്. ഈ സമയം അവിടെയുണ്ടായിരുന്ന സോഷ്യൽ വർക്കറായ മൈക്കേല നിക്കോളസ് ഉടൻ തന്നെ സഹായവുമായി ഓടിയെത്തി. റേച്ചലിന്റെ ആരോഗ്യനില ഗുരുതരമാണെന്ന് തിരിച്ചറിഞ്ഞതോടെ, സമീപത്തുണ്ടായിരുന്ന രണ്ട് ഡോക്ടർമാർ മാറിമാറി സിപിആർ നൽകി രക്ഷപ്പെടുത്താൻ ശ്രമിച്ചു. തൊട്ടുപിന്നാലെ മാരത്തൺ മെഡിക്കൽ സംഘം അത്യാധുനിക ഉപകരണങ്ങളുമായി (ഡിഫിബ്രിലേറ്റർ) സ്ഥലത്തെത്തി പ്രാഥമിക ശുശ്രൂഷ നൽകി. തുടർന്ന് പാരാമെഡിക്കൽ സംഘം ആംബുലൻസിൽ മൗണ്ട് സിനായ് മെഡിക്കൽ സെന്ററിലേക്ക് മാറ്റുകയായിരുന്നു.
ഏകദേശം ആറു മണിക്കൂർ നീണ്ട തീവ്രപരിചരണത്തിന് ശേഷവും യുവതിയുടെ ജീവൻ നിലനിർത്താനായില്ല. രാത്രി ഒമ്പതരയോടെ മരണം സംഭവിച്ചതായി റേച്ചലിന്റെ പിതാവാണ് ഔദ്യോഗികമായി അറിയിച്ചത്. 2024-ന് ശേഷം ന്യൂയോർക്ക് സിറ്റി മാരത്തണിൽ മരണം സംഭവിക്കുന്ന ആദ്യത്തെ വ്യക്തിയാണ് റേച്ചൽ എന്ന് സംഘാടക സമിതി വ്യക്തമാക്കി. നേരത്തെ, 2007-ൽ സെൻട്രൽ പാർക്കിൽ നടന്ന ഒളിംപിക് മാരത്തൺ ട്രയൽസിനിടെ യുഎസ് ദേശീയ ചാമ്പ്യനായിരുന്ന റയാൻ ഷേയും സമാനമായ രീതിയിൽ മരണപ്പെട്ടിരുന്നു. പ്രസ്തുത മാരത്തണിന് മുന്നോടിയായി ന്യൂയോർക്ക് റോഡ് റണ്ണേഴ്സ് സംഘടിപ്പിച്ച പരിപാടിക്കിടെയായിരുന്നു ആ ദുരന്തം നടന്നത്.
