BUSINESS
ടാങ്കുകളോ യുദ്ധവിമാനങ്ങളോ ഇല്ലാതെ യൂറോപ്പിലേക്ക് 7,000 കോടിയുടെ വെടിക്കോപ്പുകള്‍ വിറ്റ് ഇന്ത്യ: പ്രതിരോധ കയറ്റുമതിയില്‍ 1600% വളര്‍ച്ച
Ukraine War India Benefits: റഷ്യ- യുക്രൈന്‍ യുദ്ധത്തെ തുടര്‍ന്ന് യൂറോപ്പില്‍ രൂക്ഷമായ വെടിക്കോപ്പ് ക്ഷാമം മുതലെടുത്ത്, യുദ്ധവിമാനങ്ങളോ ടാങ്കുകളോ ഇല്ലാതെ വെറും ആര്‍ട്ടിലറി ഷെല്ലുകളും സ്‌ഫോടകവസ്തുക്കളും മാത്രം വിറ്റ് ഇന്ത്യ നേടിയത് 1,600% അസാധാരണ കയറ്റുമതി വളര്‍ച്ച. യുദ്ധത്തിന് മുമ്പ് വെറും 49.2 ദശലക്ഷം ഡോളറായിരുന്ന യൂറോപ്പിലേക്കുള്ള പ്രതിരോധ കയറ്റുമതി, ചുരുങ്ങിയ വര്‍ഷങ്ങള്‍ക്കുള്ളില്‍ 872 ദശലക്ഷം ഡോളറിലേക്ക് (7,000 കോടിയിലധികം) കുതിച്ചുയര്‍ന്നു. കിഴക്കന്‍- മധ്യ യൂറോപ്പിലെ രണ്ടാമത്തെ വലിയ വിതരണക്കാരായി ഇന്ത്യ മാറി. ആത്മനിര്‍ഭര്‍ ഭാരത് ലക്ഷ്യങ്ങള്‍ക്ക് കരുത്തുപകരുന്ന ഈ നേട്ടം ഇന്ത്യന്‍ പ്രതിരോധ മേഖലയ്ക്ക് വലിയ പ്രതീക്ഷയാണ് നല്‍കുന്നത്.ടാങ്കുകളും മിസൈലുകളുമില്ലാതെ 1600% കയറ്റുമതി വളര്‍ച്ചറഷ്യ- യുക്രൈന്‍ യുദ്ധത്തിന് ശേഷം യൂറോപ്പില്‍ ആയുധങ്ങളുടെയും വെടിക്കോപ്പുകളുടെയും ആവശ്യകത വലിയ രീതിയില്‍ വര്‍ധിച്ചു. ഈ സാഹചര്യമാണ് ഇന്ത്യന്‍ പ്രതിരോധ കമ്പനികള്‍ക്ക് വലിയൊരു ബിസിനസ് അവസരമായി മാറിയത്. യുദ്ധത്തിന് മുമ്പുള്ള നാല് വര്‍ഷങ്ങളെ അപേക്ഷിച്ച് യൂറോപ്പിലേക്കുള്ള ഇന്ത്യയുടെ കയറ്റുമതിയില്‍ 1600 ശതമാനത്തിലധികം വര്‍ധനയാണു രേഖപ്പെടുത്തിയിരിക്കുന്നത്.യുദ്ധം ആരംഭിക്കുന്നതിന് മുമ്പ് യൂറോപ്പിലേക്കുള്ള ആയുധ കയറ്റുമതി വെറും 49.2 ദശലക്ഷം ഡോളര്‍ ആയിരുന്നു. എന്നാല്‍ യുദ്ധം തുടങ്ങിയതിന് ശേഷം ഇത് കുറഞ്ഞത് 872 ദശലക്ഷം ഡോളറായി അഥവാ 7,000 കോടിയിലധികം രൂപയായി കുതിച്ചുയര്‍ന്നു.ഇന്ത്യ പ്രധാനമായും കയറ്റുമതി ചെയ്യുന്നത് എന്തൊക്കെഇന്ത്യ യുദ്ധവിമാനങ്ങളോ, ടാങ്കുകളോ മിസൈലുകളോ യൂറോപ്പിലേക്ക് വില്‍ക്കുന്നില്ല. പകരം ആര്‍ട്ടിലറി ഷെല്ലുകള്‍ (ഉദാഹരണത്തിന് 155mm ഷെല്ലുകള്‍), മോര്‍ട്ടാര്‍ ഷെല്ലുകള്‍, സ്‌ഫോടക വസ്തുക്കള്‍, മറ്റ് വെടിക്കോപ്പുകള്‍ (ammunition materials) എന്നിവയാണ് പ്രധാനമായും കയറ്റുമതി ചെയ്യുന്നത്.ആര്‍ക്കൊക്കെയാണ് വിതരണം ചെയ്യുന്നത്ഇന്ത്യയുടെ കയറ്റുമതിയുടെ മുക്കാല്‍ ഭാഗവും കിഴക്കന്‍, മധ്യ യൂറോപ്പിലെ 13 രാജ്യങ്ങളിലേക്കാണ്്. ഈ രാജ്യങ്ങളാണ് യുക്രൈനിന് പ്രധാനമായും ആയുധങ്ങള്‍ വിതരണം ചെയ്യുന്നത്. ഷെല്ലുകള്‍, മോര്‍ട്ടാറുകള്‍, സ്‌ഫോടകവസ്തുക്കള്‍ എന്നിവ ഈ രാജ്യങ്ങള്‍ക്ക് നല്‍കുന്നതില്‍ ഇന്ത്യ ഇപ്പോള്‍ ദക്ഷിണ കൊറിയയ്ക്ക് പിന്നില്‍ ആഗോളതലത്തില്‍ രണ്ടാം സ്ഥാനത്താണ്. നാല് വര്‍ഷം മുമ്പ് ഇന്ത്യ ഈ പട്ടികയില്‍ 28-ാം സ്ഥാനത്തായിരുന്നു.അമേരിക്കന്‍ കമ്പനിയായ റെഗുലസ് ഗ്ലോബല്‍ (Regulus Global LLC) വഴി യുക്രൈനിലെ സര്‍ക്കാര്‍ കമ്പനിയായ സ്‌പെറ്റ്‌സ്‌ടെക്‌നോഎക്‌സ്‌പോര്‍ട്ടിലേക്ക് (SpetsTechnoExport) ഇന്ത്യന്‍ നിര്‍മ്മിത ആയുധങ്ങള്‍ എത്തിയതായി യുക്രൈന്‍ കസ്റ്റംസ് രേഖകളും വ്യക്തമാക്കുന്നതായി റിപ്പോര്‍ട്ടുണ്ട്.ഇന്ത്യയ്ക്കും ഇന്ത്യന്‍ കമ്പനികള്‍ക്കുമുള്ള നേട്ടങ്ങള്‍മാര്‍ച്ചില്‍ അവസാനിച്ച സാമ്പത്തിക വര്‍ഷത്തില്‍ ഇന്ത്യയുടെ മൊത്തം പ്രതിരോധ കയറ്റുമതി 63% വര്‍ദ്ധിച്ച് 4 ബില്യണ്‍ ഡോളറായി. ഈ സംഖ്യ 2023 -ലെ കയറ്റുമതി ലക്ഷ്യത്തേക്കാള്‍ ഇരട്ടിയും, ഒരു ദശാബ്ദം മുമ്പുള്ള ലക്ഷ്യത്തിന്റെ 25 മടങ്ങുമാണ്.മുനിഷന്‍സ് ഇന്ത്യ ലിമിറ്റഡ് (Munitions India Ltd) പോലുള്ള സര്‍ക്കാര്‍ ഉടമസ്ഥതയിലുള്ള പ്രതിരോധ കമ്പനികള്‍ക്ക് തങ്ങളുടെ വിപണി വിദേശത്തേക്ക് വ്യാപിപ്പിക്കാനും, ബിസിനസ് വളര്‍ത്താനു ഇത് വലിയ അവസരം നല്‍കി. പ്രധാനമന്ത്രിയുടെ ആത്മനിര്‍ഭര്‍ ഭാരത്’ (സ്വയം പര്യാപ്ത ഇന്ത്യ) നയത്തിന് ഈ കയറ്റുമതി നേട്ടം മികച്ചൊരു ഉത്തേജനമാണ് നല്‍കുന്നത്.ശ്രദ്ധിക്കേണ്ട കാര്യങ്ങള്‍ഇന്ത്യയുടെ പകുതിയിലധികം യുദ്ധവിമാനങ്ങളും റഷ്യന്‍ നിര്‍മ്മിതമാണ്. ഇന്ത്യ കാലാകാലങ്ങളായി റഷ്യയില്‍ നിന്ന് വലിയ തോതില്‍ ആയുധങ്ങള്‍ വാങ്ങുന്ന രാജ്യമാണ്. എന്നാല്‍ യൂറോപ്യന്‍ രാജ്യങ്ങള്‍ റഷ്യയെ ശത്രുവായാണ് കാണുന്നത്. അതിനാല്‍ യൂറോപ്പിലേക്കുള്ള ഇന്ത്യന്‍ ആയുധ വിതരണം റഷ്യയുമായുള്ള ഇന്ത്യയുടെ നല്ല ബന്ധത്തില്‍ ചോദ്യങ്ങള്‍ ഉയര്‍ത്താന്‍ കാരണമായേക്കാമെന്ന് വിദഗ്ധര്‍ പറയുന്നു.അതേസമയം ഇന്ത്യ ഏതെങ്കിലും ഒരു പക്ഷം ചേരുന്നതിന് പകരം നയതന്ത്ര സ്വയംഭരണാധികാരം (strategic autonomy) നിലനിര്‍ത്താനാണ് ശ്രമിക്കുന്നത്. ഇതൊരു ബിസിനസ് ആവശ്യകത മാത്രമാണെന്നാണ് ഇന്ത്യയുടെ നിലപാട്. നിലവില്‍ റഷ്യയുമായി സഹകരിക്കുന്ന പ്രധാന രാജ്യവും ഇന്ത്യ തന്നെ.ഇന്ത്യ യുക്രൈനിലേയ്ക്ക് നേരിട്ട് ആയുധങ്ങള്‍ കയറ്റുമതി ചെയ്യുന്നതായി ഔദ്യോഗികമായി സ്ഥിരീകരണവുമില്ല. ഇന്ത്യയില്‍ നിന്ന് ആയുധങ്ങള്‍ വാങ്ങുന്ന രാജ്യങ്ങളാണ് ഇവ യുക്രൈനിന് കൂടി ലഭ്യമാക്കുന്നത്. 2024 ഫെബ്രുവരിയില്‍ മാത്രം 62.8 മില്യണ്‍ ഡോളര്‍ മൂല്യമുള്ള 78 ഷിപ്പ്‌മെന്റുകള്‍ (155mm ആര്‍ട്ടിലറി ഷെല്ലുകള്‍) അമേരിക്കന്‍ കമ്പനികള്‍ വഴി യുക്രൈനില്‍ എത്തിയതായി രേഖകളുണ്ട്. ഈ ആയുധങ്ങള്‍ യുക്രൈനില്‍ എത്തിയതിന്റെ ഉത്തരവാദിത്തം ഇന്ത്യ ഏറ്റെടുക്കുന്നില്ല.
Read News
