ഓസ്‌ട്രേലിയയിൽ മലയാളി മസാജ് തെറാപ്പിസ്റ്റിന് തിരിച്ചടിയായത് ലൈംഗികാതിക്രമം; ‘നിർത്താൻ ആവശ്യപ്പെട്ടിട്ടും കേട്ടില്ല’, പശ്ചാത്താപമില്ലെന്ന് കോടതി

വിക്ടോറിയ∙ കേരളത്തിൽ സ്പാകളുമായി ബന്ധപ്പെട്ട ലൈംഗികാതിക്രമങ്ങളുടെ വിവരങ്ങൾ പുറത്തുവരുമ്പോൾ വീണ്ടും ശ്രദ്ധ നേടുകയാണ് ഓസ്‌ട്രേലിയയിൽ മലയാളി മസാജ് തെറാപ്പിസ്റ്റ് ജയിലിലായ സംഭവവും. കോട്ടയം കുമരകം സ്വദേശിയായ ടോമി മാത്യു (33) ആണ് മസാജ് സെന്ററിൽ മുൻപ് നടന്ന സംഭവത്തിൽ ഓസ്‌ട്രേലിയയിലെ  ജയിലിൽ കഴിയുന്നത്. 2025ൽ വടക്ക്-പടിഞ്ഞാറൻ വിക്ടോറിയയിലെ മിൽഡുറയിൽ താമസിക്കുന്നതിനിടെയാണ് ടോമി ട്രെയിനീ മസാജ് തെറാപ്പിസ്റ്റിന്റെ ജോലി നേടിയത്. ഇതിനിടെ ഇയാൾ രണ്ട് സ്ത്രീകളെ ലൈംഗികമായി സ്പർശിച്ചതായി പരാതി ഉയർന്നതായി ഇയാളുടെ തൊഴിലുടമ മിൽഡുറ മജിസ്‌ട്രേറ്റ് കോടതിയിൽ മൊഴി നൽകിയിരുന്നു. പരിശീലന കാലയളവിൽ അഞ്ച് സ്ത്രീകളെ ടോമി മസാജ് ചെയ്തുവെന്നാണ് കണ്ടെത്തിയിരിക്കുന്നത്. ഇതിൽ മൂന്ന് പേർ ഇയാളുടെ സഹപ്രവർത്തകരാണ്. സഹപ്രവർത്തകരല്ലാത്ത മറ്റ് രണ്ട് സ്ത്രീകളാണ് പരാതിക്കാർ.ഇരുസ്ത്രീകളെയും താൻ മോശമായി സ്പർശിച്ചിട്ടില്ലെന്ന് ടോമി കോടതിയിൽ പറഞ്ഞു. കേസിൽ ടോമിക്ക് അഞ്ച് മാസമാണ് കോടതി ശിക്ഷ വിധിച്ചത്. ശിക്ഷ വിധിക്കുമ്പോൾ ടോമി മാത്യു ക്വീൻസ്‌ലാൻഡിൽ വയോജന പരിചരണ കേന്ദ്രത്തിൽ അടുക്കളയിൽ ജോലി നേടിയിരുന്നതിനാലും സമാനമായ കുറ്റകൃത്യം ചെയ്യാൻ സാധ്യത കുറവാണെന്നും വിലയിരുത്തിയാണ് കോടതി കുറഞ്ഞ ശിക്ഷ വിധിച്ചത്. കേസിന്റെ ഗുരുതരമായ സ്വഭാവം, വിശ്വാസലംഘനം, പശ്ചാത്താപമില്ലായ്മ എന്നിവ കാരണം തടവുശിക്ഷയല്ലാതെ മറ്റൊരു ശിക്ഷാരീതിയും ഉചിതമല്ലെന്ന് മജിസ്‌ട്രേറ്റ് തോമസ് നിലപാട് സ്വീകരിച്ചതും ഈ കേസിന്റെ സവിശേഷതയാണ്. (Disclaimer: ഈ വാർത്തയ്ക്കൊപ്പം ഉപയോഗിച്ചിരിക്കുന്ന ചിത്രം മലയാള മനോരമയുടേതല്ല. ഇത് toy.mathew എന്ന ഫെയ്സ്ബുക് അക്കൗണ്ടിൽ നിന്ന് എടുത്തിട്ടുളളതാണ്. ഈ വാർത്ത കൂടുതൽ വ്യക്തവും സമഗ്രവുമാക്കുന്നതിനാണ് ഈ ചിത്രം ഉപയോഗിച്ചിരിക്കുന്നത്.)


Fashion ⏭️