BUSINESS
Jio Satellite: സാധാരണക്കാര്ക്ക് ഇനി ആകാശത്തുനിന്ന് റേഞ്ച്; ബഹിരാകാശത്ത് സാറ്റ്ലൈറ്റ് സമൂഹം തീര്ക്കാന് അംബാനി
Reliance Jio Updates: ഭൂമിക്കപ്പുറം സാമ്രാജ്യം വളര്ത്താനുള്ള പദ്ധതിയുമായി മുകേഷ് അംബാനി . ആകാശം തന്നെ ഒരു വലിയ മൊബൈല് ടവറാക്കി മാറ്റാനുള്ള പദ്ധതിയാണ് റിലയന്സ് ഇന്ഡസ്ട്രീസ് ചര്ച്ച ചെയ്യുന്നത്. റിപ്പോര്ട്ടുകള് പ്രകാവം ഭൂമിയിലെ തങ്ങളുടെ ബ്രോഡ്ബാന്ഡ് ഉപയോക്താക്കള്ക്ക് ആകാശത്ത് നിന്ന് റേഞ്ച് എത്തിക്കാനുള്ള ശ്രമമാണ് അംബാനി നടത്തുന്നത്. റിപ്പോര്ട്ടുകള് പ്രകാരം റിലയന്സ് ജിയോ അടുത്ത 2- 3 വര്ഷത്തിനുള്ളില് 1,600 മുതല് 1,650 വരെ ലോ എര്ത്ത് ഓര്ബിറ്റ് (LEO) ഉപഗ്രഹങ്ങള് ബഹിരാകാശത്ത് എത്തിച്ചേക്കും. ഭൂമിക്ക് പുറത്ത് സ്വന്തമായി ഒരു സാറ്റലൈറ്റ് നെറ്റ്വര്ക്ക് നിര്മ്മിക്കുകയാണ് ലക്ഷ്യം. പ്രസ്തുത പദ്ധതിയുമായി ബന്ധപ്പെട്ട് ബഹിരാകാശ നിയന്ത്രണ ഏജന്സിയായ ഇന്ത്യന് നാഷണല് സ്പേസ് പ്രൊമോഷന് ആന്ഡ് ഓതറൈസേഷന് സെന്ററിന് (IN-SPACe) മുകേഷ് അംബാനിയുടെ നേതൃത്വത്തിലുള്ള കമ്പനി അപേക്ഷ സമര്പ്പിച്ചെന്നാണ് വിവരം. പ്ര്സുതത പദ്ധതിക്ക് 10 മുതല് 15 ബില്യണ് ഡോളര് (95,000- 1,41,500 കോടി) വരെ ചെലവ് പ്രതീക്ഷിക്കുന്നു. ബ്രോഡ്ബാന്ഡിനു പുറമേ സാധാരണ മൊബൈല് ഉപയോക്താക്കളുടെ റേഞ്ച് പ്രശ്നങ്ങളും ഈ പദ്ധതി വഴി മറികടക്കാന് കഴിഞ്ഞേക്കുമെന്നാണ് വിവരം. അംബാനി പദ്ധതി സാധാരണക്കാരായ ആളുകള്ക്ക് നേട്ടമാകുന്നത് എങ്ങനെ എന്ന് നോക്കാം. പ്രധാന നേട്ടങ്ങള്തടസമില്ലാത്ത ഇന്റര്നെറ്റ്: സാധാരണ മൊബൈല് ടവറുകള് ഇല്ലാത്തതോ, കേബിള് ലൈനുകള് എത്താത്തതോ ആയ ഉള്നാടന് ഗ്രാമങ്ങളും ഡിജിറ്റല് ആകും. ഗ്രാമങ്ങള്, മലയോര മേഖലകള്, കാടുകള്, ഒറ്റപ്പെട്ട ദ്വീപുകള് എന്നിവിടങ്ങളില് പോലും തടസരഹിത ഇന്റര്നെറ്റ് ലഭ്യമാകും. മൊബൈലിലേക്ക് നേരിട്ട് കണക്റ്റിവിറ്റി: പ്രത്യേകം ഡിഷുകളോ, മോഡമോ ഇല്ലാതെ തന്നെ നിങ്ങളുടെ സാധാരണ സ്മാര്ട്ട്ഫോണുകളിലേക്ക് നേരിട്ട് സാറ്റലൈറ്റ് വഴി റേഞ്ച് എത്തിക്കാന് ഈ പദ്ധതിക്ക് സാധിക്കും. നിങ്ങള് ഡിസ്കണക്ട് ആകില്ല: ട്രെയിനിലോ, കാട്ടിലോ, കാര് യാത്രകളിലോ നിങ്ങള്ക്ക് സിഗ്നലുകള് കട്ടാകില്ല. യാത്രയിലുടനീളം തടസമില്ലാതെ കോളുകളും, ഇന്റര്നെറ്റും ഉറപ്പാക്കാം. കുറഞ്ഞ ചെലവ്: ഇലോണ് മസ്കിന്റെ സ്റ്റാര്ലിങ്ക് പോലുള്ള വിദേശ കമ്പനികള് നിലവില് രാജ്യത്ത് സാറ്റ്ലൈറ്റ് സേവനങ്ങള് ലഭ്യമാക്കാനുള്ള ശ്രമങ്ങളിലാണ്. എന്നാല് ഇവയുടെ ചെലവ് വളരെ കൂടുതലാണ്. എന്നാല് ഇന്ത്യയുടെ മനസറിയുന്ന അംബാനി ഇവിടെയും വിപ്ലവം കാണിക്കുമെന്നാണ് വിലയിരുത്തല്. പ്രകൃതിദുരന്തങ്ങളിലും നെറ്റ്വര്ക്ക് നഷ്ടപ്പെടില്ല: പ്രളയം, ഉരുള്പൊട്ടല്, ചുഴലിക്കാറ്റ് തുടങ്ങിയ സമയങ്ങളില് ഭൂമിയിലെ മൊബൈല് ടവറുകളും, ഫൈബര് കേബിളുകളും തകരാറിലാകാം. എന്നാല് സാറ്റ്ലൈറ്റ് കണക്ടിവിറ്റിക്ക് ഒന്നും സംഭവിക്കില്ല. ഇത് രക്ഷാപ്രവര്ത്തനങ്ങള്ക്കും മറ്റും വലിയ നേട്ടമാകും. വിദ്യാഭ്യാസവും ഓണ്ലൈന് സേവനങ്ങളും: ഗ്രാമങ്ങളിലെ കുട്ടികള്ക്കും മികച്ച ഓണ്ലൈന് ക്ലാസുകളും, ഇന്റര്നെറ്റ് സൗകര്യങ്ങളും ലഭ്യമാകും. ബാങ്കിങ്, ആരോഗ്യ സേവനങ്ങള് എന്നിവ കൂടുതല് കാര്യക്ഷമമാകും.
Source link
