ഫെയ്സ്ബുക്കും ഇൻസ്റ്റാഗ്രാമും ലോകമെങ്ങും പണിമുടക്കി; വെബ് പതിപ്പുകൾ പൂർണമായി ഓഫ്​ലൈൻ; എക്സിൽ ട്രോളുകളുടെ പൂരം

മെറ്റായുടെ ഉടമസ്ഥതയിലുള്ള പ്രമുഖ സോഷ്യൽ മീഡിയ പ്ലാറ്റ്‌ഫോമുകളായ ഫെയ്സ്ബുക്, ഇൻസ്റ്റാഗ്രാം, ഫെയ്സ്ബുക് മെസൻജർ എന്നിവ ‌മണിക്കൂറുകളോളം കൂട്ടത്തോടെ പണിമുടക്കി. വെള്ളിയാഴ്ച രാവിലെയാണ് ലോകത്തിന്റെ വിവിധ ഭാഗങ്ങളിലുള്ള ദശലക്ഷക്കണക്കിന് ഉപയോക്താക്കളെ പ്രതിസന്ധിയിലാക്കിക്കൊണ്ട് മെറ്റാ സേവനങ്ങൾ നിശ്ചലമായത്. എന്നാൽ മൊബൈൽ ആപ്ലിക്കേഷനുകൾ സാധാരണ രീതിയിൽ പ്രവർത്തിച്ചപ്പോൾ ഇൻസ്റ്റാഗ്രാം, വാട്‌സാപ്പ് എന്നിവയുടെ വെബ് പതിപ്പുകൾ (Web Versions) മാത്രമാണ് പൂർണ്ണമായും ഓഫ്​ലൈനായത്. സാങ്കേതിക തടസ്സങ്ങൾ നിരീക്ഷിക്കുന്ന പ്രമുഖ വെബ്‌സൈറ്റായ ഡൗൺഡിറ്റെക്ടറിൽ ചുരുങ്ങിയ സമയത്തിനുള്ളിൽ എൺപതിനായിരത്തിലധികം ആളുകളാണ് ഫെയ്സ്ബുക് ലോഗിൻ ചെയ്യാൻ സാധിക്കുന്നില്ലെന്ന് കാണിച്ച് പരാതികൾ റിപ്പോർട്ട് ചെയ്തത്.മണിക്കൂറുകൾ നീണ്ട സാങ്കേതിക തടസ്സങ്ങൾക്ക് ശേഷം പ്ലാറ്റ്‌ഫോമുകൾ സാധാരണ നിലയിലേക്ക് തിരികെ വന്നെങ്കിലും ചില ഫീച്ചറുകളിൽ ഇപ്പോഴും ചെറിയ രീതിയിലുള്ള ഗ്ലിച്ചുകൾ (Glitches) അനുഭവപ്പെടുന്നുണ്ടെന്ന് ഉപയോക്താക്കൾ വ്യക്തമാക്കുന്നുണ്ട്. സെർവറുകൾക്കുണ്ടായ തകരാറാണ് ഇതിന് പിന്നിലെന്നാണ് പ്രാഥമിക നിഗമനം.


Source link