പുതിയ അദ്ധ്യയന വര്‍ഷം: ധൈര്യവും മൂല്യങ്ങളും

കേരളത്തിലെ വിദ്യാലയങ്ങള്‍ ജൂണ്‍ ആദ്യവാരം തുറന്നല്ലോ. വേനല്‍ അവധിക്ക് ശേഷം ക്ലാസ് മുറികളില്‍ നിറയുന്ന കുട്ടികളുടെ ഉത്സാഹവും, പുതിയ യൂണിഫോമുകളും, പുസ്തകങ്ങളും, മാതാപിതാക്കളുടെ പ്രതീക്ഷയും സ്വാഭാവികമാണ്. പലരും ഉയര്‍ന്ന മാര്‍ക്കുകളും റാങ്കുകളും ലക്ഷ്യമിട്ട് തുടങ്ങുന്ന ഈ യാത്രയില്‍, ഒരു മനഃശാസ്ത്രജ്ഞനെന്ന നിലയില്‍ ഞാന്‍ ഓര്‍മ്മിപ്പിക്കുന്നത് ഈ വര്‍ഷം മികച്ച പഠനം മാത്രമല്ല, ധൈര്യശാലികളും യാഥാര്‍ത്ഥ്യബോധമുള്ളവരുമായി വളരാനുള്ള സുവര്‍ണ്ണാവസരമാക്കുക എന്നതാണ്.

മനുഷ്യമനസിന്റെ വികാസം ജനിതകവും പരിസരവും തമ്മിലുള്ള സംവാദമാണ്. ‘എനിക്ക് ഇത് ചെയ്യാന്‍ പറ്റില്ല’ എന്ന ദൃഢമായ മനോഭാവത്തിന് പകരം ‘ശ്രമിച്ചാല്‍ മെച്ചപ്പെടുത്താം’ എന്ന പ്രതീക്ഷാ മനോഭാവം വിജയം വർദ്ധിപ്പിക്കുമെന്ന് ആധുനിക മനഃശാസ്ത്രം തെളിയിക്കുന്നു. കേരളത്തിലെ ഏറെ മത്സരപരമായ പഠനസമ്പ്രദായത്തില്‍ ഈ മനോഭാവം അത്യന്താപേക്ഷിതമാണ്. പരാജയങ്ങളെ ഭയപ്പെടാതെ, തെറ്റുകളെ പഠനത്തിന്റെ അവസരമായി കാണുക. ഓരോ ദിവസവും ചെറിയ ചെറിയ ലക്ഷ്യങ്ങള്‍ സ്ഥാപിക്കുക – ഉദാഹരണത്തിന് 45 മിനിറ്റ് പൂര്‍ണ്ണ ശ്രദ്ധയോടെ പഠിക്കുക, തുടര്‍ന്ന് 10 മിനിറ്റ് വിശ്രമം. Pomodoro ടെക്‌നിക്ക് പോലുള്ള ശാസ്ത്രീയ രീതികള്‍ ഫോക്കസ് വര്‍ധിപ്പിക്കുകയും ക്ഷീണം കുറയ്ക്കുകയും ചെയ്യും.

ധൈര്യം (Courage & Resilience) വളര്‍ത്താന്‍ ഏറ്റവും ഫലപ്രദമായത് വെല്ലുവിളികളെ നേരിട്ട് നോക്കുന്നതാണ്. പ്രശ്‌നപരിഹാര കഴിവുകളും ഒപ്റ്റിമിസ്റ്റിക് ചിന്തയും വികസിപ്പിക്കുന്നത് സമ്മര്‍ദ്ദം കുറയ്ക്കുകയും അക്കാദമിക് പ്രകടനം മെച്ചപ്പെടുത്തുകയും ചെയ്യും. കുട്ടികളെ, ക്ലാസിലോ ജീവിതത്തിലോ വരുന്ന തോല്‍വികളെ ”ഞാന്‍ പരാജയപ്പെട്ടു” എന്നല്ല, ”ഈ രീതി ഫലിച്ചില്ല, മറ്റൊരു വഴി ശ്രമിക്കാം” എന്ന മനോഭാവത്തോടെ കാണുക. ശരീരവ്യായാമം, മതിയായ ഉറക്കം (8-9 മണിക്കൂര്‍), സമയബന്ധിത ദിനചര്യ എന്നിവ ഡോപമിന്‍, സെറോടോണിന്‍ തലങ്ങള്‍ ബാധിക്കുന്ന ശാസ്ത്രീയ വസ്തുതകളാണ്. ധൈര്യം ജനിക്കുന്നത് സുരക്ഷിതമായ പരാജയ അനുഭവങ്ങളില്‍ നിന്നാണ്. ചെറിയ വെല്ലുവിളികള്‍ ഏറ്റെടുത്ത് അവയെ മറികടക്കുമ്പോള്‍ ആത്മവിശ്വാസം സ്വാഭാവികമായി വര്‍ധിക്കും.

യാഥാര്‍ത്ഥ്യബോധമുള്ള ദര്‍ശനം വളര്‍ത്തുക. സ്വപ്നങ്ങള്‍ നല്ലതാണ്, പക്ഷേ അവ യാഥാര്‍ത്ഥ്യത്തിന്റെ ഉറച്ച അടിത്തറയിലാകണം. SMART ലക്ഷ്യങ്ങള്‍ – Specific, Measurable, Achievable, Relevant, Time-bound – ഈ ദിശയില്‍ സഹായകമാണ്. ഭാവിയില്‍ ഡോക്ടര്‍, എഞ്ചിനീയര്‍, സംരംഭകന്‍ എന്നൊക്കെ ചിന്തിക്കുമ്പോള്‍ ഇന്നത്തെ പഠനശേഷിയും കഴിവുകളും നിരന്തരം മെച്ചപ്പെടുത്തുക. ലക്ഷ്യങ്ങള്‍ വ്യക്തമാക്കുകയും അവയിലേക്കുള്ള ചെറിയ ചുവടുകള്‍ ആസൂത്രണം ചെയ്യുകയും ചെയ്യുക.

മൂല്യവ്യവസ്ഥയുടെ പ്രാധാന്യം അത്യന്താപേക്ഷിതമാണ്. സത്യസന്ധത, ബഹുമാനം, ഉത്തരവാദിത്തം, സഹാനുഭൂതി തുടങ്ങിയ മൂല്യങ്ങള്‍ മനസിന്റെ ആന്തരിക മൂല്യമാണ്. ഗവേഷണങ്ങള്‍ തെളിയിക്കുന്നത്, ശക്തമായ വ്യക്തിത്വ മൂല്യങ്ങള്‍ സമ്മര്‍ദ്ദം കുറയ്ക്കുകയും ദീര്‍ഘകാല സന്തോഷവും യഥാര്‍ത്ഥ വിജയവും നല്‍കുകയും ചെയ്യുമെന്നാണ്. പരീക്ഷയില്‍ മാര്‍ക്ക് വാങ്ങുന്നതിനേക്കാള്‍ പ്രധാനം ഒരു നല്ല മനുഷ്യനായി വളരുക എന്നതാണ് പ്രധാനമെന്ന് കുട്ടികളോട് പറയുക. മാതാപിതാക്കളും അദ്ധ്യാപകരും ഈ മൂല്യങ്ങള്‍ക്ക് മാതൃകയാകുക.

പ്രായോഗിക നിര്‍ദ്ദേശങ്ങള്‍

ദിവസവും 10 മിനിറ്റ് ധ്യാനം

കുട്ടികളുമായി രക്ഷിതാക്കള്‍ ഒരു സൗഹൃദം കാത്തുസൂക്ഷിക്കുക.

ആവശ്യമെങ്കില്‍ വിദഗ്ദ്ധസഹായം തേടാന്‍ മടിക്കരുത്

പ്രതിവാര അവലോകനം – എന്ത് നന്നായി, എന്ത് മെച്ചപ്പെടുത്തണം എന്ന് ചിന്തിക്കുക.

പുതിയ അധ്യയനവര്‍ഷം നിങ്ങളെ കൂടുതല്‍ ശക്തരും ദയയുള്ളവരും ബുദ്ധിമാന്മാരുമാക്കട്ടെ. പഠനം ഒരു യാത്രയാണ് – ധൈര്യത്തോടെ, മൂല്യങ്ങളോടെ, യാഥാര്‍ത്ഥ്യബോധത്തോടെ മുന്നോട്ട് പോവുക. നിങ്ങളുടെ വിജയം തീര്‍ച്ചയായും നിങ്ങളുടേതാകട്ടെ!

Nithin A.F.
Consultant Psychologist
SUT Hospital, Pattom,TVM