20 വർഷത്തെ കാത്തിരിപ്പ് തീർന്നു, പ്രാർത്ഥനകൾ സഫലമായി; പെരുന്നാൾ മധുരവുമായി അബ്ദുൽ റഹീം സ്വന്തം മണ്ണിൽ, ഉമ്മയുടെ അരികിൽ!

കോഴിക്കോട് ∙ കാലം കാത്തുവെച്ച ഏറ്റവും വലിയ പുണ്യമായി, നീണ്ട രണ്ട് പതിറ്റാണ്ടിന്റെ തടവറക്കാലത്തിന് വിരാമമിട്ട് അബ്ദുൽ റഹീം ഒടുവിൽ സ്വന്തം മണ്ണിൽ തിരിച്ചെത്തി. ത്യാഗത്തിന്റെയും സമർപ്പണത്തിന്റെയും ഓർമ പുതുക്കി കേരളക്കര ബലിപെരുന്നാളിന്റെ ആഹ്ലാദ തിമിർപ്പിൽ മുഴുകിനിൽക്കുന്ന സുപ്രധാന മുഹൂർത്തത്തിലാണ് കോഴിക്കോട് രാജ്യാന്തര വിമാനത്താവളത്തിലേക്ക് റഹീം വിമാനമിറങ്ങിയത്. മകന്റെ മുഖമൊന്ന് കാണാൻ വർഷങ്ങളായി കണ്ണീരോടെ കാത്തിരുന്ന എൺപത് വയസ്സായ ഉമ്മ ഫാത്തിമയുടെയും, ലോകത്തിന്റെ വിവിധ കോണുകളിലിരുന്ന് പ്രാർത്ഥിച്ച ലക്ഷക്കണക്കിന് മനുഷ്യരുടെയും കാത്തിരിപ്പിനാണ് ഇതോടെ ശുഭപര്യവസാനമായത്. റഹീമിന്റെ മോചനത്തിന് വേണ്ടി അടിയുറച്ചു പ്രവർത്തിച്ച ലീഗൽ കമ്മിറ്റിയിലെ അറ്റോർണി സിദ്ദീഖ് തുവ്വൂർ റഹീമിനെ കരിപ്പൂർ വിമാനത്താവളത്തിലേക്ക് നേരിട്ട് അനുഗമിച്ചിരുന്നു. സൗദി ബാലൻ കൊല്ലപ്പെട്ട കേസിൽ റിയാദ് ജയിലിൽ കഴിഞ്ഞിരുന്ന കോഴിക്കോട് കോടമ്പുഴ സ്വദേശി മച്ചിലകത്ത് പീടിയേക്കൽ അബ്ദുൽ റഹീമിന്റെ മോചനം പ്രവാസ ലോകത്തെ ഒത്തൊരുമയുടെയും കാരുണ്യത്തിന്റെയും ഏറ്റവും വലിയ വിളംബരമായാണ് ചരിത്രം രേഖപ്പെടുത്തുന്നത്. കഴിഞ്ഞ വ്യാഴാഴ്ച ശിക്ഷാകാലാവധി പൂർത്തിയാവുകയും ഫൈനൽ എക്സിറ്റ് അടക്കമുള്ള നിയമപരമായ തടസ്സങ്ങൾ നീങ്ങുകയും ചെയ്തതോടെയാണ് റഹീമിന് ജന്മനാട്ടിലേക്ക് മടങ്ങാൻ വഴിതുറന്നത്. ഒരു പ്രവാസി യുവാവിന്റെ ജീവിതം അപ്പാടെ മാറ്റിമറിച്ച ആ നിർഭാഗ്യ നിമിഷങ്ങൾ തുടങ്ങിയത് 2006 നവംബർ 18-നായിരുന്നു. ഹൗസ് ഡ്രൈവർ വീസയിൽ റിയാദിൽ എത്തിയ റഹീമിന്റെ ചുമതല, വാഹനാപകടത്തെ തുടർന്ന് കഴുത്തിന് താഴെ ചലനശേഷി നഷ്ടപ്പെട്ട് വൈദ്യോപകരണങ്ങളുടെ സഹായത്തോടെ ജീവിച്ചിരുന്ന 18 വയസ്സുകാരനായ അനസ് അൽ ശഹ്റിയെ പരിചരിക്കലായിരുന്നു. എന്നാൽ സൗദിയിലെത്തി കൃത്യം ഒരു മാസം തികയുന്നതിനിടെ, ഡിസംബർ 24-ന് ആ നിർഭാഗ്യകരമായ സംഭവമുണ്ടായി. 2017-ൽ പ്രത്യേക ബെഞ്ച് വധശിക്ഷ റദ്ദാക്കിയെങ്കിലും, സൗദി കുടുംബത്തിന്റെ അപ്പീലിൽ 2019-ലും 2021-ലും കോടതികൾ വീണ്ടും വധശിക്ഷ ശരിവെച്ചു. ഇതോടെ നിയമപരമായ പ്രതീക്ഷകളെല്ലാം അസ്തമിച്ച അവസ്ഥയിലായി. ഇതിനിടെ ഒത്തുതീർപ്പ് ചർച്ചകൾക്ക് മുൻകൈ എടുത്തിരുന്ന അനസിന്റെ പിതാവ് റോഡപകടത്തിൽ മരിച്ചതും ചർച്ചകൾ വഴിമുട്ടിച്ചു. വധശിക്ഷ വേണമെന്ന നിലപാടിൽ അനസിന്റെ മാതാവ് ഉറച്ചുനിന്നതും പ്രതിസന്ധി കൂട്ടി. അന്തിമ വിധി വന്നതോടെ റഹീമിന്റെ ജീവൻ രക്ഷിക്കാൻ ലോകമെമ്പാടുമുള്ള മലയാളി സമൂഹം ഒറ്റക്കെട്ടായി കൈകോർക്കുന്ന കാഴ്ചയ്ക്കാണ് ലോകം സാക്ഷ്യം വഹിച്ചത്. അഭിഭാഷകരായ അബൂ അനസ്, മുഹമ്മദ് മുബാറക് അൽ ഖഹ്താനി എന്നിവർ നടത്തിയ മാരത്തോൺ ചർച്ചകൾക്കൊടുവിൽ 15 മില്യൻ സൗദി റിയാൽ (ഏകദേശം 34 കോടി രൂപ) ദിയാധനം സ്വീകരിച്ച് മാപ്പ് നൽകാമെന്ന് സൗദി കുടുംബം സമ്മതിച്ചു. തുടർന്ന് ‘Save Abdul Rahim’ എന്ന മൊബൈൽ ആപ്ലിക്കേഷൻ വഴി രൂപീകരിച്ച ജനകീയ ഫണ്ടിലേക്ക് ലോകത്തിന്റെ വിവിധ കോണുകളിൽ നിന്നും പണമൊഴുകി. കണ്ണീർ തുടയ്ക്കാനായി മലയാളി സമൂഹം കാട്ടിയ ഈ ഒരുമയിലൂടെ ചുരുങ്ങിയ ദിവസങ്ങൾക്കകം തന്നെ കോടികൾ സമാഹരിക്കപ്പെടുകയും ഈ തുക കോടതി വഴി കൈമാറുകയും ചെയ്തു.


Source link