പുടിനെയും സെലെൻസ്‌കിയെയും ഒരേ വേദിയിൽ കാണാൻ ട്രംപ്; ലോകം ഉറ്റുനോക്കുന്ന കൂടിക്കാഴ്ച ഉടൻ
വാഷിങ്ടൻ∙ റഷ്യൻ പ്രസിഡന്റ് വ്ളാഡിമിർ പുട്ടിനും യുക്രെയ്ൻ പ്രസിഡന്റ് വൊളോഡിമിർ സെലൻസ്‌കിയും തമ്മിലുള്ള ഉന്നതതല കൂടിക്കാഴ്ച വൈകാതെ തന്നെ നടക്കുമെന്ന് യുഎസ് പ്രസിഡന്റ് ഡോണാൾഡ് ട്രംപ് വ്യക്തമാക്കി. വർഷങ്ങളായി നീണ്ടുനിൽക്കുന്ന റഷ്യ – യുക്രെയ്ൻ സംഘർഷത്തിന് അറുതി വരുത്തുന്നതിനായുള്ള നയതന്ത്ര നീക്കങ്ങൾ ട്രംപ് ഭരണകൂടം ഊർജിതമാക്കിയിരിക്കുകയാണ്. ഈ സാഹചര്യത്തിലാണ് നിർണായകമായ പ്രഖ്യാപനം ഉണ്ടായിരിക്കുന്നത്.
‘‘ഇരു നേതാക്കളും തമ്മിലുള്ള കൂടിക്കാഴ്ച വളരെ പെട്ടെന്നുതന്നെ യാഥാർഥ്യമാകും. ഈ സംഭാഷണത്തിലൂടെ സമാധാനപരമായ വലിയൊരു വഴിത്തിരിവ് ഉണ്ടാകുമെന്ന് ഞാൻ ഉറച്ചു വിശ്വസിക്കുന്നു’’ – മാധ്യമപ്രവർത്തകരുടെ ചോദ്യങ്ങൾക്ക് മറുപടിയായി ട്രംപ് പറഞ്ഞു. സ്തംഭിച്ചു കിടക്കുന്ന സമാധാന ചർച്ചകൾക്ക് വീണ്ടും ജീവൻ നൽകുക എന്ന ലക്ഷ്യത്തോടെ യുക്രെയ്ൻ, അമേരിക്ക, റഷ്യ എന്നീ രാജ്യങ്ങളുടെ പ്രതിനിധികൾ പങ്കാളികളാകുന്ന ത്രികക്ഷി യോഗം നവംബറിൽ ചേരുമെന്ന് കഴിഞ്ഞ ഞായറാഴ്ച സെലൻസ്‌കിയും സ്ഥിരീകരിച്ചിരുന്നു. ഈ കൂടിക്കാഴ്ച യുഎഇയിൽ വെച്ചായിരിക്കും നടക്കുകയെന്നാണ് പുറത്തുവരുന്ന റിപ്പോർട്ടുകൾ സൂചിപ്പിക്കുന്നത്.
