NEWS

ത്രിശക്തിസംഗമം: ചൈനയിൽ ട്രംപ്, പുട്ടിൻ, ഷി ജിൻപിങ് ഉച്ചകോടി ഇന്ന്

‘ഒരുവശത്ത് വമ്പൻ കൈകളുമായി നിൽക്കുന്ന റഷ്യൻ കരടി, മറുവശത്ത് കരുത്തനായ അമേരിക്കൻ പോത്ത്. എന്നാൽ, സ്വന്തം വീട്ടിലെത്താൻ വഴിയില്ലാതെ പകച്ചുനിൽക്കുന്ന പാവം ഇംഗ്ലിഷ് കഴുതയെപ്പോലെയാണ് ഞാൻ’ – രണ്ടാം ലോകമഹായുദ്ധം അവസാനിപ്പിക്കുന്നതിനായുള്ള ടെഹ്റാൻ ഉച്ചകോടിക്കിടെ യുഎസ് പ്രസിഡന്റ് ഫ്രാങ്ക്ളിൻ റൂസ്‌വെൽറ്റിനും സോവിയറ്റ് യൂണിയൻ തലവൻ ജോസഫ് സ്റ്റാലിനും ഒപ്പം പങ്കെടുത്ത ശേഷം ബ്രിട്ടിഷ് പ്രധാനമന്ത്രി വിൻസ്റ്റൺ ചർച്ചിൽ നടത്തിയ പ്രശസ്തമായ നിരീക്ഷണം ഇതാണ്. ഉദയം ചെയ്യുന്ന വൻശക്തികളാണ് അമേരിക്കയും റഷ്യയുമെന്നും, മറിച്ച് ബ്രിട്ടന്റെ പ്രതാപം മങ്ങിക്കൊണ്ടിരിക്കുകയാണെന്നുമുള്ള തിരിച്ചറിവായിരുന്നു ആ വാക്കുകൾക്ക് പിന്നിൽ. അതേസമയം, ലോകകാര്യങ്ങളിൽ ദീർഘകാല പരിചയസമ്പത്തുള്ള ബ്രിട്ടന്റെ സഹായമില്ലാതെ ഈ രണ്ട് വൻശക്തികൾക്ക് തങ്ങളുടെ ലക്ഷ്യങ്ങളിൽ എത്തിച്ചേരാൻ കഴിയില്ലെന്നും അദ്ദേഹം വിശ്വസിച്ചിരുന്നു.

അന്നത്തെ മൂന്ന് ലോകശക്തികളുടെ സാരഥികൾ ഒന്നിച്ചതുപോലെ, ദശാബ്ദങ്ങൾക്ക് ശേഷം ആധുനിക ലോകത്തെ മൂന്ന് വൻശക്തികളുടെ നേതാക്കൾ ചൈനയിലെ ഷെൻഷെനിൽ വീണ്ടും ഒത്തുചേരുകയാണ്. അന്നത്തെ ബ്രിട്ടന്റെ സ്ഥാനത്ത് ഇന്ന് റഷ്യ നിലയുറപ്പിക്കുമ്പോൾ, അന്ന് റഷ്യ വഹിച്ചിരുന്ന സ്ഥാനത്തേക്ക് ചൈന വളർന്നിരിക്കുന്നു. യുക്രെയ്ൻ യുദ്ധം ഇപ്പോഴുള്ള സാഹചര്യത്തിൽ തന്നെ അവസാനിപ്പിക്കാൻ പുട്ടിൻ ആഗ്രഹിക്കുന്നുണ്ട്. യുക്രെയ്നിൽ റഷ്യൻ വംശജർ തിങ്ങിപ്പാർക്കുന്ന കിഴക്കൻ മേഖലകൾ ഇതിനോടകം തന്നെ റഷ്യൻ സേനയുടെ നിയന്ത്രണത്തിലായിക്കഴിഞ്ഞു. നാറ്റോയുടെ സുരക്ഷാ കവചം ഉറപ്പാക്കുമ്പോഴും, യുക്രെയ്നെ നാറ്റോ സഖ്യത്തിൽ ഉൾപ്പെടുത്താതിരിക്കുക എന്ന നിബന്ധനയോടെ യുദ്ധത്തിന് വിരാമമിടാനാണ് പുട്ടിൻ താൽപ്പര്യപ്പെടുന്നത്. ഇതിനായുള്ള രഹസ്യ ചർച്ചകൾ അമേരിക്കയുമായി സമാന്തരമായി നടക്കുന്നുണ്ട്. എന്നാൽ, യുറോപ്യൻ രാജ്യങ്ങൾക്കും യുക്രെയ്നും ഇത്തരം വിട്ടുവീഴ്ചകൾ അംഗീകരിക്കാൻ പ്രയാസമായിരിക്കും. അതേസമയം, അമേരിക്കൻ പിന്തുണ പിൻവലിക്കപ്പെട്ടാൽ തനിച്ച് യുദ്ധം തുടരാൻ അവർക്ക് സാധിക്കുകയുമില്ല.

Fashion ⏭️

Back to top button