NEWS

ടിക്കറ്റ് പരിശോധനയ്ക്കിടെ ടിടിഇക്ക് നേരെ യാത്രക്കാരന്റെ ആക്രമണം; ട്രെയിൻ വാതിൽ അടച്ച് പുറത്താക്കാൻ ശ്രമം

കൊച്ചി∙ ജനശതാബ്ദി എക്സ്പ്രസിൽ വെച്ച് ടിടിഇയെ ട്രെയിനിൽ നിന്ന് പുറത്തേക്ക് തള്ളിയിടാൻ ശ്രമം നടന്നതായി റിപ്പോർട്ട്. സംഭവവുമായി ബന്ധപ്പെട്ട് ആലപ്പുഴ സ്വദേശികളായ കെ.ഡി. ബാബു, ശ്രീരാജ് എന്നിവരെ റെയിൽവേ സംരക്ഷണ സേന (ആർപിഎഫ്) കസ്റ്റഡിയിലെടുത്തു. എറണാകുളം സൗത്ത് റെയിൽവേ സ്റ്റേഷനിൽ വെച്ചായിരുന്നു നാടകീയമായ സംഭവങ്ങൾ അരങ്ങേറിയത്.

ട്രെയിനിലെ ഡിഎൽ 1 കോച്ചിൽ ഭിന്നശേഷിക്കാർക്കായി സംവരണം ചെയ്ത സീറ്റുകളിൽ ഈ രണ്ടുപേർ ഇരിക്കുന്നത് പ്ലാറ്റ്‌ഫോമിൽ നിന്ന് ശ്രദ്ധയിൽപ്പെട്ട ടിടിഇ ടിൻസൺ തോമസ്, ഇവർക്കെതിരെ സംശയം തോന്നി ടിക്കറ്റ് പരിശോധിക്കാൻ മുതിർന്നു. ടിക്കറ്റ് ചോദിച്ചതിൽ പ്രകോപിതരായ ഇരുവരും ടിടിഇയെ ട്രെയിനിൽ നിന്ന് പുറത്തേക്ക് തള്ളിയിടാൻ ശ്രമിക്കുകയായിരുന്നു. കൂടാതെ, ട്രെയിനിന്റെ വാതിൽ ഉള്ളിൽ നിന്ന് ശക്തിയായി അടയ്ക്കാനും ഇവർ ശ്രമിച്ചു.

ട്രെയിൻ പ്ലാറ്റ്‌ഫോമിൽ നിന്ന് നീങ്ങിത്തുടങ്ങിയ സമയത്താണ് ആക്രമണം ഉണ്ടായത്. ഭാഗ്യത്തിന്, ട്രെയിനിന്റെ വാതിലിൽ പിടിച്ച് തൂങ്ങിനിന്നതുകൊണ്ട് ടിൻസൺ താഴേക്ക് വീഴാതെ രക്ഷപ്പെട്ടു. ടിടിഇയുടെ നിലവിളിയും വാതിലിൽ തൂങ്ങിക്കിടക്കുന്ന അവസ്ഥയും ശ്രദ്ധയിൽപ്പെട്ട ട്രെയിൻ മാനേജർ ഉടൻ തന്നെ എമർജൻസി ബ്രേക്ക് പ്രയോഗിച്ച് ട്രെയിൻ നിർത്തിച്ചതിനാൽ വലിയൊരു ദുരന്തമാണ് ഒഴിവായത്. ഈ സംഭവത്തിൽ ദക്ഷിണ റെയിൽവേയിലെ ഉന്നത ഉദ്യോഗസ്ഥർക്ക് ടിൻസൺ ഔദ്യോഗികമായി പരാതി നൽകിയിട്ടുണ്ട്.

Fashion ⏭️

Back to top button