മൂന്ന് ലോകകപ്പ് നേട്ടങ്ങൾ: അന്താരാഷ്ട്ര ക്രിക്കറ്റിൽ നിന്ന് ഗ്ലെൻ മാക്സ്വെൽ വിരമിച്ചു
സിഡ്നി∙ അന്താരാഷ്ട്ര ക്രിക്കറ്റ് പിച്ചുകളോട് വിടപറഞ്ഞ് ഓസ്ട്രേലിയൻ സൂപ്പർ താരം ഗ്ലെൻ മാക്സ്വെൽ. 38-ാം വയസ്സിലാണ് ക്രിക്കറ്റിന്റെ എല്ലാ ഫോർമാറ്റുകളിൽനിന്നും താരം പടിയിറങ്ങുന്നത്. ഓസ്ട്രേലിയൻ കുപ്പായത്തിൽ 149 ഏകദിനങ്ങളിലും 130 ട്വന്റി20 മത്സരങ്ങളിലും ഏഴു ടെസ്റ്റുകളിലും മാക്സ്വെൽ കളത്തിലിറങ്ങിയിട്ടുണ്ട്. ഓസ്ട്രേലിയ ലോകകിരീടം ചൂടിയ 2015, 2023 ഏകദിന ലോകകപ്പുകളിലും 2021-ലെ ട്വന്റി20 ലോകകപ്പിലും നിർണായക സാന്നിധ്യമായിരുന്നു ഈ ഓൾറൗണ്ടർ.
കഴിഞ്ഞ ജൂണിൽ തന്നെ ഏകദിന ക്രിക്കറ്റിൽനിന്ന് താരം വിരമിക്കൽ പ്രഖ്യാപിച്ചിരുന്നു. 2026 ഫെബ്രുവരിയിൽ ഒമാനെതിരെ നടന്ന ട്വന്റി20 മത്സരത്തിലാണ് അവസാനമായി അദ്ദേഹം അന്താരാഷ്ട്ര തലത്തിൽ ബാറ്റേന്തിയത്. വരാനിരിക്കുന്ന നവംബർ 21-ലെ ഇംഗ്ലണ്ടിനെതിരായ ട്വന്റി20 പരമ്പരയ്ക്കുള്ള ടീമിൽ മാക്സ്‌വെല്ലിനെ ഉൾപ്പെടുത്തിയിരുന്നില്ല. ഇതിനു പിന്നാലെയാണ് വിരമിക്കൽ എന്ന ഔദ്യോഗിക തീരുമാനം താരം പ്രഖ്യാപിച്ചത്.
തന്റെ വിരമിക്കൽ തികച്ചും വ്യക്തിപരമായ തീരുമാനമാണെന്നും ഇതിൽ ടീം മാനേജ്മെന്റിന്റെ ഭാഗത്തുനിന്ന് യാതൊരുവിധ സമ്മർദങ്ങളും ഉണ്ടായിരുന്നില്ലെന്നും മാക്സ്വെൽ വ്യക്തമാക്കി. ഭാവി മുന്നിൽക്കണ്ട് പുതിയ കളിക്കാരെ വളർത്താനാണ് ടീം ശ്രമിക്കുന്നത്. ബംഗ്ലാദേശിൽ നടന്ന പരമ്പരയിൽ യുവതാരങ്ങൾ മികച്ച പ്രകടനം പുറത്തെടുത്തതോടെ ഇക്കാര്യം കൂടുതൽ വ്യക്തമായതാണ്. അതിനാൽ പുതിയ അവസരങ്ങൾക്കായി വാതിൽ തുറന്നിടാൻ ഞാൻ തീരുമാനിച്ചു. ഇംഗ്ലണ്ടിനെതിരായ പരമ്പരയിൽ ഇല്ലാത്തതുകൊണ്ട് തന്നെ ബിഗ് ബാഷ് ലീഗിനായി തയ്യാറെടുക്കാൻ ആവശ്യമായ സമയം തനിക്ക് ലഭിക്കുമെന്നും മാക്സ്വെൽ കൂട്ടിച്ചേർത്തു.
