കെ എം ബഷീറിനെ കാറിടിച്ച് കൊലപ്പെടുത്തിയ കേസ്; വിചാരണ സ്റ്റേ ചെയ്‌ത് ഹൈക്കോടതി
കെ എം ബഷീർ
കൊച്ചി: മാദ്ധ്യമപ്രവർത്തകൻ കെഎം ബഷീറിനെ വാഹനമിടിച്ച് കൊലപ്പെടുത്തിയ കേസിന്റെ വിചാരണ സ്റ്റേ ചെയ്‌ത് ഹൈക്കോടതി. പ്രോസിക്യൂട്ടർ നിയമനവുമായി ബന്ധപ്പെട്ട രേഖകൾ ഹാജരാക്കാൻ സർക്കാരിന് കോടതി നിർദേശം നൽകി.
കെഎം ബഷീറിന്റെ മരണവുമായി ബന്ധപ്പെട്ട് ഭാര്യ ജെസീല നേരത്തെ ഹൈക്കോടതിയെ സമീപിച്ചിരുന്നു. വിചാരണക്കോടതി മാറ്റണം, കേസിൽ സ്‌പെഷ്യൽ പ്രോസിക്യൂട്ടറെ നിയമിക്കണം തുടങ്ങിയ ആവശ്യങ്ങളാണ് ജസീല ഉന്നയിച്ചത്. നിലവിലുള്ള പ്രോസിക്യൂട്ടർ കേസ് കൃത്യമായി കൈകാര്യം ചെയ്യുന്നില്ലെന്നാരോപിച്ചാണ് സ്‌പെഷ്യൽ പ്രോസിക്യൂട്ടറെ നിയമിക്കണമെന്ന് ജസീല ആവശ്യപ്പെട്ടത്.
കേസിൽ സ്‌പെഷ്യൽ പ്രോസിക്യൂട്ടറെ നിയമിക്കുമെന്ന് ഉറപ്പ് നൽകിയ സർക്കാർ അഡ്വക്കേറ്റ് സന്തോഷിനെ ആ സ്ഥാനത്തേക്ക് നിയമിക്കുമെന്ന കാര്യം അറിയിക്കുകയും ചെയ്‌തിരുന്നു. എന്നാൽ, പിന്നീട് ഇക്കാര്യത്തിൽ തുടർനടപടികൾ ഉണ്ടായില്ല. ഇക്കാര്യം ചൂണ്ടിക്കാണിച്ചുകൊണ്ട് ജസീല വീണ്ടും ഹൈക്കോടതിയിൽ ഹർജി നൽകുകയായിരുന്നു. ഇതേതുടർന്നാണ് വിചാരണ നടപടികൾ നിർത്തിവയ്‌ക്കണമെന്നും സ്‌പെഷ്യൽ പ്രോസിക്യൂട്ടർ നിയമനത്തിൽ സർക്കാർ സ്വീകരിച്ച നടപടികൾ വിശദീകരിക്കുന്ന രേഖകൾ ഹാജരാക്കണമെന്നും ഹൈക്കോടതി നിർദേശിച്ചത്.
English Summary
Kerala High Court has stayed the trial in journalist KM Basheer’s death case and directed the government to submit documents detailing the steps taken to appoint a special prosecutor. The order followed a petition by Basheer’s wife, Jesila.
