പശ്ചിമേഷ്യൻ യുദ്ധം: നിർത്തിവച്ചിരുന്ന സർവീസുകൾ പുനരാരംഭിക്കാൻ എയർ ഇന്ത്യ എക്സ്പ്രസ്

ന്യൂഡൽഹി ∙ പശ്മിമേഷ്യൻ യുദ്ധ പശ്ചാത്തലത്തിൽ നിർത്തിവച്ചിരുന്ന സർവീസുകൾ എയർ ഇന്ത്യ എക്സ്പ്രസ് പൂർണമായും പുനരാരംഭിക്കുന്നു. പുതുക്കിയ വിമാന ഷെഡ്യൂളുകൾ പ്രകാരം കോഴിക്കോട് – സലാല റൂട്ടിലെ സർവീസുകൾ ഇന്ന് മുതൽ ആരംഭിച്ചു. ആഴ്ചയിൽ രണ്ട് സർവീസുകൾ വീതമാകും ഉണ്ടായിരിക്കുക. കോഴിക്കോട് – കുവൈത്ത് സർവീസുകൾ നാളെ മുതൽ പുനരാരംഭിക്കും. ആദ്യഘട്ടത്തിൽ ആഴ്ചയിൽ ഒരു സർവീസ് മാത്രമായിരിക്കും. പിന്നീട് ആഴ്ചയിൽ മൂന്ന് സർവീസുകളായി വർധിപ്പിക്കും.ബെംഗളൂരു – കുവൈത്ത് സർവീസുകൾ‌ ജൂലൈ 4 മുതൽ ആരംഭിക്കും. ആദ്യം ആഴ്ചയിൽ ഒരു സർവീസും, ജൂലായ് 7 മുതൽ ആഴ്ചയിൽ മൂന്ന് സർവീസുകളായും ഇത് ഉയർത്തും. മംഗളൂരു – മസ്കത്ത് റൂട്ടിലെ സർവീസുകൾ ജൂലായ് 3 മുതൽ പുനസ്ഥാപിക്കും. മസ്കത്തിൽ നിന്ന് ഇന്ത്യയിലെ ഏഴ് നഗരങ്ങളിലേക്ക് ആഴ്ചയിൽ 40 സർവീസുകളാണ് നിലവിലുള്ളത്. കുവൈത്തിലേക്കും തിരിച്ചുമുള്ള വിമാനങ്ങൾ കുവൈത്ത് രാജ്യാന്തര വിമാനത്താവളത്തിലെ ടെർമിനൽ നാലിൽ നിന്നായിരിക്കും സർവീസ് നടത്തുകയെന്നും എയർലൈൻ അധികൃതർ അറിയിച്ചു.


Source link