പുത്തൻ ഔഡി ക്യൂ 3 കേരള വിപണിയിൽ: അത്യാധുനിക ഫീച്ചറുകളുമായി അവതരണം
ഇന്ത്യയിലെ മുൻനിര ഓട്ടോമൊബൈൽ വിതരണക്കാരായ പിപിഎസ് മോട്ടോഴ്‌സ്, പുതിയ ഔഡി ക്യൂ 3 കേരളത്തിലെ വാഹനപ്രേമികൾക്കായി പുറത്തിറക്കി. 51.99 ലക്ഷം രൂപയാണ് ഈ ആഡംബര കോംപാക്റ്റ് എസ്‌യുവിയുടെ പ്രാരംഭ എക്സ്-ഷോറൂം വിലയായി നിശ്ചയിച്ചിരിക്കുന്നത്. മഹാരാഷ്ട്രയിലെ ഛത്രപതി സംഭാജിനഗറിലുള്ള സാവ്‌വിപ്ൽ ശാലയിലാണ് ഈ വാഹനം പ്രാദേശികമായി നിർമിച്ചെടുക്കുന്നത്. കൊച്ചിയിൽ വെച്ച് നടന്ന വർണാഭമായ ചടങ്ങിൽ, കേരളത്തിലെ ആദ്യ പത്ത് ഉപഭോക്താക്കൾക്ക് വാഹനത്തിന്റെ താക്കോലുകൾ പിപിഎസ് മോട്ടോഴ്‌സ് അധികൃതർ കൈമാറി.
മികച്ച ഡ്രൈവിങ് അനുഭവവും ക്വാട്രോ കരുത്തും
2.0 ലീറ്റർ ടിഎഫ്എസ്ഐ പെട്രോൾ എൻജിന്റെ കരുത്തിലാണ് പുതിയ ക്യൂ 3 നിരത്തിലെത്തുന്നത്. 204 എച്ച്പി (150 kW) കരുത്തും 320 എൻഎം ടോർക്കും ഈ എൻജിൻ പ്രദാനം ചെയ്യുന്നു. വെറും 7.1 സെക്കൻഡുകൾ കൊണ്ട് പൂജ്യത്തിൽ നിന്ന് 100 കിലോമീറ്റർ വേഗത കൈവരിക്കാൻ ഈ വാഹനത്തിന് സാധിക്കും. ദുഷ്കരമായ പാതകളിലും മികച്ച നിയന്ത്രണവും ഗ്രിപ്പും ഉറപ്പാക്കുന്ന ഔഡിയുടെ സിഗ്നേച്ചർ ‘ക്വാട്രോ’ ഓൾ-വീൽ ഡ്രൈവ് സംവിധാനം ഇതിന്റെ പ്രത്യേകതയാണ്. ഒപ്പം, വ്യത്യസ്ത റോഡ് സാഹചര്യങ്ങൾക്കനുസരിച്ച് ക്രമീകരിക്കാവുന്ന ബാലൻസ്ഡ്, ഡൈനാമിക്, കംഫർട്ട്, എഫിഷ്യൻസി, ഓഫ്‌റോഡ് പ്ലസ് എന്നിങ്ങനെ അഞ്ച് ഡ്രൈവിങ് മോഡുകളും പ്രോഗ്രസീവ് സ്റ്റിയറിങ് കംഫർട്ട് സസ്പെൻഷനും ഡ്രൈവിങ്ങിനെ കൂടുതൽ സുഖകരമാക്കുന്നു.
ഡിജിറ്റൽ മാട്രിക്സ് ലൈറ്റിങ്ങും അത്യാധുനിക ക്യാബിനും
വാഹനത്തിനുള്ളിലേക്ക് പ്രവേശിക്കുമ്പോൾ 30.22 സെ.മീ ഔഡി വെർച്വൽ കോക്ക്പിറ്റും, 32.51 സെ.മീ വലിപ്പമുള്ള സെൻട്രൽ എംഎംഐ ടച്ച് ഡിസ്‌പ്ലേയും ഉൾപ്പെടുന്ന പനോരമിക് ‘ഡിജിറ്റൽ സ്റ്റേജ്’ ഡിസ്‌പ്ലേയാണ് ആകർഷണീയമായി ഒരുക്കിയിരിക്കുന്നത്. ഡ്രൈവിങ് വിവരങ്ങൾ തത്സമയം മുന്നിലെ ഗ്ലാസിൽ തെളിയുന്ന ഹെഡ്-അപ്പ് ഡിസ്‌പ്ലേയും വാഹനത്തിലുണ്ട്. ഗിയർ മാറ്റുന്നതിനുള്ള സെലക്ടറും ലൈറ്റിങ് കൺട്രോളുകളും സ്റ്റിയറിങ്ങിന് പിന്നിലേക്ക് മാറ്റിയതോടെ സെന്റർ കൺസോളിൽ കൂടുതൽ സ്ഥലം ലഭ്യമായി. സംഗീത പ്രേമികൾക്കായി 420 വാട്ട് ഔട്ട്പുട്ടും 12 ഹൈ-പെർഫോമൻസ് സ്പീക്കറുകളുമുള്ള പ്രീമിയം സോനോസ് സൗണ്ട് സിസ്റ്റം ഇതിൽ സജ്ജീകരിച്ചിരിക്കുന്നു. 30 നിറങ്ങളിൽ ക്രമീകരിക്കാവുന്ന ആംബിയന്റ് ലൈറ്റിംഗ്, ത്രീ-സോൺ ക്ലൈമറ്റ് കൺട്രോൾ, വയർലെസ് ചാർജിങ് സംവിധാനം എന്നിവ യാത്രയെ കൂടുതൽ ആഡംബരപൂർണമാക്കുന്നു. ടാമറിൻഡ് ബ്രൗൺ, പെർഗമെന്റ് ബീജ് എന്നീ രണ്ട് തരം ഇന്റീരിയർ തീമുകളിൽ ഉപഭോക്താക്കൾക്ക് വാഹനം തെരഞ്ഞെടുക്കാം.
