ഹാർദിക് പാണ്ഡ്യ മുംബൈ ഇന്ത്യൻസ് വിടുന്നു; പഞ്ചാബ് കിങ്സിലേക്കുള്ള മാറ്റത്തിൽ അർഷ്ദീപും മലയാളി താരവും ഉൾപ്പെടും
മുംബൈ∙ ഇന്ത്യൻ ക്രിക്കറ്റ് താരം ഹാർദിക് പാണ്ഡ്യ വരാനിരിക്കുന്ന ഐപിഎൽ സീസണിൽ പഞ്ചാബ് കിങ്‌സിന്റെ ഭാഗമായേക്കുമെന്ന് സൂചന. നിലവിൽ മുംബൈ ഇന്ത്യൻസിൽ തുടരുന്ന താരത്തെ പഞ്ചാബ് ഫ്രാഞ്ചൈസിയിലേക്ക് കൈമാറാനുള്ള നീക്കങ്ങൾ അണിയറയിൽ സജീവമാണെന്നാണ് റിപ്പോർട്ടുകൾ വ്യക്തമാക്കുന്നത്. കൊൽക്കത്ത നൈറ്റ് റൈഡേഴ്‌സ് അല്ലെങ്കിൽ ചെന്നൈ സൂപ്പർ കിങ്‌സ് തുടങ്ങിയ ടീമുകളിലേക്ക് ഹാർദിക് ചേക്കേറുമെന്ന അഭ്യൂഹങ്ങൾക്കിടെയാണ് അപ്രതീക്ഷിതമായ ഈ വഴിത്തിരിവ്. റിക്കി പോണ്ടിങ്ങിന്റെ ശിക്ഷണത്തിലുള്ള പഞ്ചാബ് കിങ്‌സ്, പാണ്ഡ്യയെ ടീമിലെടുക്കുന്നതിനുള്ള അന്തിമ ചർച്ചകളിലാണെന്നാണ് വിവരം.
കഴിഞ്ഞ ഐപിഎൽ ലേലത്തിന് മുന്നോടിയായി അർഷ്ദീപ് സിങ്ങിനെ പഞ്ചാബ് കിങ്‌സ് ഒഴിവാക്കിയിരുന്നു. എങ്കിലും, താര ലേലത്തിൽ 15.75 കോടി രൂപയ്ക്ക് സൺറൈസേഴ്സ് ഹൈദരാബാദ് അർഷ്ദീപിനായി ബിഡ് വിളിച്ചപ്പോൾ, ‘റൈറ്റ് ടു മാച്ച്’ (RTM) കാർഡ് ഉപയോഗിച്ച് പഞ്ചാബ് തന്നെ അദ്ദേഹത്തെ തിരികെ ടീമിലെത്തിക്കുകയായിരുന്നു. 2022-ൽ ഗുജറാത്ത് ടൈറ്റൻസിനെ കിരീടത്തിലേക്ക് നയിച്ച ഹാർദിക് പാണ്ഡ്യ, 2024-ലാണ് പഴയ തട്ടകമായ മുംബൈ ഇന്ത്യൻസിലേക്ക് തിരിച്ചെത്തിയത്. ടീമിന്റെ നായകസ്ഥാനം ഉൾപ്പെടെയുള്ള ചുമതലകൾ മുംബൈ മാനേജ്‌മെന്റ് അദ്ദേഹത്തിൽ അർപ്പിച്ചുവെങ്കിലും, പ്രതീക്ഷിച്ച നിലവാരത്തിലുള്ള പ്രകടനം പുറത്തെടുക്കാൻ പാണ്ഡ്യയ്ക്ക് സാധിച്ചിരുന്നില്ല.
