ക്ലിഫ് ഹൗസ് അറ്റകുറ്റപ്പണി: നിർദേശം തള്ളി ഉത്തരവ് റദ്ദാക്കി
തിരുവനന്തപുരം ∙ ക്ലിഫ് ഹൗസിലെ അറ്റകുറ്റപ്പണികൾക്കായി പൊതുമരാമത്തുവകുപ്പ് പുറപ്പെടുവിച്ചിരുന്ന ഉത്തരവ് സർക്കാർ റദ്ദാക്കി. ഈ ഉത്തരവ് ഉടൻ പിൻവലിക്കാൻ വകുപ്പ് സെക്രട്ടറിക്ക് മുഖ്യമന്ത്രി വി.ഡി.സതീശൻ കർശന നിർദേശം നൽകുകയായിരുന്നു. മുഖ്യമന്ത്രിയുടെ ഓഫിസിനെ പോലും അറിയിക്കാതെ ഇത്തരമൊരു നടപടി എങ്ങനെ ഉണ്ടായെന്ന് വിശദമായ റിപ്പോർട്ട് സമർപ്പിക്കാനും അദ്ദേഹം ആവശ്യപ്പെട്ടിട്ടുണ്ട്.
സർക്കാർ അധികാരമേറ്റെടുത്ത സമയത്ത് തന്നെ ക്ലിഫ് ഹൗസിൽ അനാവശ്യമായ മോടിപിടിപ്പിക്കലുകളോ വലിയ നിർമ്മാണ പ്രവർത്തനങ്ങളോ പാടില്ലെന്ന് മുഖ്യമന്ത്രി താക്കീത് നൽകിയിരുന്നു. എന്നാൽ, 2022 മുതൽ നടപ്പാക്കുന്ന സേഫ്റ്റി ഓഡിറ്റിന്റെ ഭാഗമായാണ് ഈ ഉത്തരവ് എന്നാണ് വകുപ്പുതലത്തിലെ വിശദീകരണം. മുൻ സർക്കാരിന്റെ കാലത്തെ എസ്റ്റിമേറ്റുകൾ പ്രകാരം യാതൊരുവിധ നിർമ്മാണങ്ങളും വേണ്ടെന്നും, അത്യാവശ്യമായ അറ്റകുറ്റപ്പണികൾ മാത്രം ചെയ്താൽ മതിയെന്നുമാണ് മുഖ്യമന്ത്രി നേരത്തെ വ്യക്തമാക്കിയിരുന്നത്. ഈ നിർദേശങ്ങളെല്ലാം അവഗണിച്ചുകൊണ്ടാണ് പുതിയ ഉത്തരവ് പുറത്തിറങ്ങിയത്.
