ഫുജൈറ വാഹനാപകടം: മരണം പതിമൂന്നുകാരനായ വിദ്യാർഥിയുടേത്; കുടുംബം ചികിത്സയിൽ
ഫുജൈറയിൽ നടന്ന ദാരുണമായ വാഹനാപകടത്തിൽ ജീവൻ നഷ്ടപ്പെട്ട നാലാമത്തെ വ്യക്തിയും ഇന്ത്യക്കാരനാണെന്ന് ഔദ്യോഗികമായി സ്ഥിരീകരിച്ചു. പതിമൂന്ന് വയസ്സുള്ള സ്‌കൂൾ വിദ്യാർത്ഥിയാണ് അപകടത്തിൽ മരിച്ചത്. ഗുജറാത്തിൽ നിന്നെത്തി സന്ദർശക വീസയിൽ യുഎഇയിൽ കഴിയുകയായിരുന്ന കുടുംബം സഞ്ചരിച്ചിരുന്ന വാഹനമാണ് അപകടത്തിൽപ്പെട്ടത്.
നാട്ടിലേക്ക് മടങ്ങാനായി ബുധനാഴ്ച പാതിരാത്രിയോടെ ഫുജൈറ അന്താരാഷ്ട്ര വിമാനത്താവളത്തിലേക്ക് യാത്ര തിരിക്കുന്നതിനിടെയാണ് ഈ കുടുംബത്തിന് നേരെ വിധി ക്രൂരമായ രൂപത്തിലെത്തിയത്. ഇക്കാര്യം ഫുജൈറയിലെ സാമൂഹിക പ്രവർത്തകരാണ് സ്ഥിരീകരിച്ചത്. സംഭവത്തിൽ ഉൾപ്പെട്ട ട്രക്ക് ഡ്രൈവറെ കസ്റ്റഡിയിലെടുക്കാൻ യുഎഇ പബ്ലിക് പ്രോസിക്യൂഷൻ കർശന നിർദ്ദേശം നൽകി. നിലവിൽ ആശുപത്രിയിൽ ചികിത്സയിലുള്ള പ്രതിയെ പൊലീസ് ചോദ്യം ചെയ്തു വരികയാണ്. അപകടം നടന്ന സ്ഥലത്ത് ശാസ്ത്രീയമായ ഫോറൻസിക് പരിശോധനകളും അന്വേഷണ നടപടികളും പുരോഗമിക്കുകയാണ്.
