ലഹരിക്കടത്ത്: കേരളത്തിലെ ജയിലുകളിൽ 268 വിദേശികൾ; ആശങ്ക അറിയിച്ച് സംസ്ഥാന സർക്കാർ വിദേശകാര്യ മന്ത്രാലയത്തിന്

കോട്ടയം ∙ സംസ്ഥാനത്ത് മയക്കുമരുന്ന് കടത്തുമായി ബന്ധപ്പെട്ട കേസുകളിൽ വിദേശ പൗരന്മാരുടെ പങ്കാളിത്തം ക്രമാതീതമായി ഉയരുന്നതിൽ അതീവ ആശങ്ക രേഖപ്പെടുത്തിക്കൊണ്ട് സംസ്ഥാന സർക്കാർ വിദേശകാര്യ മന്ത്രാലയത്തിന് ഔദ്യോഗികമായി കത്തയച്ചു. കഴിഞ്ഞ സെപ്റ്റംബർ മാസം മാത്രം വിദേശകാര്യ മന്ത്രാലയം, വിവിധ എംബസികൾ, കോൺസുലേറ്റുകൾ എന്നിവരുമായി ആറോളം തവണ സർക്കാർ ഉന്നതതല ചർച്ചകൾ നടത്തിയിട്ടുണ്ട്. ലഹരിക്കടത്തിനെതിരായ ബോധവൽക്കരണ ദൗത്യമായ ‘ഓപ്പറേഷൻ തൂഫാൻ’ അന്താരാഷ്ട്ര തലത്തിലേക്കും വ്യാപിപ്പിക്കുന്നത് ഗൗരവമായി ആലോചിക്കുന്നുണ്ട്.
നിലവിൽ കേരളത്തിലെ വിവിധ ജയിലുകളിൽ കഴിയുന്ന വിദേശികളിൽ ഏറിയ പങ്കും ലഹരിമരുന്ന് വിൽപനയുമായും അനുബന്ധ കുറ്റകൃത്യങ്ങളുമായും ബന്ധപ്പെട്ട കേസുകളിൽ പ്രതികളായവരാണ്. മൊത്തം 268 വിദേശികളാണ് ഇപ്പോൾ ജയിലുകളിൽ കഴിയുന്നത്; ഇതിൽ 233 പുരുഷന്മാരും 35 സ്ത്രീകളും ഉൾപ്പെടുന്നു.
ലഹരി കടത്തിന് പുറമേ, വധശ്രമം, മോഷണം, ആയുധക്കടത്ത്, സ്ത്രീകളെയും കുട്ടികളെയും തട്ടിക്കൊണ്ടുപോകാൻ ശ്രമിക്കൽ തുടങ്ങി ഗുരുതരമായ മറ്റു കുറ്റകൃത്യങ്ങളിലും പ്രതികളായ നിരവധി വിദേശികൾ നിലവിൽ നിയമനടപടികൾ നേരിടുന്നുണ്ട്.




