ജിടിഎ 6 വൈകാൻ കാരണം ബെംഗളൂരു ട്രാഫിക്; ട്രോളുകളുമായി സോഷ്യൽ മീഡിയ

ലോകമെമ്പാടുമുള്ള ഗെയിമിങ് പ്രേമികൾ ആകാംക്ഷയോടെ ഉറ്റുനോക്കുന്ന ഗ്രാൻഡ് തെഫ്റ്റ് ഓട്ടോ 6 (ജിടിഎ 6) സംബന്ധിച്ച വാർത്തകൾ വലിയ ചർച്ചയാകുന്നു. ഈ ബൃഹത്തായ ഗെയിമിന്റെ നിർമാണപ്രക്രിയയിൽ ബെംഗളൂരുവിൽ നിന്നുള്ള 1,600-ലധികം ഡവലപ്പർമാർ നിർണായക പങ്ക് വഹിച്ചുവെന്ന റിപ്പോർട്ടുകളാണ് ഇപ്പോൾ പുറത്തുവരുന്നത്. ഈ അഭിമാനകരമായ നേട്ടം ബെംഗളൂരു സൗത്ത് എംപി തേജസ്വി സൂര്യ എക്സ് പ്ലാറ്റ്ഫോമിലൂടെ പങ്കുവെച്ചതോടെ വിഷയം സമൂഹമാധ്യമങ്ങളിൽ വലിയ തരംഗമായി മാറി. അതേസമയം, ഗെയിം പുറത്തിറങ്ങാൻ ഇത്രയും കാലതാമസം നേരിട്ടതിന് ബെംഗളൂരുവിലെ രൂക്ഷമായ ഗതാഗതക്കുരുക്കാണോ കാരണമെന്ന തരത്തിലുള്ള ട്രോളുകളും പരിഹാസങ്ങളും ഉയരുന്നുണ്ട്.
ഗെയിമിങ് ലോകത്ത് വൻ പ്രതീക്ഷകൾ ഉയർത്തിക്കൊണ്ട് എത്തുന്ന ജിടിഎ 6-ന്റെ നിർമ്മാണത്തിലെ ഇന്ത്യൻ സാന്നിധ്യം ഏവരുടെയും ശ്രദ്ധയാകർഷിക്കുകയാണ്. റോക്ക്സ്റ്റാർ ഗെയിംസിന്റെ ഭാഗമായുള്ള റോക്ക്സ്റ്റാർ ഇന്ത്യയുടെ വൈറ്റ്ഫീൽഡ് സ്റ്റുഡിയോയിൽ ഏകദേശം 1,615 ഡെവലപ്പർമാർ ഈ ഗെയിമിന് വേണ്ടി അഹോരാത്രം പരിശ്രമിച്ചതായാണ് ഗെയിമിങ് ലോകത്തെ പുതിയ റിപ്പോർട്ടുകൾ സൂചിപ്പിക്കുന്നത്. ഒരു ഗെയിം നിർമ്മാണത്തിൽ ഏർപ്പെട്ട ഏറ്റവും വലിയ സംഘങ്ങളിൽ ഒന്നാണിത്.
തേജസ്വി സൂര്യയുടെ പോസ്റ്റിന് താഴെ രസകരമായ കമന്റുകളുമായാണ് ഗെയിമിങ് ആരാധകർ എത്തിയത്. ബെംഗളൂരുവിലെ ഗതാഗതപ്രശ്നങ്ങൾ കാരണം ഓഫീസ് എത്താൻ വൈകിയതാണോ ഗെയിം റിലീസ് ഇത്രയും വൈകാൻ കാരണമെന്ന പരിഹാസരൂപേണയുള്ള ചോദ്യങ്ങൾ സോഷ്യൽ മീഡിയയിൽ നിമിഷനേരം കൊണ്ട് വൈറലായി. ഇത് വലിയ രീതിയിൽ ചർച്ചകൾക്ക് തിരികൊളുത്തിയിരിക്കുകയാണ്. പ്ലേസ്റ്റേഷൻ 5 (പിഎസ് 5), എക്സ്ബോക്സ് സീരീസ് എക്സ്/എസ് എന്നീ പ്ലാറ്റ്ഫോമുകളിലായിരിക്കും തുടക്കത്തിൽ ഗെയിം ലഭ്യമാകുക.




