വെളുത്ത ബ്രെഡ് ഒഴിവാക്കാം: പ്രഭാതഭക്ഷണത്തിലെ അപകടസാധ്യതകൾ തിരിച്ചറിയുക
പ്രാതലിന് വെളുത്ത ബ്രെഡ് അഥവാ വൈറ്റ് ബ്രെഡ് ശീലമാക്കിയവരാണോ നിങ്ങൾ? എങ്കിൽ അതിന്റെ ആരോഗ്യപരമായ ദോഷവശങ്ങളെക്കുറിച്ച് അറിഞ്ഞിരിക്കേണ്ടത് അത്യാവശ്യമാണ്. ഇന്നത്തെ തിരക്കേറിയ ജീവിതശൈലിയിൽ പലരും പ്രഭാതഭക്ഷണം ഒഴിവാക്കാറുണ്ട്, ചിലരാകട്ടെ എളുപ്പത്തിന് വേണ്ടി ബ്രെഡ് പോലുള്ള ഭക്ഷണങ്ങളെ ആശ്രയിക്കുകയും ചെയ്യുന്നു. രുചിയിലുള്ള മികവും സാൻഡ്‌വിച്ച് പോലുള്ള വിഭവങ്ങളിലെ സാന്നിധ്യവും കാരണം വൈറ്റ് ബ്രെഡ് പലരുടെയും ഭക്ഷണക്രമത്തിന്റെ ഭാഗമായി മാറിക്കഴിഞ്ഞു. എന്നാൽ, മൈദ ഉപയോഗിച്ച് നിർമ്മിക്കുന്ന ഈ വിഭവം ശരീരത്തിന് വലിയ ആരോഗ്യപ്രശ്നങ്ങളാണ് സമ്മാനിക്കുന്നത്.
രക്തത്തിലെ പഞ്ചസാരയുടെ അളവ്
വൈറ്റ് ബ്രെഡിലെ സംസ്കരിച്ച മാവ് ദഹിക്കുമ്പോൾ വളരെ പെട്ടെന്ന് തന്നെ ഗ്ലൂക്കോസായി രക്തത്തിൽ കലരുന്നു. നാരുകളുടെ അംശം ഒട്ടുമില്ലാത്തതിനാൽ പഞ്ചസാരയുടെ അളവ് പെട്ടെന്ന് ഉയരാൻ ഇത് വഴിയൊരുക്കുന്നു. താത്ക്കാലികമായി ഒരു ഊർജ്ജം ലഭിക്കുമെങ്കിലും, ഇൻസുലിൻ ഇതിനെ വേഗത്തിൽ നിയന്ത്രിക്കാൻ ശ്രമിക്കുമ്പോൾ ഊർജ്ജം പെട്ടെന്ന് കുറയുന്നു. ഇത് നിങ്ങളിൽ ക്ഷീണവും ശ്രദ്ധക്കുറവും അനുഭവപ്പെടാൻ കാരണമാകും. ഇത്തരം ഉയർന്ന ഗ്ലൈസെമിക് സൂചികയുള്ള ഭക്ഷണങ്ങൾ സ്ഥിരമായി കഴിക്കുന്നത് പിൽക്കാലത്ത് ടൈപ്പ് 2 പ്രമേഹം പിടിപെടാനുള്ള സാധ്യത വർദ്ധിപ്പിക്കുന്നു.
ശരീരഭാരം
നാരുകളില്ലാത്ത വൈറ്റ് ബ്രെഡ് ദഹനവ്യവസ്ഥയിലൂടെ അതിവേഗം കടന്നുപോകുന്നു. പെട്ടെന്നുള്ള ദഹനം കാരണം, കഴിച്ചതിന് ശേഷം ഒന്നോ രണ്ടോ മണിക്കൂറിനുള്ളിൽ തന്നെ വീണ്ടും വിശപ്പ് അനുഭവപ്പെടാൻ സാധ്യതയുണ്ട്. ഇത് പലപ്പോഴും അനാവശ്യമായ ലഘുഭക്ഷണങ്ങൾ കഴിക്കാൻ പ്രേരിപ്പിക്കുകയും ശരീരഭാരം കൂടുന്നതിനും പ്രത്യേകിച്ച് വയറ്റിൽ കൊഴുപ്പടിയുന്നതിനും കാരണമാകുന്നു. അമിത ഊർജ്ജം ശരീരം കൊഴുപ്പായി സംഭരിക്കുന്നതിനാലും, മെറ്റബോളിസത്തെ മന്ദീഭവിപ്പിക്കുന്നതിനാലും വ്യായാമം ചെയ്യാത്തവർക്ക് ഇത് കൂടുതൽ ദോഷകരമാണ്.
ദഹന സംബന്ധമായ അസ്വസ്ഥതകൾ
ഗോതമ്പിന്റെ തവിട് നീക്കം ചെയ്ത് സംസ്കരിക്കുമ്പോൾ അതിലെ നാരുകൾ പൂർണ്ണമായും നഷ്ടപ്പെടുന്നു. ഇത് മലബന്ധം, വയർവീർക്കൽ, വായുകോപം തുടങ്ങിയ ദഹനപ്രശ്നങ്ങൾക്ക് ഇടയാക്കുന്നു. വൈറ്റ് ബ്രെഡ് ഒഴിവാക്കാൻ സാധിക്കാത്തവർ പഴങ്ങളും പച്ചക്കറികളും ഭക്ഷണത്തിൽ ഉൾപ്പെടുത്താൻ ശ്രദ്ധിക്കുക. കൂടാതെ, നാരുകളുടെ പ്രവർത്തനക്ഷമത വർദ്ധിപ്പിക്കാൻ ധാരാളം വെള്ളം കുടിക്കാനും ശ്രദ്ധിക്കണം.
കൊളസ്ട്രോളിന്റെ അളവ്
സംസ്കരിച്ച കാർബോഹൈഡ്രേറ്റുകളുടെ അമിത ഉപയോഗം ശരീരഭാരം വർദ്ധിപ്പിക്കുക മാത്രമല്ല, ചീത്ത കൊളസ്ട്രോളിന്റെ (LDL) അളവ് ഉയർത്താനും ട്രൈഗ്ലിസറൈഡുകൾ വർദ്ധിപ്പിക്കാനും കാരണമാകുന്നു. ഇത് ശരീരത്തിൽ വിട്ടുമാറാത്ത വീക്കത്തിന് (Inflammation) വഴിയൊരുക്കുകയും ഹൃദ്രോഗം, മെറ്റബോളിക് സിൻഡ്രോം തുടങ്ങിയ ഗുരുതര ആരോഗ്യപ്രശ്നങ്ങളിലേക്ക് നയിക്കുകയും ചെയ്യുന്നു.
ഹൃദയാരോഗ്യം
ഹൃദയാരോഗ്യം മെച്ചപ്പെടുത്താൻ ആഗ്രഹിക്കുന്നവർ നാരുകളും ആന്റിഓക്‌സിഡന്റുകളും ഒത്തിണങ്ങിയ ഹോൾ ഗ്രെയിൻ അഥവാ മുഴുവൻ ധാന്യങ്ങൾ കൊണ്ടുള്ള ബ്രെഡ് തിരഞ്ഞെടുക്കുന്നതാണ് ഉചിതം. ഇത് വീക്കം കുറയ്ക്കാനും ആരോഗ്യം നിലനിർത്താനും സഹായിക്കുന്നു. എന്തായാലും പ്രഭാതഭക്ഷണത്തിന് ബ്രെഡ് തിരഞ്ഞെടുക്കുമ്പോൾ വൈറ്റ് ബ്രെഡിന് പകരം കൂടുതൽ പോഷകസമൃദ്ധമായ ഓപ്ഷനുകൾ തേടുന്നത് ആരോഗ്യകരമായ ജീവിതത്തിന് ഗുണകരമാകും.
