NEWS

ഇറാൻ തീരത്ത് മൂന്നാം യുഎസ് സ്ട്രൈക്ക് ഗ്രൂപ്പ്; അമേരിക്കൻ ബാങ്കുകളിൽ സാങ്കേതിക തകരാർ, സ്വർണവിലയിൽ ഇടിവ്

ഇറാനെതിരെ സമ്മർദ്ദം ശക്തമാക്കി യുഎസ് സൈനിക നീക്കങ്ങൾ കൂടുതൽ ഊർജിതമാക്കി. മേഖലയിൽ ആക്രമണ ഭീഷണികൾ നിലനിൽക്കെ, അമേരിക്കയുടെ മൂന്നാമതൊരു വിമാനവാഹിനി കപ്പൽ കൂടി സമുദ്രാതിർത്തിയിൽ എത്തിയിരിക്കുകയാണ്. യുഎസ്എസ് തിയോഡോർ റൂസ്‌വെൽറ്റ് ഇന്നലെ സജ്ജമായതോടെ, നേരത്തെ തന്നെ നിലയുറപ്പിച്ചിരുന്ന യുഎസ്എസ് ജോർജ് എച്ച്.ഡബ്ല്യൂ.ബുഷ്, യുഎസ്എസ് ജോർജ് വാഷിങ്ടൺ എന്നിവയോടൊപ്പം അമേരിക്കയുടെ നാവിക ശക്തി ഇരട്ടിയായി. ഇറാന്റെ സാമ്പത്തിക അടിത്തറ തകർക്കുക എന്ന ലക്ഷ്യത്തോടെയുള്ള നാവിക ഉപരോധം കൂടുതൽ കടുപ്പിക്കാനാണ് ഈ നീക്കമെന്നാണ് വിലയിരുത്തൽ. 2003-ന് ശേഷം പശ്ചിമേഷ്യയിൽ അമേരിക്ക നടത്തുന്ന ഏറ്റവും വലിയ സൈനിക വിന്യാസമാണിത്.

അതേസമയം, യുഎസിലെ പ്രമുഖ ബാങ്കിങ് ശൃംഖലകളിൽ ഉണ്ടായ സാങ്കേതിക തകരാർ ആയിരക്കണക്കിന് ഇടപാടുകാരെ വലച്ചു. തൊട്ടുതലേന്ന് സാങ്കേതിക തകരാറുമൂലം വ്യോമയാന സർവീസുകൾ നിർത്തിവെച്ചതിന് പിന്നാലെയാണ് ഓൺലൈൻ ബാങ്കിങ് സേവനങ്ങളിലും തടസ്സം നേരിട്ടത്. ബാങ്ക് ഓഫ് അമേരിക്ക, ജെപി മോർഗൻ ചേസ്, യുഎസ് ബാങ്ക്, വെൽസ് ഫാർഗോ തുടങ്ങിയ പ്രമുഖ ബാങ്കുകളിലെ ഉപഭോക്താക്കളെയാണ് ഇത് കാര്യമായി ബാധിച്ചത്. സംഭവത്തിന് പിന്നിൽ സൈബർ ആക്രമണമില്ലെന്നും സാങ്കേതിക തകരാർ മാത്രമാണെന്നും ജെപി മോർഗൻ അധികൃതർ വ്യക്തമാക്കി. ഇടപാടുകാരുടെ നിക്ഷേപങ്ങൾ സുരക്ഷിതമാണെന്ന് ഉറപ്പുനൽകിയെങ്കിലും, വാർത്ത പുറത്തുവന്നതോടെ യുഎസ് ഓഹരി വിപണിയിൽ ഈ ബാങ്കുകളുടെ ഓഹരി വിലയിൽ ഇടിവുണ്ടായി.

ഇന്ത്യൻ ഓഹരി വിപണിയിൽ വലിയ കുതിപ്പിന് സാധ്യതയുണ്ടെന്ന് പ്രവചിച്ച് പ്രമുഖ ധനകാര്യ സ്ഥാപനമായ മോർഗൻ സ്റ്റാൻലി രംഗത്തെത്തി. അടുത്ത വർഷം അവസാനത്തോടെ ബിഎസ്ഇ സെൻസെക്സ് 95,000 പോയിന്റ് എന്ന ചരിത്രനേട്ടം കൈവരിക്കുമെന്നാണ് റിപ്പോർട്ടുകൾ സൂചിപ്പിക്കുന്നത്. നിലവിലെ സ്ഥിതിയിൽ നിന്ന് ഏകദേശം 16 ശതമാനം വളർച്ചയാണ് ഓഹരി വിപണിയിൽ പ്രതീക്ഷിക്കുന്നത്. ആഭ്യന്തര വളർച്ചയുടെ വേഗത, അന്താരാഷ്ട്ര ഭൗമരാഷ്ട്രീയ സാഹചര്യങ്ങളിലെ അനുകൂല മാറ്റങ്ങൾ, ഇന്ത്യ-യുഎസ് വ്യാപാര ഉടമ്പടി എന്നിവ യാഥാർത്ഥ്യമായാൽ ഈ ലക്ഷ്യം കൈവരിക്കാൻ 50 ശതമാനം സാധ്യതയുണ്ടെന്ന് റിപ്പോർട്ടിൽ ചൂണ്ടിക്കാട്ടുന്നു. ബ്രെന്റ് ക്രൂഡ് ഓയിലിന്റെ വില ബാരലിന് 100 ഡോളറിൽ താഴെയായി തുടരണമെന്നത് ഈ മുന്നേറ്റത്തിനുള്ള പ്രധാന നിബന്ധനയാണ്. 2028-29 സാമ്പത്തിക വർഷം വരെ സെൻസെക്സ് ഓഹരികളിൽ നിന്ന് ശരാശരി 18.1 ശതമാനം വാർഷിക നേട്ടം ലഭിക്കുമെന്നും പ്രവചനമുണ്ട്.

Fashion ⏭️

Back to top button